Read Yupik Leviticus 18 Bible Online

Leviticus 18 - Yupik bible

Leviticus 18

¹ATANREM qanrutaa Moses-aaq,

²“Qanruski Israel-aam yui: Wiinga ATANRUUNGA elpeci Agayuteklua.

³Egypt-aarmiut uitavikellerpeci piciryarait aturyaqunaciki, wall'u Canaan-aamun tekiskuvci, maa-i ayauskumci nuniitnun, piciryarait aturyaqunaciki.

⁴Picirkiutenka aturarkaugaci avaliqu'urluki-llu alerquutenka maligtaquluki-llu. ATANRUUNGA elpeci Agayuteklua.

⁵Elpeci aturarkaugaci piciryararkiutenka alerquutenka-llu; atuquvciki unguvavcen̄ek qelkilriaruciquci. Wiinga ATANRUUNGA.

⁶Unayaqngaitan canimenaku tungayiin akusraruteksugluku. Wiinga ATANRUUNGA.

⁷Aatan caunrilleksaqunaku akusrarutekluku aanan. Aanakan qaillukuaryaqunaku.

⁸Akusraruteksaqunaku atavet nulirra; caunrilkeciqngavgu aatan tuatnakuvet.

⁹Akusraruteksaqunaku nayagaan wall'u alqaan wall'u pania atavet wall'u aanavet, yuurtellrungraan nunavni wall'u yaaqvani.

¹⁰Akusraruteksaqunaku qetunrarpet pania wall'u panigpet pania, kasngunarqelriaruciqngan tamana elpenun.

¹¹Akusraruteksaqunaku atalgutkenrilken wall'u aanallgutkenrilken atavet wall'u aanavet yua, elpet nakmiin anelgutekngavgu.

¹²Akusraruteksaqunaku atavet nayagaa wall'u alqaa, atavet nakmiin ilakngaku.

¹³Akusraruteksaqunaku aanavet kinguqlia wall'u alqaa, aanavet nakmiin ilakngaku.

¹⁴Akusraruteksaqunaku angagpet wall'u ataatavet nulirra, elpet acuraqngavgu.

¹⁵Akusraruteksaqunaku ukurraan

¹⁶wall'u angutem anelgutvet nulirra.

¹⁷Akusraruteksaqunaku pania wall'u tutgarii arnam akusraruteklerpet, tungayaksuagken. Tuatnayaraq nakmiin ilaminek akusrarutekiyarauguq.

¹⁸Nuliarpet nayagaanek nuliangyaqunak nulian unguvainanrani.

¹⁹“Akusraruteksaqunaku arnaq agelrumalria, menuulriaruan.

²⁰Akusrarutekiyaqunak allam nulirranek, menuurciiqngavet elliikun.

²¹Irniaci tunyaqunaciki elliitnguluki agayutnguamun Molech-aamun, tuatnakuvci caarrluurciiqngavciu atra ATANREM Agayutem.

²²Akusrarutekngaitarci angun arnamek pilaucirpecetun; tuatnallerkaq pellernarqelriaruuq.

²³Arnaq wall'u angun akusrarutekingaituq ungungssiarmek; tuatnallerkaq cumacinarqelriaruuq menuurutkeciqerci-llu.

²⁴“Menuurcaqunaci elpecen̄ek makut iliitgun, makut maa-i menuurutkellruitki atanruviit ciunerpecen̄ek ayagcetarkama.

²⁵Tuatnaluteng nuna menuurcetellruat, taumek nuna ATANREM anucimirqecetaaqii (wall'u aniqlaakii), yuk'ellrinek ancivkarluku.

²⁶Tau͡gaam elpeci aturarkaugaci picirkiutenka alerquutenka-llu, aturngaunaki-llu makut pellernarqelriit, elpeci Israel-aam yuini wall'u allanrulriani nunavcen̄i.

²⁷Makut maa-i pellernarqelriit tamatum nunam yuin atullrit ciunerpecen̄i uitalriit nuna menuurrluku;

²⁸menuureskuvcen̄i nunam ancuaraaci, ciunerpecen̄i yuut uitalriit tuaten pillrucirmitun.

²⁹Tua-i kina imna atuquni makut pellernarqelriit iliitnek, tauna Agayutem yuinun ilausciigaliciquq.

³⁰“Niisngakiciki makut alerquutekellrenka aturpek'naki-llu tamakut yuut ciunerpecen̄i uitalriit pellernarqelriit piciryarait, menuurtenritniartuci atullratgun tamakut. ATANRUUNGA elpeci Agayuteklua.”