Read Yupik Leviticus 19 Bible Online

Leviticus 19 - Yupik bible

Leviticus 19

¹ATANREM qanrutaa Moses-aaq,

²“Israel-aam yui tamalkuita qanruski: Tanqilriarukici, wiinga ATANEQ tanqilriaruama.

³Tamarpeci takaqerkaugaci aanaci ataci-llu aturarkauluku-llu Sabbath-aaq alerqullrucimtun. Wiinga ATANRUUNGA elpeci Agayuteklua.

⁴“Tuigcaqunaci agayutnguanun wall'u cavignek uruggluki agayutngualiyaqunaci pikarpecen̄ek. Wiinga ATANRUUNGA elpeci Agayutkarpecia.

⁵“Taiskuvet tuqutarkamek elliitekluku ilakuyucimun pisqutenka aturluki pikina ciuniurumaniartuten.

⁶Ner'arkaugarci-llu ernermi tuani elliiteklerpecen̄i wall'u unuaquani. Ilakuartangqerqan erenret pingayuatni tamalkuita ekuaniaci.

⁷Nerumakuni erenret pingayuatni pellernarqelriaruuq; elliitekumalria-llu wiinga ciuniurngaitaqa.

⁸Nerelriit-llu tamarmeng pinarqut'ngarkauluteng, caunrilkeciqngamegteggu tanqilria Agayutem pia. Tuaten pilria yumnun ilausciigaliciquq.

⁹“Quyurciaqavci naucetaarpecen̄ek mukaarkat naucetaarviim avatiinelnguut uitaskiciki kaimlleret-llu uterrvikluki avuqsaunaki.

¹⁰Wine-arkanek-llu atsanek avuquvci nangqapiggluki piyaqunaciki, igqaqellret-llu atsat avurpek'naki; uitaskiciki arrsaulrianun allanernun-llu nunavcen̄i uitalrianun pikaqevkarluki. Wiinga ATANRUUNGA elpeci Agayutkarpecia.

¹¹“Teglegyaqunaci, piciunrilngurnek piksaunaci, iqluuruteksaunaci-llu.

¹²Akqiyaqunaci ukvernarcariluci atqa aturluku akquteklerci aturngailkuvciu. Tuaten piluci caunrillekngavciu atra Agayutevci. Wiinga ATANRUUNGA.

¹³“Usviilqingnaqsaqunaku nunalguten wall'u teglegiluku. Akiliutekaa calistevvet avaliqsaqunaku unuaqullerkaanun, egmianun tunkiu.

¹⁴Aniqlaayaqunaku niitesciigalnguq, paallautekaanek-llu cikmiumalriim ciunranun elliiyaqunak, tau͡gaam qigcikiu Agayuten. Wiinga ATANRUUNGA.

¹⁵“Cuqciaqavet qanercetaarvigteggun piciuluten pitalqellriakun-llu pilarciquten; ingluarvikngaitaten arrsaulriit wall'u angenrukiluten tukuulrianek.

¹⁶Qanerrlugmek sagcilriaruyaqunak nunalgutevni. Ilan anaucugngakuvgu qanercetaarvigmi tuqullerkaanek tuaten pikina. Wiinga ATANRUUNGA.

¹⁷“Pagglungqerrsaqunak allamun yugmun, tau͡gaam ullagluku qanellgutkekiu arenqialliqutevtegnek, assiilngiryuartuten ellii pitekluku.

¹⁸Akinauryaqunaki wall'u iliitni nunalgutvet pagglungqerrsaqunak, tau͡gaam kenkarkaugan ilan elpetun pitarrluku. Wiinga ATANRUUNGA.

¹⁹“Niisngaarkaugaci picirkiutenka. Ungungssiuteci ayuqenrilkaitnun nulirceteksaunaki. Nauceciiksaunaci ayuqenrilngurnek naucetaarkanek ataucimi naucetaarvigpecen̄i. Aturangqeqsaunaci-llu 'lumarrarmek piliaqumalriamek avukullukek qusngim melqurra 'lumarrayagaq-llu.

²⁰“Angun akusrarutekikan teguamek uikautellegmek, tauna-llu akilirluku angicimaksaunani teguarullranek; tamana kangingnaurutkeciqaat, tau͡gaam taukuk tuqusngaunakek, arnaq cali tauna teguaruan.

²¹Tauna angun taitarkauguq angucalumek qusngimek pinarqutminun elliitekaminek Pelatekaan ATANREM tuanlucian amiiganun.

²²Tauna-llu qusngiq agayulirtem aturluku menuircaryaraq aturciqaa taum assiilnguan au͡gautekaa. Tauna-llu assiilnguminek au͡g'aricimaarkauluni.

²³“Tekiskuvci-llu Canaan-aam nuniinun napanek-llu atsangtulinek ayuqenrilngurnek nauceciiluci neqkarpecen̄ek, allrakuni pingayuni menuulriaruciqut, elpecen̄un nerrlerkaat inerquusngaluni.

²⁴Cetamiitni-llu allrakut naullret atsait kencignarqellriaruciqut cikiutnguarkauluteng nanrarcuutekluki ATANERMUN.

²⁵Tau͡gaam tallimiitni allrakut atsait neryugngaciqaci, tuaten pillerpeciuggun amllernek atsangyaurcesqelluki. Wiinga ATANRUUNGA elpeci Agayutkarpecia.

²⁶“Kemegmek augtuumalriamek neryaqunaci. Irr'inartaatulit angalkiluteng piciryarait aturyaqunaciki.

²⁷Ayakutararpecen̄i nuyat kepeksaunaki ungaci-llu nanilicaryaqunaciki.

²⁸Tuquigaqavci elpecen̄ek kilirtuqsaunaci wall'u yagluku amirci qaraliliqsaunaku. Wiinga ATANRUUNGA.

²⁹“Paniin caarrluurcessngaitan akissuurtelluku allat yuk'enrilkevci agayuviatni;[4] tuaten pikuvet allanun agayutnguanun cauciquten nuna-llu assiitqapigtellriarurciiquq.

³⁰Sabbath-aaq atulaqiciu agayuvici-llu wangnun qigcikluki. ATANRUUNGA Wiinga.

³¹“Tuqullret piluki apqararatulit ikayungcarvikeksaunaki, menuurciiqngavci tamaaggun. Wiinga ATANRUUNGA Agayutsi.

³²“Qigcikarkaugaten takaqluki-llu yuut ak'allaurtellriit. Qigciklua pisqutenka atuqiciki. Wiinga ATANRUUNGA.

³³“Allanertangqerqan nunavni uitalriamek elluarrluku piurararkaugan.

³⁴Nakmiin tau͡gaam nunalgutkellriatun ayuquciiqan kenekluku elpetun pitarrluku, elpeci-llu allanrullruavci nuniini Egypt-aam. Wiinga ATANRUUNGA elpeci Agayutkarpecia.

³⁵“Teglegiksaunaki ilaci cuqyutevciuggun uqamaltassiarcuutevciuggun-llu.

³⁶Pitalqellrianek cuqcissuutnek uqamaltassiarcuutnek-llu atulaqici. Wiinga ATANRUUNGA elpeci Agayutkarpecia anutestellerci Egypt-aamek.

³⁷Niisngakiciki alerquutenka picirkiuranka-llu. Wiinga ATANRUUNGA.”