Read Yupik Leviticus 2 Bible Online

Leviticus 2 - Yupik bible

Leviticus 2

¹“Kina imna elliikuni mukaarkamek ATANERMUN elliitii mukaaqegtaaraugarkauguq; qainga-llu kuvevikluku uqumek olive-aat uquatnek tepkegcilriamek-llu frankincense-aamek.

²Tailluku-llu Aaron-aam qetunrainun agayulirten̄un. Tuaken-llu tumami imaanek tegulluni mukaaqegtaarmek uqumek-llu, tepkegcilria tapeqluku. Agayulirtem-llu una ekuaciqaa umyuaqutnguluku qaingani ekuaviim, cikiutnguluni kenerkun narnirqelriaruluni ATANERMUN.

³Ilakuara-llu mukaarkam elliitngullrem pikarkaugaa Aaron-aam qetunrain-llu; kenciknarqeqapigtellriartaqaat elliitngullret ekualuki ATANERMUN.

⁴“Kelipaq elliitekaq quuleciramek wall'u ulcetaamek avungqerrngaituq. Makut kelipat piliaqumaarkauluteng mukaamek olive-aat uquatnek avuluni. Wall'u mamkilnguuluteng pilimakuneng qaingit mingugluki olive-aat uquatnek.

⁵“Elliiten-llu mukaarkaukan uucimaluni assalissuutekun, piliaqumaciquq aturluten mukaaqegtaarmek quulecirailngurmek avumalriamek olive-aat uquatnek.

⁶Ciqumqaarluki uqumek-llu kuvvraarluki elliitekniaten.

⁷“Elliiten-llu mukaarukan uucimaluni qantakun piliaqeciqan aturluten mukaaqegtaarmek avuluku olive-aat uquatnek.

⁸Mukaaq elliitekellren makunek taqumalria ATANERMUN iluvauciiqan. Agayulirtem̄un tunkuvgu elliin ayauciiqaa ekuavigmun.

⁹Agayulirta-llu iliinek teguciiquq nallunailkutauvkarluku tamalkuan elliitngullrucianek ATANERMUN, ekuavkarluku-llu ekuavigmi, elliitnguluni narniqluni ATANERMUN.

¹⁰Ilakuara-llu mukaam elliitem pikarkaugaa Aaron-aam qetunrain-llu; kenciqnarqeqapigtellriaruuq tegumiimi elliitngulriamek ATANERMUN.

¹¹“Mukaarkamek elliiteci ATANERMUN quuleciramek ilangqerrngaitut, elliigarkaunrilavci quuleciramek wall'u paatakaamek ekuagarkauluku ATANERMUN.

¹²Naucetaarpenek quyurciqarraalten elliiteksugngaaten ATANERMUN, tau͡gaam ekuagarkauvkenaki ekuavigmi.

¹³Mukaarkanek elliigaqavci taryirrlainarluki piaqluki, taryuq nallunairutekngaku akquyutem taqumalriim elpecen̄un Agayutmun-llu. Elliiteci taryirrlainarluki pilarniaci.

¹⁴Naucetaarpecen̄ek mukaarkanek quyurciqarraallerpecen̄ek elliikuvci, tamakut uucimaarkaugut wall'u arisngaluteng ciumek.

¹⁵Olive-aat uquatnek avuluku piniarci tepkegcilriamek-llu aruvagkamek.

¹⁶Agayulirtem-llu ekuagarkaugaa ilii aricimalriim mukaarkam uqurtuumaan tepkegcilriamek-llu aruvagkartuumaan umyuaqutnguluku pimaarkaq. Elliitnguuq ekualuku ATANERMUN.