Read Yupik Leviticus 21 Bible Online

Leviticus 21 - Yupik bible

Leviticus 21

¹ATANREM alerquraa Moses-aaq qanrutesqelluki Aaron-aam qetunrai agayulirtet, “Agayulirta ellminek menuurcessngaituq ilagaulluni tuqumalriamek tungmagcilriit piciryaraitnun.

²Tungmagcilriit ilagaryugngaciqai tuqulria aanakekuniu wall'u aatakluku wall'u irniami ilakekatgu wall'u nakmiin anelgutkekuniu,

³wall'u cali nayagaqkuniu wall'u alqaqluku uingeksailnguq enelgutekluku, angutem agtuqsaunaku.

⁴Cali-llu menuurcessngaunani nuliamikun tungayaksagutellermi iliitgun.

⁵“Nuyateng kepliarngaitait ungateng-llu ilangarrngaunaki, qaiseng-llu kilirturngaunaku tuquilriit cayaraat aturluku.

⁶Tanqilriaruarkaugut, at'ma-llu qigcignairuyutekaanek pingaunateng; cikiutek'laamegteki neqkat elliitet ekualuki ATANERMUN, taumek tanqilriaruarkaulriit.

⁷Agayulirta nulirturngaituq akissumek wall'u angutem akusrarutekellranek wall'u avvusngalriamek; tua-i-wa agayulirta tanqilriaruami.

⁸Kencignarqellriatun Agayulirta piarkaugarci, elliin elliitet neqkat wangnun taitelaaki. Wiinga ATANRUUNGA, tanqilriaruama yuunka tanqilriarurcet'laranka.

⁹Agayulirtem pania caarrluureskuni ellminek akissuurrluni, atani-llu kasngunarqelriarurtaa; ekualuku tuqucimaarkauguq.

¹⁰“Agayulirten͞gunrulria uqumek kuvumalleq qamiqumikun, allakaumaluni agayulirtem akluinek ac'ugngariluni, nuyani qucarrlugcessngaitai cali-llu aturani allgurngaunaki tuquilriit cayaraitnek aturniluni.

¹¹Wangnun allakaumiimi ellminek menuurrngaituq wall'u kencignarqelria Pelatekaqa menulirngaunaku tuaken anluni iterluni-llu tuqumalriim uitavianun, nakmiin tauna atakeng'e'rmiu wall'u aanak'ngermiu.

¹³Arnamek-llu angutem agtuqsailkiinek tau͡gaam nulirturarkauluni,

¹⁴aipainermek wall'u avvusngalriamek wall'u akissumek pivkenani. Tau͡gaam nuliangarkauluni elliin tungayakutellriartami iliitnek angutem agtuqsailkiinek.

¹⁵Tuaten pinrilkuni irniari qigcignarqerkauyaaqellret menuulriaruciqut. Wiinga ATANRUUNGA tauna-llu wii allakallruaqa Agayulirten͞gunruvkarluku.”

¹⁶ATANREM-llu alerquraa Moses-aaq

¹⁷qanrutesqelluku Aaron-aaq, “Kinguverpet iliit tememikun natlugnengqerquni cikiutekngaitaa neqkauluni elliitngulria ATANERMUN. Waten pilararkaugut taqsuunateng.

¹⁸Kina imna tememikun natlugnengqellria, cikmiumaluni wall'u tussilluni wall'u kegginaa ayuqucimitun ayuqevkenani wall'u qaillun temii ayuqluni wall'u ipii eluciinateng, cikiqengarkaunrituq elliitmek.

¹⁹Cali-llu unatmikun it'gamikun-llu natlugnengqellria

²⁰wall'u quluggluni wall'u yucuarauluni wall'u meciinani wall'u kumegglulek wall'u pupilek wall'u iguugiumalria.

²¹Agayulirtem Aaron-aam kinguvrin iliita natlugnengqellriim cikiutekngaitaa neqkaq elliitekumalria wangnun.

²²Neryugngaarkauluni tau͡gaam neqkamek wangnun tanqilriaruluku elliitngullermek, cali-llu tanqipialriaruluku elliitngullermek.

²³Tau͡gaam capkutaq mallegngaunaku ekuavik-llu ullagngaunaku, natlugnengqerrami menuurcuaraa ekuavika. Wiinga-wa ATANRUAMA ellaita kencignarivkartiit.”

²⁴Tua-i Moses-aam makunek alerquutnek qanrutaa Aaron-aaq qetunrai-llu tamalkuita-llu Israel-aam yui.