Read Yupik Leviticus 23 Bible Online

Leviticus 23 - Yupik bible

Leviticus 23

¹ATANREM qanrutaa Moses-aaq,

²“Qanruski Israel-aam yui, nallunairumalriit nerevkaritai ATANREM quyurrluci agayulallerkaci makuugut.

³Caliarkat caliaqelarciqaci arvinlegni ernerni. Tau͡gaam erenret malrunelgat Sabbath-aaruuq, calivkenaci mernuinercillerkaqerci; tau͡gaam quyurrluci tuani agayuarkauluci. Nani uitang'e'rpeci erenruciquq uitayarauluni ATANREM pikluku.

⁴Makut nallunairumalriit nerevkarillerkat ATANERMUN quyurrluci agayullerkaqaci, qanrutkelararkauluki pinariaqata.

⁵“Iralut ciuqliatni erenrin akimiarunritariitni atakukan Kituutem nerevkaritekciqaa.

⁶Taum-llu iraluani cali erenrin akimiaratni nerevkaritekciqaa Quulecirailnguum Kelipam; malrunlegni ernerni nerlararkauluci quulecirailngurnek kelipanek.

⁷Ciuqliatni ukut erenret quyurrluci agayuciquci; caliarkauvkenaci camek tuani.

⁸Elliigaqluci ATANERMUN ekuagarkanek ernerni malrunlegni; erenret malrunelgatni cali quyurrluci agayuarkauluci, cali-llu calingaunaci tuani ernermi.

⁹“Tekiskuvci nunamun cikiuteklemnun elpecen̄un, mukaarkanek-llu nauceciillerpecen̄ek quyurciluci, ciuqlikacagaat qillerqaat mukaarkat aguskiciki agayulirtem̄un.

¹¹Sabbath-aam-llu unuaquani agayulirtem taukut qillerqaat elliitekciqai ATANERMUN, elliinun ciuniurumasqelluci.

¹²Tuani-llu ernermi elliitngullrata nalliini taukut mukaarkat qillerqaat elliiniartuci angucalumek qusngiyagarmek ataucimek allrakulegmek natlugnerilngurmek cikiutekamek ekualuku ATANERMUN.

¹³Tauna-llu tapirluku elliigarkauluci uspernek cetamanek mukaamek, avulegmek olive-aat uquatnek. Una elliitnguluni ekualuku ATANERMUN, tepii ilukegcinaqluni. Cali tauna tapirluku elliiciquci wine-amek, cetaman saskat imarkanritnek amllertalriamek.

¹⁴Nerngaituci kelipamek wall'u mukaarkamek nutaraungraan wall'u uumangraan makunek elliivailegpeci Agayutmun. Una picirkiutnguarkauluni tamalkuitnun kinguverpecen̄un akwarpak.

¹⁵“Erenrem uitayaram unuaquanek ayagnirluci, ayagneqluku elliitnek qillerqaanek taitellerci, naaqikici ernernek nitilit malrunelgurtellratnun.

¹⁶Yuinaak-llu malruk qulnek cipluku naakata, unuaquani malrunelgata Sabbath-aat, cikiqiciu ATANEQ elliiluci allamek nutaramek mukaarkamek.

¹⁷Enevcen̄ek taitniartuci malrugnek kelipagnek ATANERMUN elliitnguarkagnek. Atauciq uucimaluni cetamanek uspernek mukaamek quuleciralegmek aipaa-llu cali tuaten. Ukuk cikiutnguarkaulutek ATANERMUN elliitngulutek naucetaanek avuqerraallerpecen̄ek.

¹⁸Ilakluku-llu kelipagnun elliiniartuci malrunlegnek qusngiyagarnek ataucimek allrakulegnek, natlugnerilngurnek, ataucimek-llu kuluvayagarmek malrugnek-llu angucalugnek qusngignek; ekualuki elliitnguarkauluteng ATANERMUN, mukaarkamek merkamek-llu tapirluki, tepii ilukegcinaqluni ATANERMUN.

¹⁹Elliiluci-llu cali ataucimek angucalumek qusngirngalngurmek assiilnguum au͡gautekaanun, malrugnek-llu angucalugnek qusngiyagaagnek ataucimek allrakulgegnek elliitekagnek ilakuyucimun.

²⁰Agayulirtem-llu elliitekciqak kelipak qusngiyagaak-llu cikiuteksuumiutekluki ATANERMUN. Ukut elliitnguut tanqilriaruluteng ATANERMUN, agayulirten̄un pikesqelluki.

²¹Taumi-llu ernermi quyurrluci agayuniartuci; caliarkaci caliaqevkenaki, man'a-llu nunavcen̄i nanleng'e'rpeci picirkiutnguarkauluni tamalkuitnun kinguverpecen̄un akwarpak.

²²“Quyurciaqavci naucetaarpecen̄ek mukaarkat naucetaarviim avatiinelnguut uitaskiciki kaimlleret-llu uterrvikluki avurpek'naki; uitaskiciki arrsaulrianun allanernun-llu pikevkarluki. Wiinga ATANRUUNGA elpeci Agayutkarpecia.

²³“Malrunelgatni iralut, ciuqliatni erenrin iralum, mernuinercirvikniarci tauna erneq, quyurrluci agayuniartuci cupu'uryaraq qalriakan.

²⁵Caliarkaci caliaqevkenaki elliiluci tau͡gaam neqkanek ekuagiluci ATANERMUN.

²⁶“Qulngurutiit erenret malrunelgatni iralut erneqciqaa assiilngurnek au͡g'ariciyaram. Tuani ernermi nereksaunaci yagniartuci, tau͡gaam quyurrluci agayuniartuci elliiluci neqkamek ekuagiyarakun ATANERMUN.

²⁸Tuani ernermi caliyaqunaci, erneqngaku elliiyaram assiilnguut au͡gautekaatnun.

²⁹Kina imna yanrilkuni nereksaunani tuani ernermi yum'inek ancimaciquq.

³⁰Kina-llu imna calikan tuani ernermi, wiinga ATANEQ tuquciiqaqa.

³¹Camek calingaituci; una-llu picirkiutnguarkauluni akwarpak nunavcen̄i.

³²Atularniarci una erneq mernuinerciryaraqluku, yagyaraqluku-llu nereksaunaci akertem tevillranek qulngunritariitni iralum erenrin akertem tevillranun erenret qulngurutiitni.

³³“Malrunelgatni iralut akimiarureskata erenri, nerevkariyarauciquq Uqisvignun, aturarkauluku ernerni malrunlegni.

³⁵Taukut erenret ciuqliatni quyurrluci agayuniartuci, calivkenaci tuani ernermi.

³⁶Taukuni-llu ernerni elliilarniartuci unuaquaqan neqkanek ekualuki ATANERMUN. Cali-llu erenret taukut malrunelgatni quyurrluci agayuniartuci elliiluci neqkamek ekualuku ATANERMUN. Calivkenaci agayullerkaqerci tauna erneq.

³⁷“Maa-i makut agayunerpiit quyurrluci agayullerkaci, elliilararkauluci-llu ekualuki ekuagarkat elliitet, mukaarkat, wine-amek-llu pisqumataciicetun ernerkiuraitni.

³⁸Makut atularciqaci Sabbath-aat atulallerpeci elliiluci-llu pilallerpeci avatiitni wall'u akqillerpeciuggun cali-llu piyuumillerpeciuggun elliitevci ATANERMUN avatiitgun.

³⁹“Erenret akimiarurtellratni iralut malrunelgatni, quyurcimarikuvciki naugillri nunavci, nerevkaritii ATANREM aturniarci ernerni malrunlegni. Ciuqliat erenret nangneqliat-llu mernuinerciryaraqniarci.

⁴⁰Tuani-llu erenret ciuqliatni tegutniartuci assinritnek atsat napanek palm-at-llu avayaitnek cali-llu cuyalilriit napat avayaitnek, uqvigarnek-llu kuiget cen̄aitnek; nunaniryugniartuci ciuqerrani ATANREM Agayutevci ernerni malrunlegni.

⁴¹Atularciqerci nerevkaritnguluku ATANERMUN malrunlegni ernerni allrakumi iralut malrunelgatni, picirkiutnguarkauluni-llu akwarpak kinguverpecen̄un.

⁴²Tamarpeci-llu nutem Israel-aam yuini uqisvigni uitalarciquci malrunlegni ernerni,

⁴³kinguverpeci nallunritniaraat uitavkallrucimnek Israel-aam yui uqisvigni anutellemni Egypt-aamek. Wiinga ATANRUUNGA elpeci Agayutkarpecia.”

⁴⁴Moses-aam-llu nallunrircetai Israel-aam yuinun picirkiurutet agayunerpagnun, qigcikutnguarkat ATANERMUN.