Read Yupik Leviticus 24 Bible Online

Leviticus 24 - Yupik bible

Leviticus 24

¹ATANREM qanrutaa Moses-aaq,

²“Alerqurki Israel-aam yui makunek picirkiurutnek: Taiskici menuilngurmek olive-aat uquatnek Pelatekami kenurrat uqurkaatnek, nipeksaunateng kumalarniartut.

³Aaron-aam kumartelarciqai unuaquaqan atakumi, kumaarkauluteng unuakullranun ATANREM ciuqerrani, tuani elalirnerani capem, Akqutem Yaassiigan manulirnerani. Una-llu pisqutnguarkauluni akwarpak kinguverpecen̄un.

⁴Aaron-aam aulukuralarciqai kenurrat suulutaarrlainarmek ellimavilget kumaurtelluki piyaraitni ATANREM ciuqerrani.

⁵“Mukaanek piluci uspernek yuinaq cetamanek cipluku (24) kelipikici qula malrugnek cipluku amllertalrianek.

⁶Elliluki-llu malruinguluki itukluki arvinelguqa'aqluki estuulum suulutaarrlainaam qainganun.

⁷Tamakut-llu kelipat ellivikluki tepkegcilriamek aruvagkamek neqkauluku elliitnguvkarluku enairluki kelipat.

⁸Ernerni Sabbath-aani tamalkuitni Aaron-aam upluki ellirrlainalarciqai ciuqerranun ATANREM Israel-aam yui pitekluki. Waten piuralarciqut Israel-aam yui akwarpak.

⁹Taukut-llu kelipat Aaron-aam qetunrain-llu pik'larciqait nerlararkauluki kencignarqellriami, tauna neqkaq elliitngulleq tanqinruqapiaralriaqngatgu neqkat elliitngullret ATANERMUN, agayulirten̄un pikevkararkauluku.

¹⁰“Angucetangqellruuq Israelite-amek aanalegmek Egypt-aarmiumek ataluni. Tauna tuani uitavimeggni tarratellermini Israelite-aq-llu qancurlagatelliniuk. Qancurlagatellermegni-llu taum aniqlaagaa ATANEQ, taukut-llu ullaulluku Moses-aamun. Uum angutem aanii atengqellruuq Shelomith-aamek, pania Dibri-m, Dan-am yuulgutkelriarinek.

¹²Nayurcirluku-llu uitavkarluku niitnatkameggnun qaillun ATANERMUN pisqumacianek.”

¹³ATANREM-llu qanrutaa Moses-aaq,

¹⁴“Tauna aniqlaalleq nunanek anciu; tamakut-llu niitestekellri unateteng qamiqurranun piluki apervikuavkarluki pinarqutengqerrniluku, tamalkuitnun-llu yugnun teggalqunek miluquvkarluku tuqulluku.

¹⁵Qanrutniaten Israel-aam yui, kina imna aniqlaagilria Agayutmek assiilngumi anucimirqecetaarutkaanek aturciqniluku,

¹⁶tuqucimaarkauluni-llu. Israelite-aq wall'u allaneq uitalria Israel-aat nuniitni aniqlaagikuni atranek ATANREM tuqucimaarkauguq. Tamarmeng yuut teggalqunek miluquluku tuquciiqaat.

¹⁷“Kina imna yugmek tuqucilria tuqucimaarkauguq.

¹⁸Kina-llu tuqucikuni ungungssimek pikenrilkem̄inek cimiriarkauguq. Piciryaraqeciqerci tuqucilleq tuqutaqluku.

¹⁹“Kina ilaminek akngirkengkan, ayuqiinek tauna pimaarkauguq.

²⁰Kia enranek asemcilleq enra asemtarkauluku; iingirkengkan iingirrluku; keggutairkengkan-llu keggutairluku. Yuk-llu akngirkengkan ilaminek tuaten-llu tauna pimaarkauluni.

²¹Tuqucilria ungungssianek allam cimirarkauluku. Tau͡gaam tuqucilria yugmek tuqucimaarkauluni.

²²Tamalkurpecen̄un Israelite-anun tusngaarkauguq una alerquun, wall'u allanrulrianun nunavcen̄i, tua-i-wa wiinga ATANRUAMA elpeci Agayuteklua.”

²³Tua-i Moses-aam qalarutai Israel-aam yui. Tauna-llu aniqlaagilleq nunat elatiitnun anulluku teggalqunek miluquluku tuqulluku. Israel-aam yui tuaten pillruut ATANREM alerquutellra Moses-aamun aturluku.