Read Yupik Leviticus 4 Bible Online

Leviticus 4 - Yupik bible

Leviticus 4

¹ATANEQ-llu qanertuq Moses-aamun,

²“Qanruski Israel-aam yui: Kina imna pitsaqevkenani assiilngiqan aturluni ATANREM inerquutekellrinek,

³tauna assiilngilleq Agayulirten͞gunrukan yuut pinarqelriarurtelluki, tauna elliiciquq piyagarmek angucalumek natlugnerilngurmek ATANERMUN. Elliitekciqaa tauna assiilngillni pitekluku.

⁴Kuluvayagaq taitarkaugaa amiiganun Pelatekam, unatni-llu qamiqurranun elliluki tuqulluku tuani ciuqerrani ATANREM.

⁵Agayulirten͞guneq-llu augan iliinek piluni itruciiqaa Pelatekamun.

⁶Agayulirtem-llu tek'ni akurrluku augmun ciqertauciiqaa ciuqerranun kenciknarqelriim capkutam malrunlerqunek.

⁷Agayulirtem-llu ilii augem minguuciiqaa aruviarviim qaingan kangiraini anngalrianun Pelatekami, cipnera-llu auga kuluvayagaam kuvluku tusnganranun elliitnek ekuaviim amiigani Pelatekam uitalriim.

⁸Tuaken-llu angucalumek elliitngullermek au͡gauciiquq iluan uquanek tamalkuan

⁹tartuk-llu uqurtuumakenka tenguan-llu picalqurranek.

¹⁰Agayulirtem tauna uquq teguluku ekuaciqaa elliitngulriit ekuaviatni, ayuqluku ilakuyucimun tuqucimallermun uquanek pillermini.

¹¹Amia tau͡gaam angucalum ungungssiaraam tamalkuan-llu kemga, ilakluki qamiqurra, irui, qilui, iluani-llu uitalriit,

¹²tamalkuita ayauciiqai uitaviata elatiitnun menuilngurmun qamllernek ciqiciyaramun, tuani ekuagarkauluki muragnek murirluki.

¹³“Tamarmeng Israel-aam yui pitsaqevkenateng assiilngiqata, tamana-llu iirumaluni yugnek, aturluteng Agayutem inerquutellranek, pinarqutengluteng;

¹⁴assiilnguq atullrat nallunriumakan yuut elliigarkaugut angucaluyaarmek ungungssiarmek assiilngillermeggnun elliitekluku, tailluku-llu Pelatekaanun ATANREM tuanlucian.

¹⁵Ciulirnerita-llu yuut unateteng elliluki qamiqurranun tuani tuquciiqaat.

¹⁶Agayulirten͞gunrem-llu augan ilii itruciiqaa Pelatekamun,

¹⁷tek'ni-llu akurrluku augmun ciqertaulluku malrunlerqunek ciuqerrani capkutam.

¹⁸Ilii-llu augem minguulluku ekuaviim aruviarnek qaingan kangiraini anngalrianun Pelatekam iluani uitalriim.

¹⁹Tamalkuita-llu uqui au͡g'arluki kuluvayagarmek ekualuki ekuavigmi.

²⁰Tuaten piciqaa angucaluq ungungssiar, tuaten cali pillrucimitun kuluvayagaq elliitekumalleq assiilnguit pitekluki, ellait-llu au͡g'aricimaluteng.

²¹Ayautarkaugaa-llu agayulirtem kuluvayagaq elatiitnun uitavimeng ekualuku-llu ciuqlirmi kuluvayagarmun pillni aturluku. Yuut elliitekaat assiilngillermeggnun.

²²“Atanirturilria assiilngiqan, pitsaqevkenani narurciluni iliitnek ATANREM alerquutekellrinek atuusqevkenaki, pinarqutengluni,

²³nallunrirceskatni assiilngillranek, elliiciquq qusngirngalngurmek angucalumek natlugnerilngurmek.

²⁴Unatni-llu elliluki qamiqurranun tuquciiqaa ekuaviim ciuqerrani, ekuagarkanek tuquciviim nuniini; tauna assiilngillrem elliitekaa.

²⁵Agayulirtem-llu augem ilii elliitekumallrem assiilngurmun yuaramikun minguuciiqaa ekuaviim qaingani anngalrianun, kuvluku-llu ilakuani ekuaviim acianun.

²⁶Tamalkuita-llu uqui ekuagarkaugai ekuavigmi, tuaten pillrucirmitun uqui elliitngullrem ilakuyucimun; tuaten piluni agayulirta elliiciquq ekuagiluni atanirturilriim assiilngillra pitekluku, ellii-llu au͡g'aricimaarkauluni.

²⁷“Yuunginaat iliit assiilngiqan pitsaqevkenani narurciluni iliitnek pisqutkenrilkainek ATANREM, pinarqutengluni,

²⁸nallunrirceskatni assiilngillranek, elliiciquq qusngirngalngurmek arnacalumek natlugnerilngurmek.

²⁹Unatni-llu elliluki qamiqurranun tuquciiqaa neglirnerani ekuaviim, tuani ekuagarkat tuquciviatni.

³⁰Agayulirtem-llu augan iliinek tegulluni yuaramikun minguuciiqaa ekuaviim qaingan kangiraini anngalrianun, ilakuani-llu kuvluku ekuaviim acianun.

³¹Tamalkuita-llu uqui au͡g'ararkaugai, au͡gaumallruciicetun uqut ilakuyucimun elliitngullermek. Agayulirtem-llu ekuagarkaugai qaingani ekuaviim narnilivkarluku ATANEQ. Tuaten piluni agayulirta elliiciquq ekuagiluni taum angutem assiilngua pitekluku, ellii-llu au͡g'aricimaarkauluni.

³²“Yuk taiskuni qusngiyagarmek assiilnguminun elliitekaminek taiciiquq arnacalumek natlugnerilngurmek.

³³Unatni qamiqurranun elliluki tuquciiqaa elliitekani assiilngillerminun tuquciyaraatni ekuagarkanek elliitnek.

³⁴Tua-llu agayulirtem elliitngullrem augan ilii piluku yuaramikun minguuciiqaa ekuaviim qaingan kangiraini anngalrianun, ilakuani-llu kuvluku ekuaviim avatiinun.

³⁵Tamalkuan-llu uqua au͡g'arciqaa tuaten pillermitun uquinek qusngiyagaam ilakuyucimun elliitngullermun. Agayulirtem-llu ekuaciqai qaingani ekuaviim, ilaulluki elliitekumalrianun kenerkun ATANERMUN; tuaten piluni agayulirta elliiciquq ekuagiluni taum angutem assiilngua pitekluku. Ellii-llu au͡g'aricimaarkauluni.