Read Yupik Leviticus 7 Bible Online

Leviticus 7 - Yupik bible

Leviticus 7

¹“Una alerquuteka pinarqutellgem elliitekaanun kencignarqeqapigtuq.

²Tuqucivikelallermeggni ekuagarkanek elliitnek tuqutelarciqaat pinarqutellgem elliitii, auga-llu ciqertautarkauluku ekuaviim avatainun kassuggluku.

³Tamalkuan uqua au͡g'arluku elliitekumaarkauguq ekuavigmi, uqurilria pamyua qiluin-llu uquat,

⁴tartuk uqurtuumakenka tenguan-llu picalqurra.

⁵Agayulirtem ekuagarkaugai ekuavigmi elliitnguluki kenerkun ATANERMUN. Pinarqutengqellriim elliitekaa.

⁶Tamarmeng angutet agayulirten͞gulriit nerlarciqut tuaken, ner'arkauluteng-llu kencignarqelriim nuniini, tua-i-wa kencignarqeqapiaralriaruan.

⁷“Pinarqutengqellriamun elliin assiilnguum-llu au͡gautekaanun elliitngulleq ayuquk ataucimek alerquuterlutek.

⁸Agayulirtem-llu yuum ekuagarkaq taitellra ekuakuniu, taum amia elliin pikarkauluku.

⁹Tamalkuita-llu mukaarkat yuut elliitait uucimalriit kaminiakun, assigtatgun wall'u assalissuutekun, agayulirtem caliaqestellrata pikciqai.

¹⁰Tamarmeng-llu mukaarkat elliitet avumalriit uqumek wall'u avumanrilngermeng tamarmeng Aaron-aam qetunrain pitateku'urluteng avegciqait.

¹¹“Makut maa-i picirkiutnguarkaugut elliilrianun ilakuyucimun cikiutnguaqameng ATANERMUN.

¹²Yuum-llu elliitekekuniu quyassuutekluku Agayutmun tapirluku piciqaa ungungssiq ekuagarkaq elliitnek kelipanek quuleciramek avumanrilngurnek; aipaagnek piarkauluni mamtulriamek kelipamek piliaqumalriamek mukaamek uqumek avulegmek wall'u sugg'aliyaartun mamkilngurnek uqumek massliumaluteng, cake-aanek-llu mukaaqegtaar uqumek avuluku pilianek.

¹³Tamakunun ilakluku cali elliigarkauluni quulecirailngurnek kelipanek.

¹⁴Elliigarkauguq tamakut ayuqenrilnguut kelipat ilangartaarluki ATANERMUN; tamakut-llu pikarkauluki agayulirtem ciqrucillrem ungungssim auganek ekuaviim qacarneranun.

¹⁵Kemga-llu elliitekumallrem ilakuyucimun quyassuutekluku nerumaarkauluni tuani ernermi tuqucimallermini, ilii-llu ilakuarungaunani unuakutarkauluni.

¹⁶“Yuk-llu taiskan elliitekaminek akqutkellerminek wall'u piyuumiutminek elliikan, tamalkuan nerenrilngermi canrituq tuani ernermi elliitekumallermini, unuaquani-llu cali ilii neryugngaarkauluku.

¹⁷Tau͡gaam ilii cali uitakan erenret pingayuatni tauna ekuamaarkauguq.

¹⁸Kemgem ilii ilakuyucimun elliitekumallrem nerumakan erenret pingayuatni, elliitekestellra ciuniurumangaituq elliitekellra-llu catngungaunani elliinun; menuulriaruuq, kina-llu imna nerkuni tuaken pinarqutengqellriaruciquq.

¹⁹Kemek-llu agtuutellrukan camun menuulriamun nerumangaituq, ekuamaarkauluni tau͡gaam. “Tamarmeng menuircaumalriit kemegmek neryugngaluteng.

²⁰Tau͡gaam kina imna menuurcimaluni nerkuni kemganek elliitngullrem ilakuyucimun, Agayutem yuin ilakenrilkiicetun ayuqucimaarkaurciiquq.

²¹Kina-llu agtuutellrukuni menuulriamun, yugmek wall'u ungungssimek kingunelegmek, Agayutem yuin ilakenrilkiicetun ayuqucimaarkaurciiquq.”

²²ATANREM qanrutaa Moses-aaq,

²³“Qanruski Israel-aam yui: Ner'arkaunrituci uquitnek kuluviit, qusngit wall'u qusngirngalnguut.

²⁴Uqua ungungssim ellminek tuqullrem, uqua-llu ungungssim ungungssiullgutain tuqutellrata camun allamun atuuyugngauq, tau͡gaam nerumaarkauvkenani.

²⁵Kina imna nerelria uquanek ungungssim elliitekumallrem kenerkun ATANERMUN, Agayutem yuin ilakenrilkiicetun ayuqucimaarkaurciiquq.

²⁶Cali-llu ner'arkaunrituci augitnek yaqulget wall'u ungungssit nani uitallerpecen̄i.

²⁷Kina imna nerelria augmek Agayutem yuin ilakenrilkiicetun ayuqucimaarkaurciiquq.”

²⁸ATANREM qanrutaa Moses-aaq,

²⁹“Qanruski Israel-aam yui: Kina imna elliikuni ilakuyucimun ilii cali elliitekarkaugaa ATANERMUN.

³⁰Elliin ellminek taiciiqai ekualuki elliitekat ATANERMUN; uquq-llu qat'gagnun tapqulluku taiciiqaa, qat'gat elliitekesqelluki piciryarakun ATANERMUN.

³¹Agayulirtem ekuagarkaugaa uqua ekuavigmi tau͡gaam qat'gaa pikarkauluku Aaron-aam qetunrain-llu.

³²Tallirpilirneq kingulirneq irua ungungssim cikiutekarkaugan agayulirtem̄un.

³³Agayulirtem, elliitekestellrata ekualuki ungungssim auga qat'gai-llu ilakuyucimun elliitngullrem, pikciqaa tauna tallirpilirneq irua.

³⁴Qat'gai-wa ungungssim kingulirneq-llu tallirpilirneq irua elliitngullrem ilakuyucimun, wiinga tegullruagka Israel-aam yuinek cikiuteklukek-llu Aaron-aamun qetunrainun-llu; cikiutek'laasqellukek-llu ukuk Israel-aam yuinun agayulirten̄un akwarpak.

³⁵Ukuk waniwa allakaumauk Aaron-aamun qetunrainun-llu tuaken elliitngullermek ekualuku ATANERMUN; allakaumaluteng ellaitnun tuani ernermi nakmikumallermeggni kevgiurarkauluteng agayulirten͞guluteng.

³⁶Ernermi tuani minguumallratni ATANREM alerqurai Israel-aam yui taukugnek elliitngullrem ilagkenek cikilaasqelluki. Pisqun-llu una niisngaarkauluku Israel-aam yuin akwarpak.”

³⁷Ukut waniwa picirkiutnguut ekuagarkauluki elliitnun; mukaarkamun, assiilnguum au͡gautekaanun, pinarqut'legmun, agayulirciyaramun, ilakuyucimun-llu.

³⁸Makut ATANREM Moses-aamun alerquutekelqai Ingrimi Sinai-ami, tuani ernermi alerqullermini Israel-aam yui taicesqelluki elliitekaitnek ATANERMUN yuilquani Sinai-am.