Read Yupik Leviticus 8 Bible Online

Leviticus 8 - Yupik bible

Leviticus 8

¹ATANREM qanrutaa Moses-aaq,

²“Agusgu Aaron-aaq malikluki qetunrai, aturait, mingugcuun uquq, kuluvayagaq-llu elliitekaq assiilnguum au͡gautekaanun, malruk angucaluk, kalngak-llu imalek quulecirailngurmek kelipamek.

³Quyurtelluki-llu tamalkuita yuut amiigani Pelatekam Agayuviim.”

⁴Moses-aaq-llu piuq ATANREM alerquuciatun; yuut-llu quyurrluteng Pelatekam Agayuviim amiiganun.

⁵Moses-aam-llu qanrutai yuut, “Una waniwa ATANREM alerquutekelqaa pisqelluku.”

⁶Moses-aam-llu iluvaulluki Aaron-aaq qetunrai-llu mermek erurai.

⁷Aaron-aaq agayulirtem aturainek ac'etaa qukaa-llu nemerluku, as'arcen̄a'ar-llu[1] at'elluku as'arcen̄araam-llu naqugutiinek tupinqellriamek 'lumarrarmek naquggluku.

⁸Qat'gailitamek-llu ac'etraarluku eklukek Urim-aaq Thummim-aaq-llu[2] iluanun taum.

⁹Nacarluku-llu qamiqurranun nemrucaramek nacaan-llu manuanun elliluku suulutaaq tangnircaun, qigcignarqelria allakaumallran nallunailkutii.

¹⁰Moses-aam-llu uquq teguluku mingugaa Pelatekaa ATANREM iluanelnguut-llu tamalkuita. Tuaten piluni tamakut allakarai atuugarkaurtelluki ATANERMUN.

¹¹Ilii-llu ciqertaulluku ekuavigmun akluinun-llu malrunlerqunek. Ermigcuun cali-llu uitavia tuaten piluku, tua-i-wa allakarluki ATANERMUN.

¹²Ilii-llu cali kuvluku Aaron-aam qamiqurranun allakaumalriarurtelluku ATANREM caliaranun.

¹³Cali-llu Moses-aam Aaron-aam qetunrai tailluki ac'etai 'lumarrarnek naqugucirluki nacarluki-llu, ATANREM ellminun alerquutellra aturluku.

¹⁴Tua-i Moses-aam taitaa kuluvak assiilnguum au͡gautekaanun elliitekaq; Aaron-aam-llu qetunrain-llu unateteng elliit qamiqurranun kuluviim.

¹⁵Moses-aam-llu tuqutaa kuluvak, augan-llu iliinek piluni yuaramikun mingugai ekuaviim qaingan kangiraini anngalriit, tanqigcarluki, kuvluku-llu ilakuani auk ekuaviim acianun kencignarivkarluku menuircarluku-llu.

¹⁶Tegui-llu tamalkuita qiluin uqui, tenguan-llu picalqurra, tartuk-llu uqurtuumakenka. Tamakut Moses-aam ekuagai ekuavigmi.

¹⁷Tau͡gken kuluviim temii, amia, kemgi, qilui-llu, tamalkuita ekuagai kenerkun elatiitni nunat ATANREM alerqullruciatun Moses-aaq.

¹⁸Cali Moses-aam taitaa qusngim angucalua ekuagarkaq, Aaron-aam-llu qetunrain-llu elliluki unateteng qamiqurranun qusngim angucalum.

¹⁹Moses-aam-llu tuqulluku, ciqertaulluku-llu auga qacarnerinun ekuaviim.

²⁰Qusngim angucalua itumcimarian Moses-aam ekuagai qamiqurra natai-llu itumumalriit uqua-llu.

²¹Qilui-llu irui-llu mermek eruumariata Moses-aam ekuagaa tamalkuan qusngim angucalua ATANREM alerqullruciatun; ekualuku elliitnguluni tepii narniqluni ATANERMUN.

²²Tuamta-llu cali Moses-aam taitaa qusngim angucalum aipaa, agayulirtekat naaqitellratnun atuulria; Aaron-aam-llu qetunrain-llu unateteng elliluki qamiqurranun.

²³Moses-aam-llu tuqutaa, augan-llu ilii minguulluku tallirpilirnerem ciutiin nuuganun, tallirpilirnermun-llu ayautiinun, tallirpilirnermun-llu putukuanun.

²⁴Aaron-aam-llu qetunrai iluvaulluki Moses-aam mingugai augmek tallirpilirneret ciutaita nuugit, tallirpilirneret-llu ayautait, tallirpilirneret-llu putukuit. Ilii-llu ciqertaulluku ekuaviim avatiinun.

²⁵Uqua tegua uqurilria-llu pamyua, qiluin-llu uquat tenguan-llu picalqurra, tartuk-llu uqurtuumakenka, tallirpilirneq-llu kingulirneq irua;

²⁶issratem-llu iluanek tegulluni quulecirailngurnek allakaumalrianek ATANERMUN, ataucimek-llu cali kelipamek uqirluku pimalriamek, ataucimek-llu cali mamkilngurmek cake-aayaarmek. Taukut ellii qaingatnun uqut tallirpilirnerem-llu kingulirneran iruan.

²⁷Makut tamalkuita tunai Aaron-aamun qetunrainun-llu, ellaita-llu elliitekluki ATANERMUN.

²⁸Moses-aam-llu teguluki ellaitnek ekuagai ekuavigmi ilaulluki ekualuki elliitnun, naaqicimallrat pitekluku agayulirtet elliitnguluni, tepii narniqluni ATANERMUN.

²⁹Moses-aam-llu teguluku ungungssim qat'gaa elliitekaa ATANERMUN. Tauna-llu naaqiciyaramun elliitngullrem angucalum qusngim qat'gaa elliin Moses-aam pikarkauluku, tuaten ATANREM alerqullruciatun.

³⁰Moses-aaq tegulluni mingugcuutem uqum iliinek, augem-llu cali iliinek ekuaviim qainganelngurnek, ciqertarai tuaken Aaron-aaq, qetunrai aturait-llu, kencignarcarluki.

³¹Moses-aam-llu qanrutai Aaron-aaq qetunrai-llu, “Kenirci qallarvautelluki kemegmek, amiigani Pelatekam Agayuviim nerniartuci tuani tapirluci kelipamek issratem iluanek, imalegmek agayulirtet naaqicimallerkaatnun elliitekumalrianek ATANREM alerquutekellruciatun qanerluni, ‘Aaron-aam qetunrain-llu nerciqait.’

³²Ilakuartangqerqan kemegmek kelipamek-llu kenerkun ekuaniaci.

³³Amiiganek-llu Pelatekam Agayuviim natmun ayagyaqunaci malrunlegni ernerni naaqicimallerpeci erenri naanatkaatnun, erenret malrunelgen aturluki naaqicimaarkaungavci.

³⁴Unuamek makut caliaqelput ATANREM alerquutekellrui pisqelluki assiilngurpecen̄ek au͡g'aricimallerkarci pitekluku.

³⁵Amiigani Pelatekam Agayuviim uitaurciquci malrunlegni ernerni unugtuumaita, caliluci ATANREM alerquutekellrinek; tuaten pinrilkuvci tuquciquci. Tuaten wiinga ATANREM alerqullruanga.”

³⁶Tua-i Aaron-aam qetunrain-llu tamalkuita alerquutekumallret aturait ATANREM pisqutkellri Moses-aakun.