Read Yupik Jeremiah 10 Bible Online

Jeremiah 10 - Yupik bible

Jeremiah 10

¹Niiciu, Israel-aam yuini, qaneryaraq ATANREM qanrutkarkaa elpecen̄un.

²Waten qanertuq ATANEQ, “Yuita atanruviit allat piciryaraitnun maligucaqunaci, alingallauteksaqunaciki irr'inarqelriit pingraata qilagmi, allat atanruviit yuit alingallagangraata.

³Ukut yuut agayumaciat piciunrilan. Napa iqucimalartuq munalriit-llu nutaan yuut caliaqelaraat.

⁴Tangnircarluku qerrirlimek suulutaamek-llu. Ussukcaqutelaraat-llu pektesciigaliluku.

⁵Tamakut agayutngualiarit ayuqut yuguatun ellimalriatun naucetaarvigmun alingcirarautnguluni yaqulegnun; qanerciigatut; teguluku-llu tau͡gaam ayautelaraat. Alikenriciki tamakut: qaillun pisciigataiceci assilriamek-llu calisciiganateng.”

⁶ATANEQ, elpetun ayuqellriamek pitaituq; ucurnarqelriaruuten, atren-llu artuqailnguuguq.

⁷Kia qigcikenriciiqaaten, atanruvilget ATANRATNI? Tua-i qigcignarqelriaruavet, nunam yuin tamarmeng umyuartulriarini elpetun ayuqelriartailan wall'u angayuqritni.

⁸Tamakut tamarmeng umyugaitut usviinateng-llu. Camek eliciitqat muragnek agayutnguanek.

⁹Agayutnguarit qallircimaut qerrirlimek Tarshish-aamek suulutaamek-llu Uphaz-amek, munalriit suuluciiyurtet-llu piliaqait; aturait qesurcetellriaruut qesurliuluteng-llu; tamalkuita munalriit pilialqelluki.

¹⁰Tau͡gaam ATANEQ ellii piciulriaruuq Agayun, ellii unguvalriaruuq Agayun iquunani-llu Angayuqruluni. Eq'uqertaqan nuna uulegtelartuq, nunam-llu yuin eq'uqertellra uluryakaat. (

¹¹Waten cali qanruciiqaaten: Agayutet qiliim nunam-llu piliaqestekenrilkek piunrirciqut nunamek qiliim-llu acianek.)

¹²Ellii ATANEQ taunguuq piliaqestellra nunam pinimikun, piurcetellruluku ellarpak umyuartutacimikun, qiliit-llu cali pagaavet saggluki.

¹³Erinalkitaqan mer'et qilagmi[5] neplilartut; amirlut-llu nauvkalarai ellam iquinek. Kalluk kenerpallagavkalaraa ellalliraqan anuqa-llu taivkaraqluku qemaggviminek.

¹⁴Yuk tamarmi umyugaituq elisngaarunani; suuluciiyurtet kasngunarivkarait agayutngualiarita, tua-i yugualiarit caunrilameng anernerunateng-llu.

¹⁵Cakarniitut atuuvkenateng-llu; anucimirqecetaarumallermeng nalliini piunrirciqut.

¹⁶Ukutun ayuqenrituq Jacob-aam Agayutii; cat tamalkuita elliin piliaqellrui, cucukellruluki-llu Israel-aat elliin yuknaluki. Waniwa atra ATANEQ Artuqailnguq.

¹⁷Jerusalem-aam yuini, anguyiit avatairaiceci! Akluci quyurciki.

¹⁸Waten qanertuq ATANEQ: “Watua anteqataranka mat'um nunam yui, nanikuanaq-llu tuc'eciiqaqa ellaitnun, elpekesqelluku ellaitnun.”

¹⁹Jerusalem-aam yui qayagaut, Nakleng wangkutni akngiringiimta Kilineput aturniinateng. Umyuarteqellruyaaqukut wangkutni aturnarqelriarunayukluku!

²⁰Pelatekaqa piunrirtuq ilavkui kepumaluteng; Irniama unitaatnga; pelatekaqa civcestekairulluni iluani-llu capkutat ellistekaunateng.

²¹Tua-i-wa ciuliqagteput usviirucameng; ellatessurvikenritaat ATANEQ. Taumek piluaqallrunrilnguut, yuut-llu cekavvluteng.

²²Niiciu qanengssak! Atanruvik neglirnermi uptuq, anguyagtain nunarpai Judah-m yuiruciiqai, kaviarngalngurnun tau͡gaam uitauviksagutelluki.

²³ATANEQ, nallunritua yuum ciunerkani nallua, ellminek unguvanrilami kia ilamta tegumiaqenritaa unguvani.

²⁴Anucimirqecetaarnga ATANEQ, tau͡gaam pitalqeggiluku eq'urtellerpeni pivkenii, piunriryuarpenga.

²⁵Eq'urtellren tut'essgu atanruvignun nallustevnun yugnun-llu piicayuilngurnun elpenun. Tua-i yut'en tuquqngatki piunriqapigtellruit nunii-llu uitauviukaunrirluku.