Read Yupik Jeremiah 11 Bible Online

Jeremiah 11 - Yupik bible

Jeremiah 11

¹Qaneryaraq una taillruuq Jeremiah-mun ATANERMEK:

²“Niiciki aperyarai uum akqutem nutaan-llu qanrulluki Judah-m Jerusalem-aam-llu yui

³waten qanruciiqaaten, Waten qanertuq ATANEQ, Agayutii Israel-aam: Aniqlaamali kina imna niitenrilnguq akqutem uum qaillun atullerkaanek

⁴alerquutekelqa ciuliarpecen̄un anutellemni Egypt-aamek kaminiarpagtun ayuqellriamek, qanerlua, Niiciki qanellrenka, alerquutenka-llu tamalkuita aturluki. Elpeci wii yukniamci, elpeci-llu wii Agayuteklua

⁵piciurrnaurqa akqutkelqa ciuliavcen̄un cikirciqniluki nunamek assilriamek naungignarqellriamek-llu maa-i piksaguskiitnek.” Wiinga-llu kiugaqa, “Tua-i tuaten pikili ATANEQ.”

⁶ATANREM-llu qanrutaanga, “Qanrutkiki makut tamalkuita qaneryarat nunarpaini Judah-m, tumyaraini-llu Jerusalem-aam.

⁷Tua-i ilunglua aarcirtullruamki ciuliaci anutellemni Egypt-aamek, aarcirturluki taqsuariulluki, cali maa-i taqeksaunaki qanellrenka niisngasqelluki.

⁸Tau͡gken ellait niitenritut, tau͡gaam ciumuarluteng umyuarteng assiitellria aturluku. Taumek ellaitnun tuc'eskenka anucimirqecetaarutet akqutmi qanrutkumalriit, alerqullruyaaqngamki atuusqelluki, tau͡gken ellait tuaten pivkenateng.”

⁹Cali ATANEQ qanertuq wangnun, “Jerusalem-aam Judah-m-llu yuin ingluliraatnga.

¹⁰Ellaita uterrvikait assiilnguut ciuliameng atulallrit, taukut qaneryaramnek niicuumiitelallruameng; tau͡gaam allanun agayutnun cauluteng kevgiurnaluki; tamarmeng Judah-m Israel-aam-llu yuin navgaat akqun taqelqa ciuliarit ilakluki.

¹¹Taumek, waten qanertuq ATANEQ, wiinga assiitellria ellaitnun tuc'eciiqaqa anagciigalkiit; qayagaungraatnga-llu, niisngaitanka.

¹²Jerusalem-aam Judah-m-llu yui ayagciqut qayagaurluteng agayutnun aruviarnek ekuagivikelallermeggnun, tau͡gaam tamakut anirturciigatait picurlaumallratnek.

¹³Tua-i elpeci, Judah-m yuini, agayutengqerravci nunarpagpeci amllertataitnek, Jerusalem-aam-llu tumyaraicetun amllertalrianek ekuaviliuci elliivigkarpecen̄ek taumun uuminarqellriamun agayutmun Baal-amun.

¹⁴Taumek piicaucaqunaki ukut yuut, Jeremiah, wiinga niicugningailamki qayagaungraatnga picurlaumallermeggni.”

¹⁵ATANEQ qanertuq, “Camek piunarqucingqerrluni kenkekenka yuunka Agayuvimnun ityunarqeciqat, pellernarqelrianek atullrunge'rmeng? Anagnayukut-qaa picurlagmek akquurillermegteggun wall'u ekuagillermegteggun? Nutaan-llu-qaa angnirciquten?

¹⁶ATANREM caqerluni aterpagtellruaten, ‘Cungagcelnguq olive-aam napaanek, atsanek assilrianek naugiluni’; tau͡gaam watua kalluum ellanglluum nepiitun ekuavkarciqai, cuyai ayemqelluki-llu avayai.

¹⁷“Wiinga, ATANEQ Artuqailnguq, nauceciillruyaaqua Israel-aamek, Judah-mek-llu, tau͡gaam maa-i piunrirrarkaurtagka. Assiilnguq atuatgu eqcirlua ekuagiluteng agayutnguamun Baal-amun.”

¹⁸ATANREM nallunrircetaa inglukestem̄a picirkiurait wangnun.

¹⁹Wiinga-llu ayuqua maligtaqutellriatun qusngiyagartun ayaucimallertun tuqucimallerkaminun, nallullruaqa-llu assiilngurmek picirkiullratni wii pinricuklua, qanerluteng, “Napa iqutnaurput natlugneritellrani; tuqutnaurput yuut nalluyagutniaraat.”

²⁰Wiinga-llu piicagtua, “ATANEQ Artuqailnguq, piciulriakun cuqcilartuten; naspaalaraten yuut umyuaritgun, akinaurusnga ukunun yugnun, tua-i elpenun man'a caliaqesqelluku tun'aqa.”

²¹Taumek ATANEQ qanellruuq Anathoth-aam yui tuqungnaqesteten piluki, qanerluteng, “Qaneryaramek qalarpiiqnak ATANREM atrakun, tuqucuamteggen.”

²²Taumek waten qanertuq ATANEQ Artuqailnguq: “Wii anucimirqecetaarciqanka; ayagyuarit anguyagkun tuquciqut; irniarit-llu piitnakun piunrirluteng;

²³atauciunge'rmi unegngaituq. Pillerkiurumiimki Anathoth-aam yui, anucimirqecetaarumallerkaatnek.”