Read Yupik Jeremiah 12 Bible Online

Jeremiah 12 - Yupik bible

Jeremiah 12

¹“Elluarrluten elpet pilartuten, ATANEQ, qanemyuugautengramken; tau͡gaam cangayuuteka qanruteknaurqa elpenun, Ciin yuut assiileng'e'rmeng piluaqaralartat? Ciin-llu piciuvkenateng yuunge'rmeng piyullerteng unakelartatgu?

²Elpet naucecugaqavteng acilqunglartut naulartut atsangluteng-llu; Qanlaryaaqut canimegni uitaniluten, tau͡gken ircaqumegteggun yaaqsigluteng.

³Tau͡gaam, elpet ATANEQ, nallunritarpenga; tangvagan cauralqa wangnun-llu cakneq kenkucin. Qamurluki ayauski ukut yuut assiitellriit qusngitun tuqucimaarkatun; nayurluki-llu tuqucimallerkaat tekitellratnun.

⁴Qaillun taktalriamek nuna kinrumaqatarta, can'gi-llu nalaluteng? Ungungssiaraat yaqulget-llu tuquagut tua-i yuut assiiluciat pitekluku assiiluciat pitekluku, yuut-llu qanlalriit, ‘Agayutem callerput tangerciigataa.’”

⁵“Jeremiah, taqsuq'laquvet aqvautaqavet yugnek ilaluten, qaillun piyarcit horse-aat aqvauskuvki? Nunami-llu manigcetellriami paallagalaquvet, qaillun piyarcit Jordan-aam napaikun pulaluten pikuvet?

⁶Tua-i anelgutkeng'e'rpeteng, atavet yuin ingluksagutaatgen; quyurrluteng cangakuuraqluten; Ukveqsaqunaki taukut qanenqegcaarautengraatgen.”

⁷ATANEQ qanertuq, “Israel-aaq cakaaraqa; piyuumiirulluki cucukellrenka; kenkek'nganka tun'anka inglukestaitnun.

⁸Cucukellma yum'a caugaatnga yugtutulitun napat iluatni uirraniluteng wangnun; taumek eq'ukekenka.

⁹Cucukellrenka yuut yaqulegtun ayuqliriut qakurtaat avatairumakiicetun. Quyurrluki yuilqum ungungssii taisqiciki nerelriit ilalirniarait!

¹⁰Nunat allat atanirturtaita piunrirait wine-arkanek naucetaarviinka; tutmaulluki naucetaarviinka; nunauteka assilleq naugisciigalivkarluku.

¹¹Cakarniirutaat nuna; Nuna tamalkuan cangalliurpek'nateng-llu.

¹²Qertulriit qaingitgun mer'ilngurmi nunami piunririlriit taigut; ATANEQ ayagceciuq anguyagmek nunamun tamiin piunriisqelluku yuut uitanqegcisciigalivkarluki;

¹³Nauceciillruyaaqut mukaarkanek; tau͡gaam quyurciut cukilananek; elliinginaq taqsuqcirluteng ellmeggnek. Kasngukciqait quyurtelteng ATANREM eq'urrluni naugivkanrilateng.”

¹⁴Waten qanertuq ATANEQ, “Ukut Israel-aam yuin elaqliit piluki assiirutestai nunam Israel-aam yuinun cikiutekelqa, Wiinga naunrartun qecugciqanka nuniitnek, Judah-m-llu yui teguluki akunliitnek.

¹⁵Tau͡gaam qecuggaarluki nuniitnek takumcuyaguciiqanka, ataam-llu nunaitnun utertelluki.

¹⁶Umyuamegteggun cumiggluteng yum'a agayumaciat ciuniuqatgu ukvernarcariaqluteng atemkun waten, ATANEQ unguvaciatun, yuunka elicetellrucirmegcetun ukvernarcariyaurtelluki Baal-akun, yum'a ilaksaguciiqait callermegteggun-llu piluaqaralriarurrluteng.

¹⁷Tau͡gaam atanruviim yui niicunrilnguut nuniitnek qecugciqanka piunriqapiggluki-llu qanertuq ATANEQ.”