Read Yupik Jeremiah 13 Bible Online

Jeremiah 13 - Yupik bible

Jeremiah 13

¹Waten ATANEQ qanertuq wangnun, “Kipucartua 'lumarraagnek iluqliignek qerrulliignek all'ukek-llu; tau͡gaam mermun akurcaqunakek.”

²Tua-i kiputua all'ukek-llu ATANREM alerquuciatun.

³ATANREM-llu qanrutenqigtaanga,

⁴“Qerrulliik iluqliik kiputellregken atuqengagken Kuigmun Euphrates-aamun teggalqum qerranranun iiryarturkek.”

⁵Tua-i ayaglua iiryarturagka Euphrates-aam canianun, ATANREM alerquutellra aturluku.

⁶Erenret amlleret kinguatni ATANEQ qanertuq wangnun, “Nangerrluten, ayii Euphrates-aamun, aqvalukek iluqliik qerrulliik iiresqellregka tuavet.”

⁷Tua-i ayagtua Euphrates-aamun, taukuk-llu iluqliik qerulliik iirumaviak elagarluku teguagka. Maaten teguagka arullinilriik cakarniirullutek.

⁸Tuamta-llu cali ATANREM qanrutaanga qanerluni,

⁹“Waten qanertuq ATANEQ: Tuaten-llu wii Judah-rmiut Jerusalem-aarmiut-llu pivakellrat piunrirciqaqa.

¹⁰Ukut assiitellriit yuut, qaneryaranka niicuumiinaki ciumuarluteng, umyuarteng aturluku agayutnun-llu allanun cauluteng kevgiurnaluki agayuaqluteng-llu ellaitnun. Ukugtun qerrulliigtun ayuqliriciqut cakarniinateng.

¹¹Iluqliit qerrulliit engelqiutelauciigcetun yuum qukaani, tuaten-llu picirkiuraqellruyaaqaqa tamalkuitnun Israel-aam Judah-m-llu yui nepingasqelluki wangnun. Tuaten pillruunga wii yuknaluki ellaitgun-llu ucurnarisqelluku takarnariluku-llu atqa; tau͡gaam ellaita niicunritaatnga.”

¹²Uumek cali qanruciiqaten: Waten qanertuq ATANEQ, “Israel-aam Agayutii, Tamarmeng wine-at assigtait imiumaarkaugut wine-amek. Ellait-llu qanerciqut elpenun, Nallunritenritarput-qaa assigtat tamalkuita imangqerrarkauciitnek wine-amek?

¹³Waten qanruskiki, Wiinga, ATANEQ, imirciqanka tamalkuita yuut maani nunami taangiqviatnun: angayuqat aqumgalriit David-aam atanruviani aqumllermi, agayulirtet, prophet-aat, Jerusalem-aam-llu yui tamalkuita.

¹⁴Nutaan-llu mianikevkenaki kacguuruciiqanka assigtatun atakelriit qetunrait-llu, qanertuq ATANEQ. Takumcukngaitanka wall'u iliit uitasngaunaku wall'u naklegyagusngaunaki, pinricen̄arngaunaki.”

¹⁵Israel-aam yuini, ATANEQ qanertuq! Pivakevkenaci niicugniciu.

¹⁶Ucurnarivkarciu ATANEQ Agayutsi tan'germek taipailgan, paallagaluci-llu ingrini; tan'gercetqapigtellriarurpailgaku tanqik neryuniurutkellerci.

¹⁷Tau͡gaam elpet niicunrilkuvet, qiaciqua nalluvkarlua pivakellerci pitekluku; qiaciqua cakneq angniinii, aluviinka-llu qurrlurciqut, tua-i-wa ATANREM yui ayaucimiita teguarurrluteng.

¹⁸ATANREM qanrutaanga, “Qanrusgu angayuqaq aanii-llu atraasqellukek aqumllekegnek atanruviignek, tua-i-wa nasqerrutekek qamiqukegnek igcata.

¹⁹Nunat Judah-m ungalalirneranelnguut anguyiit kassugutait; yugnun ullagciigalivkarluki. Tamaq'apiarmeng-llu Judah-m yui teguarurrluteng.

²⁰“Ciuggluci tangerciki agiirtellriit negeqvamek. Nauwa yuut tunumallret elpenun aulukesqelluki?

²¹Camek qanerciqseci imkut yugniksukluki umyuartequtellerpeci cirlakekaci ataniurluci-llu? Nangteqciquci arnatun teggiurcilriatun.

²²Umyuarpeciuggun waten qanquvci, ‘Ciin makut wangkutnun tut'at?’ Assiilngurpeci angtaciat pitekluku tuaten pimauci aturaci allguumaluteng, akusrarutekumaluci, nangcimaluci-llu.

²³Yuum-qaa amimi ayuqucia cimiryugngaa, ungungssim-llu kukupalgem kukupani? Tuaten piyugngakagnek, elpeci-llu assiilngurmek caliuratulini elicartuci assilriim atullerkaanek.

²⁴Cekavciiqamci carangllugtun tengeskiitun anuqem tailriim nunam mer'ilnguum tungiinek.

²⁵Una waniwa ciunerkaqerci, waten piarkaurtellruamci, qanertuq ATANEQ, nalluyagutellruavcia cacetuqucirluci-llu piciunrilngurnun.

²⁶Wiinga matarciiqamci kasnguyugtelluci.

²⁷Tangvalaranka pellernarqelrialiaci. Agayutngualiluci qertulriani carr'ilngurni-llu angutetun aglumalriatun nunalgutmi nulirranek, wall'u ungungssiartun arnacaliqellriatun. Nakleng, elpeci Jerusalem-aam yuini! Qaku menuirutqatarceci?”