Read Yupik Jeremiah 14 Bible Online

Jeremiah 14 - Yupik bible

Jeremiah 14

¹ATANEQ qanertuq Jeremiah-mun nunam kinernerurtellerkaanek.

²“Judah tuquilriatun angniituq; nuna naugisciigalian; yui nunami inangqaluteng ciinlluguaraut angniinateng, Jerusalem-aaq-llu qayagaurtuq ikayuusqelluni.

³Yuut tukuulriit pisteteng ellimerrait mertaasqelluki; merviit paqcaaqait tau͡gaam mermek imaitut; kasnguyugluteng cacirkaunateng qamiquteng patuluki.

⁴Tua-i-wa nuna kinran ellalliqsailan tamaani, nauceciiyurtet-llu caamiilameng qamiquteng patuluki.

⁵Tuntuungermi carr'ilqani irniateng qelkenritait, canegtailan.

⁶Yuilqurmiutaat-llu ciulviit qertulriit qaingitni nangengqaut anerteksaarluteng kaviarngalngurcetun; meciirulluteng neqkairucameng.

⁷Wiinga yum'a qayagauraatnga, ‘Assiilngumta assiilucirput nallunaingraaku, ikayurkut, ATANEQ, akqellrucirpetun. Avtelartukut elpenek amllerqunek; assiilngiraqluta elpenun.

⁸Israel-aam neryuniurutiini, anirturtiini picurlaumallrata nalliini, ciin nunami maani allanertun ayuqeqatarcit, pektaulriatun qavartaqalriatun unugmi ataucimi?

⁹Ciin-llu angutetun ayuqeciqsit ayuquciilngurtun, wall'u artuqailngurtun angutetun anirturisciigalngurtun? Tau͡gken, elpet, ATANEQ, akunlemten̄i uitauten! Wangkuta-llu aterpegun aterpagcimaluta: unicaqunakut.’”

¹⁰ATANEQ waten qanertuq ukut yuut piluki: “Ayagayunqegtut qimaglua, ellmeggnek-llu nuqingasciigatut; taumek ATANREM ciuniunrilkai, neq'erciqai-llu iqlumek calillrat anucimirqecetaarluki-llu assiilnguit pitekluki.”

¹¹ATANEQ qanertuq wangnun: “Piicaucaqunaki ukut yuut elluarrluki pisqelluki.

¹²Yagluteng piicangraata niisngaitaqa, elliingraata-llu ekuagarkanek elliitait ciuniurngaitanka; anguyagkun, piitnakun, cangerlagteggun-llu piunrirceciiqanka.”

¹³Tua-llu wii qanertua, “Aren, ATANEQ Agayun, prophet-aat yut'en waten qanrut'larait, ‘Tangerrngaituci anguyalrianek, wall'u piitnamek, tau͡gaam wii uitanqegcivkarciqamci wani nunami.’”

¹⁴ATANEQ-llu wangnun qanertuq: “Prophet-aat tekitarkanek qalartut iqluurluteng atqa aturluku; wiinga ayagcetellrunritanka, alerqullruvkenaki wall'u qalarutellruvkenaki. Taukut qalartut iqluurluteng nasvicimaniluteng, iqluurutnek ellaita umyuangutmeggnek.

¹⁵Taumek waten qanertuq ATANEQ elliin at'mikun ayagcetellrunrilengraateng, qanerluteng, ‘Anguyagngaitut piitnaq-llu tusngaunani maavet nunamun’: Anguyagkun piitnakun-llu tamakut prophet-aat piunriumaciqut.

¹⁶Yuut-llu prophet-aat qalarut'lallrit egcimaciqut Jerusalem-aam tumyarainun, pitaqeciqai piitnam, anguyiim-llu, kitumek-llu tungmagtestekaunateng ellait, nulirrit, irniarit-llu. Wiinga tuc'eciiqaqa assiiluciat ellaitnun.

¹⁷“Uumek cali qanruciiqaten: ‘Iigka qurrlurlik aluvimnek unugpak ernerpak-llu, arulaiqsaunatek, tua-i-wa yum'a paniat angutem agtuqsailkii kilirpaumiin akngiringaluni.

¹⁸Yuilqumun ayagaqama, anguyiit tuqutellrita temaitnek tangaalartua; Nunarpagnun-llu itraqama, yuut tanglaranka paluqatalriit! Prophet-aat agayulirtet-llu caliarteng caliaqelaraat, nunani tamaitni, tau͡gken caliarteng nalluluku.’”

¹⁹ATANEQ, tua-i-qaa cakaaqapigtan Judah? Uumikaten-qaa Judah-m yui? Ciin makut tuc'eciki wangkutnun qaillun mamisciiganata? Wangkuta uitanqegcillerkamten̄ek yuaryaaqukut, tau͡gaam ca assilria pinrituq; neryuniuryaaqukut mamcimallerkamten̄ek, alingnarqelria tau͡gaam tekituq.

²⁰Assiilucirput apervikuatekaput, ATANEQ, ciuliamta-llu assiilnguit, assiilngillruamta elpenun.

²¹Umyuaqluki akquteten caunrilleksaqunakut; Jerusalem-aaq kiaresngianarivkaryaqunaku, atanruviim aqumllerpet uitavikngaku. Akqutkelten-llu pinricen̄aryaqunaki.

²²Agayutnguarita iliita ellallircecesciigataa; qiliit-llu cali ellmeggnek ellallirciiganateng. Elpenek tau͡gaam neryuniurutengqertukut, ATANEQ Agayutemta, elpet tau͡gaam makut pivkalaavki.