Read Yupik Jeremiah 15 Bible Online

Jeremiah 15 - Yupik bible

Jeremiah 15

¹ATANEQ-llu wangnun qanertuq, Moses-aankuk Samuel-aaq-llu nangengqangraagnek ciuqamni, ukut yuut takumcuksanritanka. Ciuqamnek au͡g'arluki ayagceski!

²Waten apeskatgen, “Natmun ayagciqseta?” qanruciiqaten, Waten qanertuq ATANEQ: Cangerlagkun tuqullerkameggnek ciunerkangqellriit, tuavet ayagciqut! Anguyagkun-llu tuqullerkameggnek ciunerkangqellriit, tuavet ayagciqut! Cali-llu teguarurtellerkameggnun ayagciqut! Cali-llu teguarurtellerkameggnek ciunerkalget teguarurtellerkameggnun ayagciqut!

³Wiinga-llu taquciiqua cetamanek piunrirtekaitnek, qanertuq ATANEQ: nuussirpagmek tuqutestekaatnek, qimugten̄ek allgurtekaitnek, yaqulegnek ungungssiarnek-llu nerestekaitnek piunrirluki.

⁴Alingnarivkarciqanka tamalkuitnun nunam yuinun Hezekiah-m, Manasseh-m qetunraan, Jerusalem-aami pillra pitekluku Judah-mi angayuqrullermini.

⁵ATANEQ qanertuq, “Kia takumcukqatartaci, Jerusalem-aam yuini, kia-llu angniilutekciqaci? Kia-llu arulairvikluci qaritekciqaci apqaurnaluci qaillun ayuqucirpecen̄ek?

⁶Elpeci cakaallruarpecia kingutmun-llu tau͡gaam ayagluci. Taumek wiinga piniqa aturluku piunrirciqamci; eq'urtelqa nuqingalnguamku.

⁷Nunam nunarraini tamaitni anuqmun tengcetamci canegtun, piunrirluci elpeci wii yumni, tuqulluki irniaci taqenrilavci assiilngurmek caliarpecen̄ek.

⁸Aipainret amllenrurtut nunavcen̄i qau͡gyami imarpiim cen̄iinelngurmi. Ayagyualriaci tuqutanka segganqellrata nalliini aanait nangteqevkarluki. Alqunaq nangteqnarqelria umyuiqnarqelria-llu ellaitnun tut'elluku.

⁹Arnaq malrunlegnek irniangqelleq taukut tuquata naulluqertuq, aneryaarciiganani. Tanqik elliinun tan'gerurtuq; ellminek kasnguksagutuq umyuaminek nangteqluni. Elpeci cali unguvalriani tuquceciiqamci inglukestevcen̄un. ATANEQ qanertuq.”

¹⁰Nakleng wiinga, aanaa, yuurcetellrukevnga, qanemyuugautekaurtellua nakukutarkaurtellua-llu tamalkuitnun nunam yuinun. Wiinga navriskengeksaitua navraqsauni-llu tau͡gken yuut aniqlaalaraatnga.

¹¹Aniqlaatait piciureskilit wangnun elluarrlua kevgaullrunrilkuma elpenun, piicauteksailkumki-llu inglukestenka elpenun picurlaumallratni.

¹²(Kina imna navgurisciigatuq cavigmek, arcaqerluku cavik neglirnermek taicimalria punernermek avumalria.)

¹³ATANEQ qanertuq wangnun, “Isnglukesteci ayagceciiqanka uayaasqelluci tukuutevcen̄ek, yum'a-llu qununarqelriit qemangqaaritnek, anucimirqecetaarutekluki assiilngurpecen̄un atullerpecen̄un nunavcen̄i tamiin.

¹⁴Kevgaurceciiqamci inglukestevcen̄un nunami nallukevcen̄i, tua-i eq'urtelqa kenruan akwanun-llu nipngaunani.”

¹⁵Wiinga-llu qanertua, “ATANEQ elpet ca tamalkuan nallunritan. Neq'akia ikayurlua-llu. Akinaurusnga nangtestemnek. Ilangciksaunaki uitasngiinallerpegun tuququrainaryuaraatnga. Umyuaqiu caunrilkumaciqa elpet pitekluten.

¹⁶Elpet qanllerpeni wangnun niicugnillruaqa qanellren tamalkuan, qaneryaraten-llu angniuteksagutanka; nunaniksagulluki-llu umyuamkun; tua-i wiinga yukngavnga, ATANEQ Agayun Artuqailnguq.

¹⁷Ilaliqsaitanka anglaningnaqelriit, nunaniryullgucirpek'naki-llu. Alerquucirpetun kiima uitaurallruunga umyuaqa tau͡gaam assirpek'nani.

¹⁸Ciin wiinga nangteqenrirciigacia, kilinrenka assirisciigatat mamesciiganateng-llu? Qacuvallagcetnalua-qaa piarpenga kuiggartun meriutellriatun kiagmi?”

¹⁹Taumek waten qanertuq ATANEQ, “Ut'reskuvet ciuniurciqamken, pisteksagulluten ataam. Qalareskuvet piugarkanek, caunrilngurnek qalartevkenak, ataam qanerteksaguciiqamken. Yuut ellmeggnek ullalangciqaatgen, elpet ullanrilngerpeteng.

²⁰Punernermek casgutun ellaitnun ayuqlirivkarciqamken. Inglulirtung'e'rmegteggen cirlakngaitaatgen, tua-i wiinga nayurciqngamken anirtuumaluten aviucuumaluten-llu.

²¹Aviuciiqamken piniatnek assiitellriit yuut, anirturluten-llu mulngailngurnek yugnek.”