Read Yupik Jeremiah 16 Bible Online

Jeremiah 16 - Yupik bible

Jeremiah 16

¹Cali ATANREM qanrutaanga waten.

²“Nulirturyaqunak irniangluten-llu maani.

³Waten ATANREM qanrutkai mikelnguut maani yuurtellret aanait atait-llu maanelnguut nunami,

⁴tuqunarqelrianek naulluuluteng tuquciqut. Qiatekumangaitut tungmagcimangaunateng-llu; temait ciqitartun ayuqeciqut nunam qaingani. Anguyagkun tuqucimaciqut piitnakun-llu, temait-llu neqkautekciqait ellam yaqulgin nunam-llu ungungssiin.

⁵“Iteryaqunaci tuquilriit uitaviatnun, qiatekngaunaki-llu ukut; uitanqegcitka au͡g'allruamku ukunek pektayiilnguq-llu kenkutka naklekuteka-llu.

⁶Tukuunge'rmeng arrsaungermeng-llu maani nunami; tungmagcimangaitut, qiatekumangaunateng-llu. Kina-llu imna ellminek kilirturngaunani nuyani-llu qiurluki ukut yuut pitekluki.

⁷Ilavci-llu nerellgucirngaitai tuquillret, takumcuyugngaunani angayuqairutellriarurtengraan.

⁸“Iterngaituci nerevkarilrianun ilalirluki nernaluci.

⁹Tua-i tuaten qanertuq ATANEQ Artuqailnguq, Israel-aam Agayutii. Arulairceciiqanka elpecen̄un tangvagtelluki maa-i nallevcen̄i nepait angnilriit nunaniryulriit-llu, cali-llu nepait angnirnarqelriit kassuutaqameng.

¹⁰“Qanruskuvteng ukut yuut makunek tamalkuitnek, tua-i-llu qanqata waten elpenun, ‘Ciin ATANREM makut nangteqnarqelriit tuc'etaki wangkutnun? Camek assiilngillruceta? Qaillun ayuqellriamek assiilngirceta ATANERMUN Agayutemten̄un?’

¹¹Elpet waten qanruciiqaten ATANEQ qanerniluku, ‘Tua-i ciuliarpeci cakaallruatnga avvluteng allanun agayutnun alerquutenka-llu aturpek'naki.

¹²Elpeci-llu arcaqanruluci ciuliarpecen̄i ciumuarluci umyuarci aturarci niicugniyuumiinii wiinga.

¹³Taumek nunamek maaken ayagceciiqamci nunamun elpeci ciuliarpeci-llu nallukiitnun. Nutaan kevgiurniartuci allanun agayutnun ernerpak unugpak-llu. Wiinga-llu takumcukngailamci.’”

¹⁴ATANEQ qanertuq “Pillerkaq tekiciiquq ukvernarcarinanrillerkaat unguvalriim Agayutem atrakun anucestellrata yuin Egypt-aamek.

¹⁵Tau͡gaam ukvernarcarilangciqut unguvalriim Agayutem atrakun ancillrem Israel-aam yuinek neglirnermek nunanek, nunanek-llu allanek wii cekavtellemnek. Ut'ruciiqanka ataam nakmiin nunaitnun, nunamun cikiuteklemnun ciuliaritnun.”

¹⁶ATANEQ qanertuq, “Ayagceciqatartua amllernek neqsurten̄ek yuut cangtaqesqelluki. Kinguatgun-llu cali ayagceciciqua amllernek pissurten̄ek pissuusqelluki ukut ingrit qemit-llu qaingatnek qerranerni-llu teggalqut akuliitni.

¹⁷Tangviimku caurallrat tamiin; iirciigalameng wangnek, assiilngiraqata-llu wii tangvalaranka.

¹⁸Wiinga akilirceciiqanka malrurqugnek pinruluku, assiilnguit inerciigaluciat-llu pitekluku, tua-i-wa nunaka assiirucatgu agayutnguamegteggun anernerilngurteggun tuqumalriit temaicetun, amllerivkarluki agayutnguateng nunamni.”

¹⁹ATANEQ, qaunqestekamken piniutekluten-llu; ikayulararpenga arenqiallugtaqama. Atanruviit yuita ullagciqaatgen ellam iquanek qanerluteng-llu, “Wangkuta ciuliaput agayutnguanek catngunrilngurnek pingqellruut, agayutnguat camun ikayuutnguvkenateng.

²⁰Yuut-qaa piliyugngaut agayutkameggnek? Qang'a, tuaten pikuneng, tamakut agayutngungaitut.”

²¹ATANEQ qanertuq, “Taumek pinqigviirulluku ataucirqumek nallunrirceciiqanka atanruvillgutkelriit pinimnek artuqailucimnek-llu; nallunriciiqaat wiinga ATANRUCIQA.”