Read Yupik Jeremiah 17 Bible Online

Jeremiah 17 - Yupik bible

Jeremiah 17

¹ATANEQ qanertuq, “Judah-m assiilngua igausngauq cavigkun igarcuutekun; ircaqruitnun-llu igausngaluni, ekuaviita-llu kangiraitnun igarcuutekun diamond-aamek nuulegkun.

²Irniarit agayulartut agayutnguamun Asherah-mun, napat cungagcelnguut caniitni, qemit-llu qaingitni,

³ingrit-llu qaingitni, canek-llu naumalriartailngurmi nunami. Tukuuceci qunukek'ngaci-llu cikiutekciqanka inglukestevcen̄un assiilngurpecen̄un akiliutekevkarluki nunavcen̄i tamiin.

⁴Pegtarkaugaci nuna elpecen̄un cikiutekelqa, kevgaurceciiqamci inglukestevcen̄un nunami nallukevcen̄i, tua-i wii eq'urtelqa ayuqngan kenertun nipesciigalngurtun.”

⁵Waten qanertuq ATANEQ, Aniqlaamauq kina imna wangnek avtellria cacetuqutekiluni-llu tuquarkaulrianek yugnek.

⁶Napayaartun ayuquq naumalriatun mer'ilngurmi nunami, tuani cam assilriim tekisngaitaa. Uitaciquq kinreskaini nunani yuilqumi, camek naumalriartailngurmi taryulegmi nunami. Tangerrngaunani-llu camek assilriamek piurtellriamek.

⁷Atawaqertuq yuk cacetuqutengqellria ATANERMEK.

⁸Napatun ayuquq naumalriatun mer'em caniani acilqurluni kuigem cen̄iini, alingyuituq puqlerpangraan, cuyani cungagcequralaata; nanikuayuunani allrakuni ellalliyuilngurni atsangqenriyuilami.

⁹Yuum ircaqrua taringumasciigatuq iqlungaqapigcami assiitqapiggluni-llu.

¹⁰Wiinga, ATANEQ, yuum umyugaa yuvrila'arqa naspagaqluku-llu ircaqrua. Akilirarkauluku yuk ayuqucia caliara-llu cuqluku.

¹¹Yaqulegtun quyurcilriatun piyagarnek tukercetenritlerminek. Tuaten ayuquq tukuurtellria elluanrilnguq aturluku ayagyuarluni cairuciiquq, iquani-llu usviirulluni.

¹²Agayuvigpagput ayuquq ucurnarqelriatun angayuqam aqumlleratun, ayagniqarraamek nangerngaluni qertulriim ingrim kangrani.

¹³ATANEQ, neryuniurutii Israel-aam; tamarmeng cakaarteten kasnguyugcecimaciqut; Catairuciiqut yuum atratun igausngallertun urr'ami, tua-i-wa cakaaratgen, ATANEQ, ulvelria unguvanarqelriamek mermek.

¹⁴Canrircessnga, ATANEQ, apquciirutnaurtua; anirturnga ilumun anirtuumaniartua; elpet wii nanrarciqamken!

¹⁵Yuut qanertut wangnun, “Nauwa-mi tamakut akeqnerrlugutai ATANREM? Taivkarliki wangkutnun!”

¹⁶Wiinga kiikirtuqsaitamken assiitellria taivkaasqelluku ellaitnun; piyuumiutekeksaitaqa arenqiallugnaq ellaitnun pisqelluku. ATANEQ, elpet nallunritan man'a; qanelqa tamalkuan nallunritan.

¹⁷Uluryanaqsaqunak wangnun; tua-i wii qimagvik'laamken erucecurlagaqanga.

¹⁸Kasngunarqelria tut'essgu nangtestemnun, wangnun pivkarpek'naku. Uluryanarqelria tut'elluku ellaitnun wangnun pivkarpek'naku; piunrirki caunrirluki.

¹⁹ATANEQ qanertuq wangnun, “Jeremiah, ayagluten nangerngayartuq Yuut lteryaraatni, angayuqrin Judah-m iteryaraatgun anyaraatgun-llu; allanun-llu Jerusalem-aam amiiginun.

²⁰Waten-llu qanerluten: ‘Niiciu qaneryaraa ATANREM, angayuqrulriani Judah-mi, tamarpeci-llu Jerusalem-aam yuini, it'lalriani makutgun amigteggun.

²¹Waten qanertuq ATANEQ: Murilkici unguvayukuvci, ayagaciyaqunaci canek Sabbath-aami; wall'u camek itruciyaqunaci Jerusalem-aam iteryaraikun.

²²Cali-llu camek anuciyaqunaci enevcen̄ek, caliyaqunaci-llu Sabbath-aami.

²³Tau͡gaam ellait niicunritut, asvairutut tau͡gaam; ayuqucirtuuteka ciuniuryuumiinaku.’”

²⁴ATANEQ qanertuq, “Tau͡gaam elpeci niiskuvcia camek itruciksaunaci ukunun nunarpagnun Sabbath-aami, caliksaunaci-llu qigcikluku Sabbath-aaq,

²⁵nutaan it'larciqut ukutgun amiigteggun angayuqat David-aam atanruviani aqumllermi aqumgalalriit, ayagaluteng ayagassuucetgun akalrialegteggun, horse-aatgun-llu, angayuqat atanerruartuumarmeng, Judah-m-llu yui Jerusalem-aam-llu; nunarpak-llu una yuicuiruciiquq.

²⁶Yuut-llu tailarciqut nunarpainek Judah-m, nunanek-llu avatiinelngurnek Jerusalem-aam, nuniinek Benjamin-aam, Shephelah-mek-llu, qemililriamek-llu nunamek, Negeb-aamek-llu, tailluteng elliitnek ekuagarkanek, mukaarkanek-llu elliitnek, frankincense-aamek-llu, tailluteng-llu quyatnek elliitnek Agayuvigpagmun.

²⁷Tau͡gaam niitenrilkuvcia Sabbath-aaq qigcikevkenaku, camek-llu itrucisqenritelqa amiigikun Jerusalem-aam Sabbath-aami, nutaan wiinga kumarciciqua kenermek tamaani amiigni, kenrem-llu ekuaciqai angayuqat enait Jerusalem-aami, keneq-llu nipcimangaunani.”