Read Yupik Jeremiah 18 Bible Online

Jeremiah 18 - Yupik bible

Jeremiah 18

¹ATANEQ qanertuq wangnun,

²“Nangerrluteng, atraa qikuliurtem eniinun, tuani qanerkaqa elpenun qanrutkeciqaqa.”

³Tua-i atrartua qikuliurtem eniinun, maaten itertua qikuliurta caliuralria calivimini.

⁴Assigtaq-llu qikumek piliani picurlagaqamiu allaurrluku taq'laraa elliin piunaklermikun.

⁵ATANREM cali qanrutaanga,

⁶“Israel-aam yuini, wiinga-llu uum qikuliurtem pillratun piugngaunga. Qikutun qikuliurtem caliaqekiitun unatmikun, tuaten-llu tua-i elpeci ayuquci wii unatemni.

⁷Cat iliitni qanellrukuma atanruvik wall'u angayuqauvik navgurciqniluku piunrirluku-llu,

⁸tau͡gken tauna angayuqauvik tuigeskan assiilngurtullerminek, tuaten piarkauyaaqelqa pinricen̄arciqaqa.

⁹Tau͡gken cali aipaagni, qanquma atanruvigmek angayuqauvigmek-llu nauciqatarnilua,

¹⁰tau͡gken tauna angayuqauvik assiilngurmek atuqan, qanelqa niicugpek'naku, wiinga pinricen̄arciqaqa assilria caliaqeqataryaaqelqa taukunun.

¹¹Taumek watua qanruski Judah-m, Jerusalem-aam-llu yui: ‘Waten qanertuq ATANEQ, wiinga picirkiurtua piarkamnek elpecen̄un uplua-llu anucimirqecetaarnaluci. Umyualinqigci assiilngurmek ayuqucirpecen̄ek tamarpeci, assiilngurkun ciumurtellerpecen̄ek, ayuqucilinqiggluci-llu caliarpeciuggun.’

¹²Tau͡gaam qanertut, ‘Qang'a, ciin-kiq tuaten piyarceta? Tamamta piullemcetun asvaiciiqukut assiilnguq-llu aturluku piyullemteggun.’”

¹³ATANEQ waten qanertuq, “Apciki atanruviit tamalkuita waten ayuqellria pillrucianek mat'um ciungani. Israel-aam yui assiitqapigtellriamek pillruut!

¹⁴Lebanon-aam-qaa ingrii iliini qanikcartaitelartut? Ingrinek-qaa carvat mermek kumlalngurmek qurrlulriit kinlartut?

¹⁵Wiinga yum'a nalluyagutaatnga; aruviaralartut tepkegcilrianek agayutnguanun. Paallagalartut tumemeggni; ak'allaat piciryarat maligtaqunrirait; piyualartut apertuumanrilngurteggun tumyaratgun.

¹⁶Nuna man'a qessananariat, caunrilkumaarkaurtelluku akwarpak. Tamaaggun kitulriit cakneq qessanayugciqut; qamiquteng ungaulugciiqait tangelteng ukveqesciiganaki.

¹⁷Cekavceciiqanka yuunka inglukestaita ciuqerratnun, urr'atun calaramek anuqem tengeskiitun. Tunuciiqanka; ikayurngaitanka arenqialluguterpak tekiskan.”

¹⁸Tua-llu yuut qanertut, “Qaillukuaqernaurput una Jeremiah! Agayulirten̄ek elitnauristengqerrlainarciqukut, umyuartulriit-wa ayuqucirturtekaput, prophet-aanek-llu Agayun wangkutnun qanertekarluni. Tailuci picetaarucarturnaurput qalartengraan niitnanrirniarput.”

¹⁹Tua-i piicagtua, “ATANEQ, niiski qanellrenka, niilluki-llu inglukestem̄a qalartellrit wii pilua.

²⁰Assiitellriamek-qaa akiliutengqerciquq assilria? Tau͡gken ukut yuut elagtut petmigmek tuqutnalua. Umyuaqiu ciuqerpenun tailalqa anagyaaqucarturluki elpenun, eq'urtellren ellaitnun tut'esqevkenaku.

²¹Watua tau͡gaam, ATANEQ, irniarit paluluki tuquavkarki; anguyagnun tuqurkevkarki. Nulirrit uingiuteski irniariulluki-llu; angucet naulluutetgun ciissitgun tuquvkarki, yun'erraat-llu anguyagkun tuqucimaluteng.

²²Alingnarqellriit yugyagluki ayagteski enait uayaryarturluki camek nalluinanratni; neplirceski nanikualuki. Elallruut petmigmek igvigkamnek neganek-llu civciluteng pitangqengnaqlua.

²³Tau͡gaam, elpet ATANEQ, picirkiurait tuqungnaqlua tamalkuita nallunritaten. Au͡g'aricaqunaki picurlaumallratnek, assiilnguitnek-llu au͡g'aricaqunaki. Iquavkarki cirliqevkarluki caliaqekiki-llu qenertenrirpailegpet.”