Read Yupik Jeremiah 19 Bible Online

Jeremiah 19 - Yupik bible

Jeremiah 19

¹ATANEQ qanertuq Jeremiah-mun, Kipucartua qikuliurtem̄ek qikumek assigtamek, malilirluten yuut tegganrita ilaitnek agayulirten̄ek-llu ak'anun agayulirten͞gullernek,

²anluten-llu Potsherd Gate-akun Hinnom-aam Kuignayuanun, tuani qanerniartuten qanresqucimtun.

³Waten qanerciquten, “Niiciu qaneryaraa ATANREM, Judah-m angayuqrini, Jerusalem-aam-llu yuini. Waten qanertuq ATANEQ Artuqailnguq, Agayutii Israel-aam, Tangerrluku, uumun nunamun tuc'etqata'arqa assiitqapigtellria, niitestai ukverciigaciiqut tuaten pilriartangqerrngayugngacianek irr'iluteng-llu.

⁴Tua-i-wa yuut cakaaratnga, menuurrluku-llu man'a ekuagiluteng aruviarnek tepkegcilrianek allanun agayutnun ellaita wall'u ciuliarita wall'u angayuqrin Judah-m nallukaitnun; cali-llu una imillruatgu augatnek camek pinarqutailnguut,

⁵ekuavililuteng tuaten Baal-aamun ekuanaluki irniateng elliitekluki Baal-aamun, wiinga alerquutekelqenrilkemnek, umyuaqellrunrilkemnek-llu;

⁶taumek, erenret tekiciiqut, qanertuq ATANEQ, uum aterpaginganrillerkaa Topheth-aamek, wall'u Hinnom-aam Kuignayuanek, tau͡gaam aterpagtelarciqaat Tuqurqiyaram Kuignayuanek.

⁷Wani-llu wiinga piciurcessngaitaqa picirkiurakek Judah-nkuk Jerusalem-aaq-llu, yuk'ek-llu anguyagnun tuqurqevkarciqanka, tuqungnaqestaitnun-llu. Temait yaqulegnun yuilqurmiutarnun-llu ungungssinun tunciqanka neresqelluki.

⁸Uumun nunarpagmun taiciiqua assiitqapiaralriamek navguutmek yuut tamaaggun kitulriit ukverciigaciiqut tangerrluku iillayugluteng-llu.

⁹Nunarpiim avatairumallra assiitellriaruciquq cakneq, kiituani nunarpiim iluanelnguut nerngeciqait ilateng nakmiin tuaten irniaqeng'e'rmegteki.”

¹⁰Imna-llu qiku assigtaq nutaan maligpenun tangvagtelluten navegciqan,

¹¹qanerluten-llu ellaitnun, “Waten qanertuq ATANEQ Artuqailnguq: Waten-llu wii navegciqanka ukut yuut nunarpak-llu, yuum navgilauciatun qikuliurtem assigtaliaranek, tumarrviirulluku. Tungmagcilangeciqut Topheth-aami allamek tungmagcivigkairuskuneng.

¹²Waten piciqaqa una nuna, qanertuq ATANEQ, yui-llu, nunarpak una Topheth-aatun ayuqlirivkarluku.

¹³Enet Jerusalem-aami, angayuqrin-llu Judah-m enait, tamarmeng enet kangrit aruviarvik'lallrit tepkegcilrianek agyanun, kuvuurivikellrit-llu wine-anek elliitekluki allanun agayutnun, menuurcimalriaruciqut Topheth-aatun.”

¹⁴Tua-llu Jeremiah utertuq Topheth-aamek, tuaken ATANREM ayagcessvikellranek tekitarkaq qanrutkesqelluku, ATANREM-llu eniin elaqlianun nangerrluni, qanrutai yuut tamalkuita:

¹⁵“Waten qanertuq Artuqailnguq ATANEQ, Israel-aam Agayutii, Tangerrluku, nunarpagmun uumun nunarrarnun-llu tamalkuitnun tuc'etqataranka tamalkuita akeqnerrlugutekellrenka tuc'eciiqniluki, tua-i-wa ellait asvailata, qaneryaranka-llu niicuumiinaki.”