Read Yupik Jeremiah 2 Bible Online

Jeremiah 2 - Yupik bible

Jeremiah 2

¹ATANREM qanrutaanga

²qanrutkesqelluku man'a yugnun tamalkuitnun Jerusalem-aami. “Neq'akaqa kenkillerci wangnek ayagyuallerpecen̄i, kenkillerci wangnek kassuuteqarraallemegni; nauwa-llu maligtellrukevcia yuilqukun, nunakun naucetaarvikumaksailngurkun.

³Israel-aaq tanqilriarullruuq ATANERMUN, naucetaat quyurtaat ciuqliqluku. Ayagcecillruunga nangteqnamek picurlagmek-llu tamalkuitnun yugnun akngircestevcen̄un. Wiinga, ATANEQ qanertua.”

⁴Niiciu qaneryaraa ATANREM, Jacob-aam kinguvrini, tamarpeci-llu yuullgutkelriartaini Israel-aam.

⁵Waten qanertuq ATANEQ: “Ciuliarpeci camek alartellemnek nalaqvikellruamegten͞ga wangnek yaaqvanun ayallruat? Cam wangnek tunucetellruaki? Agayulallruut catngunrilngurnun agayutnguanun tuaten-llu ellait catngunrirluteng.

⁶Waten qanellrunritut, Nauwa ATANEQ anucestellerput Egypt-aam nuniinek ciuliqagcestellerput yuilqumi: nunami mer'ilngurmi petmigtalilriami, ellalliyuilngurmi tan'gercetqapigtellriami-llu, kia tumkeksailkiini kia-llu uitavikeksailkiini?

⁷Tekiutellruamci nunamun naungignarqellriamun, nerlaasqelluci naugillrinek allanek-llu assilriarinek. Tau͡gaam itravciu nunaka assiirutarci; pellernarqelriarurrluku-llu paitarkiuteka elpecen̄un.

⁸Agayulirtet-llu aptellrunritut, ‘Nauwa ATANEQ?’ Alerquutet aulukestaita nallullruatnga. Atanirturcet inglulitaqluteng wangnun; prophet-aat-llu qalartaqluteng agayutnguam Baal-am atrakun agayuaqluteng-llu camun atuunrilngurnun agayutnun.”

⁹“Taumek wiinga inglulirciqamci, qanertuq ATANEQ. Kinguveci-llu pinarqut'lirciqanka.

¹⁰Ayagci kanavalirnermun Cyprus-aam qikertaanun, yugmek-llu ayagceciluci calaratmun Kedar-aam nuniinun yuvrinqegcaarniaraa. Tangerciqerci waten ayuqelriamek ciungani watqapik pitangqeksailucia.

¹¹Allat atanruviit cimiqaqsaitait agayuceteng, tamakut agayutngunrilengraata. Tau͡gken wiinga yum'a navrutellruatnga, wiinga Agayun takarnarqucingevkartellerteng, agayutnun camek ellaitnun taqusngailngurnun.

¹²Taumek qilak pisqaqa uulegtesqelluku alingluku, irr'isqelluku alangaarluku-llu,

¹³tua-i-wa yuunka assiilngillruata malrugnek: tunutellruatnga wiinga, ulvelria unguvanarqelria meq, elallruut-llu mervigkameggnek, qulinelegnek mervignek mermek qaillun imangqerciiganateng.”

¹⁴“Israel-aaq-qaa pistepayuarauguq? yuurtellruuq-qaa pisten͞guarkauluni? Ciin-mi tua-i inglukestain pissulartatgu?

¹⁵Uirranillruat yugtutulitun; nunii nunakarniirulluku, nunarpai-llu imenruluteng uitaut, yugtaitqapiarluteng.

¹⁶Tuamta-llu, Memphis-aarmiut Tahpanhes-aarmiut-llu quligcetellruit nasquci.

¹⁷Man'a-qaa elpecen̄ek tuc'etenritarci elpecen̄un cakaallerpeciuggun ATANEQ Agayutsi, ciuliqagtellranici ayallerpecen̄i?

¹⁸Watua-mi Egypt-aamun ayallerpeciuggun camek unangeciqseci, mernaluci-qaa Nile-am mer'anek? Wall'u camek unangeciqseci Assyria-mun ayallerpeciuggun, mernaluci-qaa Kuigem Euphrates-aam mer'anek?

¹⁹Elpeci pivci assiilnguum anucimirqecetaarciqaaci, wangnek-llu tunutellerpeci pinarqelriarurciiqaaci. Nallunrirciqerci assiilucia nangteqnarqucia-llu cakaarillerci wangnek, ATANERMEK Agayutevcen̄ek, wangnun-llu piciungairutlerci. Wiinga, Artuqailnguq ATANEQ, qanertua.”

²⁰Artuqailnguq ATANEQ qanertuq, “Akaurtuq uskurarpecen̄ek navgurillerci kevkarqelluki-llu qillrutaci; qanerluci, Wiinga kevgiurngaitua. Tua-i tamalkuitni qemit qertulriit tamalkuita-llu aciatni cungagcelnguut napat ciktaalaavci qingarcecitulinun agayutnun.

²¹Tau͡gken wii naucillruyaaqamci assinkacagauluci napayagauluci naucetaarkamek menuilngurmek aturlua. Qaillun tua-i piluci assiinaci nauceci yuilqumi napayaartun naulriatun ayuqluci?

²²Erungerpeci elpecen̄ek miilat tukninqurraatnek aturluci, assiilngurpeci meciutellra cali ciuqamni uitauq.

²³Qaillun-mi tua-i qanerceci, ‘Wiinga menuurteksaitua, agayuksaunii-llu agayutnguanun Baal-anun’? Tangerciu assiilngillerci kuignayuum iluani; tangerciu caliallerci. Taqmigteksailngurtun ungungssitun qulugnelegtun agelrumalriatun ayuqci petuunani ayagalriacetun,

²⁴yuilqurmiutartun-llu ciulvagtun, agelrumallermini anuqa naru'urluku! Angucalumek yuallermini arulaircimasciiganani. Angucalut aglumastain qacigutkelaraat; paivngarrlainalaan nulirtellmeng nalliini.

²⁵Israel-aaq, it'gaten nanguluugtenrilki, igyaran-llu kinercetevkenaku malirqerallerpeni allat agayutet. Tau͡gken elpeci qanertuci, ‘Arenqiatuq qaillun pisciigatukut, tua-i kenekngamteki tangnerranarqelriit agayutet, unakengnaqerkauluki-llu.’”

²⁶“Tegliulria anguaqatni kiaresngiatelauciatun, tuaten-llu Israel-aat angayuqertuumarmeng, atanerruartuumarmeng, agayulirtetuumarmeng, prophet-aartuumarmeng-llu kasnguyugciqut,

²⁷waten qanlalriit napamun, ‘Elpet wii atakamken,’ teggalqumun-llu, ‘Elpet wangnek irnillruuten.’ Tua-i ellaita tunutellruamegten͞ga. Tau͡gken arenqiallugtellermeng nalliini qanlartut, ‘Tailuten anirturkut!’

²⁸“Nauwa-mi agayuceci piknaluki piliaqelci? Arenqiallugtellerpecen̄i, anirturlici piyugngakuneng! Judah, nunarpagpeci amllertataitnek agayutengqertuci.

²⁹Ciin qanemyuugarceci wangnun? Elpeci tamarpeci inglulillruarpecia, qanertuq ATANEQ.

³⁰Elliinginaq anucimirqecetaalaranka irniaten, tau͡gaam ellaita anucimirqecetaaruceteng catkeksaitait. Alingnarqelriatun yugtutulitun tuqutelaraci prophet-aaci.

³¹Israel-aam yuini, niiciu qaneryaraa ATANREM. Nunatun-qaa mer'ilngurtun elpecen̄un ayuqua, tan'gercen̄ani alingnarqelriatun? Ciin yuunka qanertat, ‘Wangkuta teguarunrirtukut, ullanqiggngaitamteggen’?

³²Neviarcaraam-qaa nalluyagutelarai kenugutni teggalquqegtaaraat, wall'u-qaa nulirkautem nalluyaguciiqaa kassuuskuni taqmak atu'urkani? Tau͡gken elpeci yumni naaquciilngurni ernerni nalluyagutelararpecia.

³³Elisngaqapigtaci kenkuurtekarpecen̄ek pingnaqelci. Arnat-llu assiilqukacagaunge'rmeng canek elisviksugngaiceci.

³⁴Aturaci-llu meciumaut augitnek arrsaulriit camek pitkailnguut, enenun it'ratulit augitnek pivkenateng. “Tau͡gken makut catkevkenaki,

³⁵qanertuci, ‘Wiinga camek pinarqutkaitua; ilumun ATANREM eq'errutenriraanga.’ Tau͡gaam Wiinga, ATANEQ, anucimirqecetaarciqamken qanravet, ‘Assiilngiqsaitua.’

³⁶Pikarniirutevkartuten elpenek caullerpeggun allat angayuqauvillgutkelriit agayutaitnun. Kiaresngiaceciiqaaten Egypt-aam, kiaresngiacetellruciatun Assyria-m.

³⁷Egypt-aamek ayagciquten qamiqun putenglluggluku kiaresngianak, tua-i ATANREM qessakngaki cacetuqutekelten, camek unangengaituten tamakunek.”