Read Yupik Jeremiah 20 Bible Online

Jeremiah 20 - Yupik bible

Jeremiah 20

¹Pashhur-aam agayulirtem, Immer-aam qetunraan, ciuqliulriim atanerruanun eniini ATANREM, niitaa Jeremiah makunek qalartellrani.

²Pashhur-aam-llu nangtaa Jeremiah prophet-aaq, kalivnercirluku-llu yaaqsinrilkiini Benjamin-aam Amiigan Agayuvigpagmelnguum.

³Tua-llu unuaquan unuakumi, Pashhur-aam Jeremiah angitaa kalivnerciumallranek, Jeremiah-m-llu qanrutaa, “ATANREM aterpagteksaitaaten Pashhur-aamek, tau͡gaam aterpagtelaraaten Alingnarqelria Nani Tamiini.

⁴Waten qanertuq ATANEQ, ‘Tangerrluku, wiinga elpenek alingyaguceciiqamken, tamalkuitnun-llu yugnikestevnun alingnarqelriarurrluten, tangvagciqaten-llu inglukestaita tuquskatki nuussirpamegteggun. Wiinga-llu cikiutekciqaqa tamalkuan Judah Babylon-aam angayuqranun; yuut ilait ayauciiqai teguaqluki Babylon-aamun, ilait-llu tuquqluki nuussirpagkun.

⁵Cali-llu nunarpiim tukuutai, aklui, Judah-m-llu angayuqrin quyurtaarit qununarqelriit piksaguceciiqanka inglukestaitnun, taukut uayarciqait, teguluki-llu, ayaulluki-llu Babylon-aamun.

⁶Elpet-llu, Pashhur-aaq, tamarmeng-llu enevni uitalriit, teguarurciiquci, Babylon-aamun-llu ayagcecimaciquci. Tuani-llu tuquciquten, tungmagcimaluten-llu ilakluki tamalkuita yugnikek'ngaten, iqluquluki qalarut'lalten.’”

⁷ATANEQ, elpet ukvertellruarpenga, wiinga-llu ukverlua. Wangni pininruuten, cirlakellruarpenga. Tamarmeng yuut picingssautek'laraatnga; engelarautek'laraatnga ernerpak.

⁸Tua-i camek qanraqama, erinialua pilartua qayagpaglua, “Aaricaraq! Piunrillerkaq!” Inglulirtenka amlleriut ATANREM qaneryaraanek qalaruciqa pitekluku.

⁹Waten qanquma, “ATANEQ nalluyaguciiqaqa atrakun-llu camek qanenqiggngaitua,” tuani qanrutkesqellren kenertun qamani ilumni ayuqlirilartuq. Pinertutacirramtun nuqingangnaqellruyaaqaqa, tau͡gaam nuqingasciigaliaqa.

¹⁰Niitelartua amllernek agyumciaralrianek, “Alingnarqelria nani tamiintuq! Picetaaruciu! Picetaarutnaurput!” Yugnikek'ngaqengramteng-llu utaqalgirtut iqucimallerkamnek. Qanerluteng, “Iqluqukumten̄i ukveryalliuq, teguluku akinaurutput elliinun piniarput.”

¹¹Tau͡gaam ATANREM nayuraanga uluryanaqluni anguyagtetun, taumek nangtestenka piciurrngaitut cirlakngaunii. Kiaresngiaciiqut cakneq, piyullrat piciurrngailan. Kasnguyugcecimallrat watqapik nalluyagucimangailami.

¹²ATANEQ Artuqailnguq, naspaastiitni ellualriit, nallunritaten ircaqurrit umyugaita-llu. Tangvagtelluten wangnun akinaurki inglukestenka, tua-i-wa elpenun piyuuteka tunellruamku.

¹³Aturci ATANERMUN! Nanrarciu ATANEQ! Anirtullruaki nangcimalriit piniatnek assiitellriit yuut.

¹⁴Aniqlaamali erneq yuurtelqa! Neq'akenrirciu erneq aanama irnillra wangnek!

¹⁵Aniqlaamali yuk tauna qaneryartulleq aatamnun, “Qetunranguten!” cakneq quyavkarluku.

¹⁶Tauna yuk ayuqli nunarpagtun ATANREM piunrillritun takumcukevkenaki. Niiskili neplilrianek engellugturluteng unuakumi anguyagnek-llu qanelrianek erenrem qukallrani,

¹⁷tua-i-wa tuqutenrilanga yuurpailegma. Aanama eneliak wii qunguqellruyaragka.

¹⁸Ciin wiinga yuurtellrullinisia? Arenqialluggnalua-qaa angniitnaq-llu aturluku, unguvaka iquklitesqelluku kasngunarqellriakun?