Read Yupik Jeremiah 21 Bible Online

Jeremiah 21 - Yupik bible

Jeremiah 21

¹Qaneryaraq una taillruuq Jeremiah-mun ATANERMEK, Angayuqam Zedekiah-m ayagcetellrani Pashhur-aamun qetunraanun Malchiah-m, Zephaniah-mun-llu agayulirten͞gunermun, Maasseiah-m qetunraanun, qanerluni,

²“Qanercirkut ATANERMUN Nebuchadnezzar-aam Babylon-aam angayuqran anguyiikut. Pitsaqevkenaku ATANERMUN ikayurnayukluta, irr'inarqelrianek calilaucirmitun, Nebuchadnezzar-aaq ayagtelluku wangkutnek.”

³Jeremiah-llu qanertuq ellaitnun,

⁴“Waten qanqici Zedekiah-mun, Waten qanertuq ATANEQ, Israel-aam Agayutii: Zedekiah, cirlakciqanka anguyagteten anguyalriit Babylon-aam angayuqranek anguyagtainek-llu. Anguyagtevvet caskuit quyurciiqanka qalliqluki nunarpiim qukaanun.

⁵Wiinga anguyagciqamken piniqa tamalkuan aturluku, eq'urruteka, qenertelqa-llu.

⁶Tuquciiqanka tamalkuita uum nunarpiim yui; ungungssiaraat yuut-llu ayuqluteng tuquciqut assiitqapigtellriakun cangerlagpagkun.

⁷Kinguakun, qanertuq ATANEQ, Zedekiah Judah-m angayuqra, pistai, yuut-llu tuani nunarpagmi uitalriit cangerlagkun, anguyagkun, piitnakun-llu tuqullrunrilnguut, tamarpeci teguaqevkarciqamci Nebuchadnezzar-aamun Babylon-aam angayuqranun inglukestaitnun-llu, tuqungnaqestaitnun. Elliin tuquciiqai nuussirpagkun; takumcukngaitai, wall'u uitasngaunaki-llu.”

⁸Cali ukunun yugnun waten qanra: ATANEQ qanertuq: “Watua cucukliisqamci unguvallerkarpecen̄ek wall'u tuqullerkarpecen̄ek.

⁹Kina imna wani nunarpagni uitakuni tuquarkauguq nuussirpagkun, piitnakun, cangerlagkun-llu; tau͡gken nunarpagnek anelriit tunluteng Chaldean-aanun avatairumastevcen̄un unguvaciiqut.

¹⁰Umyuaqa elkartellruaqa taq'isngaunaku una nunarpak, piunrirnaluku tau͡gaam. Tunumaciquq Babylon-aam angayuqranun, elliin-llu kenerkun ekuaciqaa nangqapiggluku.”

¹¹ATANREM qanrutaanga una qanrutkesqelluku Judah-m angayuqrinun, kinguvrinun David-aam: “Niicugniciu wii, ATANEQ, qanelqa. Elluaruciq atularciu unuaquaqan. Ikayurluki teglegimalriit teglegistaitnek. Tuaten pinrilkuvci, atuqengarpeci assiilnguum qenertelqa ekuavkarciqaa kenertun nipesciigalngurtun.

¹³Elpet, Jerusalem-aaq, aqumgauten quliitni kuignayuut, teggalqutun pugumalriatun carr'ilngurmi nunami. Tau͡gaam wii inglulirciqamken. Qaneryaaquten kitumun anguyagciigatniluten wall'u casguten-llu navguumangaitniluki.

¹⁴Tau͡gaam anucimirqecetaarciqamken caliallren pitekluku. Enen atanruvik ekuavkarciqaqa, kenrem-llu ekuaciqai avatiini uitalriit tamalkuita. Wii, ATANEQ, qanertua.”