Read Yupik Jeremiah 22 Bible Online

Jeremiah 22 - Yupik bible

Jeremiah 22

¹Waten qanertuq ATANEQ: Atraa Judah-m angayuqran eniinun, man'a-llu qanrutekluku:

²waten qanerluten, Judah-m Angayuqrani, aqumgalriami David-aam aqumllerani atanruvigmi, elpet pisteten-llu, yut'en-llu ukutgun casgutgun it'lalriit:

³“Wiinga, ATANEQ picirkiramci elluaryaraq atuusqelluku, aviuciki teglegimalriit nangtestaitnek. Assiitellriamek ayuquteksaunaki nangteksaunaki-llu allanret, elliraat aipainret-llu, tuquciksaunaci-llu wani yugnek cacetaanrilngurnek.

⁴Maligtaqukuvciu una qaneryaraqa, David-aam kinguvri taqevkenateng angayuqauciqut, it'larciqut uum enem amiigikun angayuqat aqumgayugngalriit David-aam angayuqauvian aqumllerani ekumaluteng ayagassuutni akalrialegni, horse-aani, ellait, pistait, yuit-llu.

⁵Tau͡gken maligtaqunrilkuvciki picirkiutenka piciulriamek qanertua, qanertuq ATANEQ, una angayuqam enii imenrurciiquq yuirulluni.

⁶“Waten ATANEQ qanertuq enii Judah-m angayuqran piluku, Elpet wangni nunanirquten Gilead-aam nuniitun ayuqluten, Lebanon-aam ingriin kangricetun, tau͡gaam wiinga nunatun mertailngurtun ayuqliriciqamken, nunarpagtun yuilngurtun.

⁷Upciiqua piunrirtekarpecen̄ek tamarmeng-llu caskungqerciqut, assinqukacagaat-llu cedar-aat napauceci iquciiqait kenermun-llu muriulluki.

⁸“Amlleret-llu allanret kitularciqut nunarpiim caniakun, ilateng-llu aptelarciqait, ‘Ciin ATANREM una nunarpak angelria waten piagu?’

⁹Ellait-llu kiuciqait, ‘Tua-i-wa akqut'lillerteng ATANEQ Agayuceteng pillgutekluku cakaallruatgu, agayuaqluteng-llu allanun agayutnun kevgiurluki-llu.’”

¹⁰Judah-m yuini, qiatekenriciu Angayuqaq Josiah; angniilutkenriciu yuunrillra. Tau͡gaam Joahaz-aaq qetunraa angniitqapiggluci qiatekiciu; ayaucimiin utertenqigtarkauvkenani, tangenqiggngaunaku nuna yuurrvillni.

¹¹Waten qanertuq ATANEQ Shallum-aaq Josiah-m qetunraa, angayuqra Judah-m angayuqrurtelleq atami kinguakun piluku: “Maaken ayallruuq, utertenqiggngaunani,

¹²tuani teguaqluku ayausvillratni tuquciquq, man'a-llu nuna tangenqiggngaitaa.”

¹³Nakleng yuk enelilria elluanrilngurkun, angtucarluku-llu qullilirluku piciunricarakun; elliinginaq nunalgutni calivkarluku akilirpek'naku.

¹⁴Qanerluni, “Angtuamek wangnek eneliciiqua pivigtulriamek,” egalelirluku, iluqlilirluku murakegtaarnek cedar-aanek kavirlimek-llu mingugluku.

¹⁵Assinruluten-qaa angayuqruyukuten eneliavet murakegtaarnek cedar-aanek, allat enaitni assinrulriamek? Nauwa aatan canek nuuqitellrunrituq. Elluaryaraq pitalqeggsaraq-llu atullruak, caliamini-llu tamalkuitni piluaqerluni yuullruuq.

¹⁶Arrsaulriit caitulriit-llu elluarrluki cuqtelallrui, ca-llu tamarmi elluarrluni pilallruuq elliinun. Tuaten ayuqut nallunritestai ATANREM.

¹⁷Tau͡gaam elpet piyuutekaten piciunrilngurkun cat piksagutellerkait, tuqucinaluten pinarqutailngurmek, nangciyaraq mulngaicaraq-llu aturlukek.

¹⁸Taumek waten ATANEQ qanertuq Judah-m angayuqra Jehoiakim-aaq, Josiah-m qetunraa piluku: “Kia angniilutekngaitaa yuunrillra wall'u waten qanerluteng, ‘Nakleng, anngamaa! wall'u, Nakleng, nayagamaa!’ Kia qiatekngaitaa, wall'u qanerluni, ‘Atanemaa! Angayuqamaa!’

¹⁹Tungmagingayaraatun ciulviim tungmagcimaciquq, qamurciqaat eggluku-llu elatiinun Jerusalem-aam ikirtuqain.”

²⁰Jerusalem-aam yuini, Lebanon-aamun ayagluci qayagaurci, Bashan-aam nuniinun ayagluci qiayarturci; Moab-am-llu ingriinek qayagaluci, tua-i-wa ililirteci tamarmeng cirlakumiita.

²¹Qalarutellruyaaqamci nuuqitenritlerpeci nalliini, tau͡gaam qanellruuci, Niicugningaitua. Tauna ayuquciqaci ayagyuarraanerpecen̄ek, qalarutengramci niicugpek'naci.

²²Ciuliqagcilriit elpecen̄ek anuqem tengciiqai ililirceci-llu anguyagmi, teguaqeciqait; nutaan-llu elpeci kiaresngiaciiquci cacirkaunaci assiilnguut calialci tamalkuita pitekluki.

²³Uitayugcaliyaaquci napakegtaaraat akuliitni taitellerpeci Lebanon-aamek; tau͡gaam takumcunarqeqatarpagceci nangteqnarqelriim tuskaci, arnatun nangteqelriatun teggiurciaqami.

²⁴ATANEQ qanertuq Angayuqamun Jehoiachin-aamun, qetunraanun Angayuqam Jehoiakim-aam, Judah-m angayuqran, “Unguvalua Agayutngucimtun, qanertuq ATANEQ, takarnarqucimnun nallunailkutauluten kulutngung'e'rpet tallirpilirnemni unatemni, au͡g'aryaramken,

²⁵cikiutekluten-llu tuqungnaqestevnun alikek'ngarpenun. Tunciqamken Nebuchadnezzar-aamun Babylon-aam angayuqranun: anguyagtainun-llu.

²⁶Qessange'rpet aanan-llu allamun nunamun ayagcetqataramtek, yuurrvikelqenrilkevtegnun, tuani-llu tuquciqutek.

²⁷Nunamun-llu maavet utercuumiryaaqeng'e'rpet uterrngaituten.”

²⁸Wiinga qanertua, “Jehoiachin-aaq-qaa ayuqliriuq navgumalriatun qikutun assigtatun ciqiskiicetun piksuumiirulluku? Tamana-qaa pitekluku irniartuumarmi nunamun ayagcecimauq nallukemeggnun?”

²⁹Nunaa, nunaa, nunaa! Niisgu qanellra ATANREM!

³⁰“Una yuk pinarqutengqertuq irniaminek teguimaarkauluni, yuullermini piluaqerluni pingaunani. Kinguvengqerrngaituq ataniurarkamek Judah-mi aqumgaluni David-aam atanruviani. Wiinga, ATANEQ, qanertua.”