Read Yupik Jeremiah 23 Bible Online

Jeremiah 23 - Yupik bible

Jeremiah 23

¹“Nakleng qusngiliurtet piunririlriit cekavcilriit-llu qusngiutemnek!” qanertuq ATANEQ.

²Taumek waten qanrutkai ATANREM, Agayutiin Israel-aam, qusngiliurtet aulukilriit yum'inek piluki: “Yuunka cekavtaci ayagtelluki-llu, aulukellrunritaci-llu. Waniwa anucirmirqecetaaqataramci assiilnguq caliallerci pitekluku.

³Nutaan quyurciiqanka nunanek ayagcesvillemnek ilakuarrait yum'a, ut'rulluki-llu nuniitnun, irnialingciqut-llu yugyangluteng.

⁴Qaunqestekaitnek piciqanka murilkestekaitnek, alingenrirciqut nanikuananrirluteng-llu iliit-llu tamarngaunani, ATANEQ qanertuq.”

⁵“Erenret tekiciiqut, qanertuq ATANEQ, cucukillerkaqa angayuqruarkamek ellualriamek kinguvranek David-aam. Tauna atanirturiciquq umyuartuluni elluaruciq piciuneq-llu aturlukek yugnun tamaitnun.

⁶Taum angayuqrullran nalliini Judah uitanqegciciquq, Israel-aam-llu yui elluiluteng uitaarkauluteng. Aterpagtelarciqaat-llu waten: ‘ATANEQ wangkuta Anirturtevvut.’”

⁷“Taumek erenret tekiciiqut, qanertuq ATANEQ, yuut ukvernarcarinanrillerkaat unguvalriim Agayutem atrakun anutestellrata Israel-aam yuin Egypt-aamek.

⁸Tau͡gaam ukvernarcarilarciqut wangkun unguvalua Agayutngucimkun, anutestellrat Israel-aam yuin neglirnermek nunamek, allanek-llu nunanek wii cekavcecimallemnek. Nutaan ellait nakmiin nunameggni uitaciqut.”

⁹Ircaquqa ciamcimauq, uulegtua-llu. Waten ayuqlirivkaanga ATANREM, tanqilriit qaneryarai pitekluki, taangiqelriatun ayuqua, wine-amek amllermek mer'allertun.

¹⁰Nuna muirumauq yugnek ATANERMUN piciunrilngurnek; assiilngurkun yuurrluteng piunarquciteng-llu iqlutun aturluki. ATANREM aniqlaangani nuna angniituq can'get-llu nauvamiketukait kinerluteng.

¹¹Qanertuq ATANEQ: “Tamarmeng prophet-aat agayulirtet-llu Agayun qigcikenritaat; nallunritaqa-llu Agayuvigpiim iluani assiilnguq atullrat.

¹²Tumait qurrayirnarqeciquq tan'gercen̄ani-llu; paallacalkaravkarciqanka iquvkarluki-llu; tua-i assiitellria tuc'etarkaungamku ellaitnun; anucimirqecetaarumallerkaat agiirtuq, qanertuq ATANEQ.

¹³Prophet-aarini Samaria-m tangellruunga ilukegcinarqenrilngurmek: tekitarkamek qalarrluteng Baal-am atrakun yuunka-llu Israel-aat iqlutmurulluki.

¹⁴Tau͡gaam cali prophet-aarini Jerusalem-aam arcaqanrulriamek tangellruunga: akusrarutekilrianek iqluquluteng tuaten; yuut eguaqurluki assiilngurmek atullerkaatnun, taumek umyuarnayagucilriamek ilailnguut. Wangni cangallrunrirluteng Sodom-aarmiuni Gomorah-rmiuni-llu.”

¹⁵Taumek waten, qanertuq ATANEQ Artuqailnguq, prophet-aat Jerusalem-aami piluki: “Naunrarnek qatlinarqelrianek nerevkarciqanka mertelluki-llu tuqunarqelriamek avulegmek, tua-i-wa prophet-aarin Jerusalem-aam sagcatgu elluanricaraq yugnun tamalkuitnun.”

¹⁶Waten qanertuq ATANEQ Artuqailnguq Jerusalem-aam yuinun, “Niicugniyaqunaciki qalartengraata elpecen̄un prophet-aat; piciurtarkaunrilngurnek akquuraiceci. Ellaita umyuangutmeggnek qanrut'laraiceci ATANREM qanelqenrilkainek.

¹⁷Taqsuunateng qalartelartut caunrilkestainun ATANREM qaneryaraan qanerluteng, ‘Assirluci elluarrluci-llu piurciquci’; cali-llu imkunun ciumualrianun umyuarteng aturluku qanlartut, ‘Assiitellria elpecen̄un tusngaituq.’”

¹⁸Wiinga qanertua, “Ukut prophet-aat iliita nallunritellrunritaa nallunriumanrilnguq umyugaa ATANREM. Iliita niiteksaitaa taringeksaunaku-llu qanellra, wall'u murilkelluku niicugniksaunaku elliin qanellra.

¹⁹ATANREM eq'uqertellra ellarayagtun ayuquq, anuqerpak tuknilria tekitarkauguq assiitellrianun yugnun,

²⁰eq'uqertii-llu iquklisngaunani pillerkiurani pivailegmiki. Kinguqvaarni man'a taringeluaqerluku taringeciqerci.”

²¹ATANEQ qanertuq, “Wiinga ayagcetellrunritanka ukut prophet-aat, tau͡gken ellait ayallruut. Qanerkaitnek cikillrunritanka, tau͡gken ellait qalartelartut atemkun.

²²Umyuaqa nallunritellrukunegteggu, qanerkiuramnek qanlaryartut yumnun, umyualinqigcecarait-llu assiilngurmek ayuquciatnek caliaratnek-llu.

²³“Agayutnguunga-qaa ataucimi uitalua, tamiini-qaa uitalriarunritua?

²⁴Yuk-qaa iiryugngauq nallunarqellriamun wiinga tangerciigalkemnun? Nalluarci-qaa tamiini uitaciqa qilagmi nunami-llu?

²⁵Nallunritanka taukut prophet-aat qanellrit qalartelalriit iqluurutnek atemkun qanraqluteng-llu wangnun qanerkaitnek cikilarniluteng qavanguitgun.

²⁶Qaillun pitalriamek prophet-aat umyuangqerciqat piciunrilngurnek, qalartaqluteng-llu iqluurutnek ellaita umyuangutmeggnek?

²⁷Umyuarteqluteng yumnun atqa nalluyagucetnaluku qavangutgun qanengssamegteggun, ciuliameng atqa nalluyagutellruciacetun Baal-amun-llu cauluteng.

²⁸Prophet-aat qavangurtualriit qavanguteng qalaruteklitki, tau͡gaam wii qaneryaramnek pingqellriim qanrutekliu elluakun. Qaillun canek assirciqa ayuqeltassiigusngakuni mukaarkamun? Qanertuq ATANEQ.

²⁹Qaneryaraqa kenertun ayuquq mulut'uugtun-llu ciqumciyugngalriatun teggalqunek.

³⁰Inglukanka prophet-aat ilameng qanellritnek qalartellriit qanerluteng wangnun qanelqen̄iluki.

³¹Cali-llu inglukanka prophet-aat qaneryullermeggnek qalartellriit qanerluteng qanelteng wangnek kingunengqerrniluki.

³²Inglukanka qaneryariulriit piciunrilngurnek qavangunek, qalarutekluki iqlutmurutelaitki yuunka iqluurluki umyuangcarpek'nateng, amta-llu wiinga ayagcetellruvkenaki ellimellruvkenaki-llu; taumek ikayuq'ngenrilnguut yugnek. Waten qanertuq ATANEQ.”

³³“Ukut yuut iliita, wall'u prophet-aam, wall'u agayulirtem waten apeskaten, ‘Cauga uqamailutii ATANREM?’ waten qanruciiqaten, ‘Elpeci uqamailutnguuci, taumek wiinga egciiqamci, qanertuq ATANEQ.’

³⁴Tua-llu prophet-aaq, wall'u agayulirta, wall'u yuut ilait waten qanqata, ‘ATANREM uqamailutii,’ Qanellret tuaten anucimirqecetaarciqanka enelgutait tapeqluki.

³⁵Taumek waten qanlarciquci nunalgutevcen̄un wall'u anelgutevcen̄un, ‘Camek ATANEQ kiuga?’ cali-llu, ‘Camek ATANEQ qanellrua?’

³⁶‘ATANREM uqamailutii’ qanrutkenqiggngaitarci, tua-i yuum tamarmi qanellni uqamailutkeciqaa; tua-i elpeci assiirucavciu qaneryaraa ATANREM Artuqailnguum Agayutem.

³⁷Waten elpet qanerciquten prophet-aamun, ‘Camek ATANREM kiugaten?’ Cali-llu, ‘Camek ATANEQ qanerta?’

³⁸Tau͡gaam elpeci qanravci, ‘Uqamailutii ATANREM’, tuaten qanresqellrunrilengramci,

³⁹Ilumun taumek teguluci kevegciqamci eggluci-llu tangvak'ngamnek, elpeci nunarpak-llu cikiutekelqa ciuliarpecen̄un.

⁴⁰Kasngunarqelriarurciiqamci canganarqelriarurrluci nalluyagucimangailngurmek.”