Read Yupik Jeremiah 25 Bible Online

Jeremiah 25 - Yupik bible

Jeremiah 25

¹Qaneryaraq ATANERMEK tekituq Jeremiah-mun tamalkuita Judah-m yui piluki, allrakut cetamiitni angayuqaullran Jehoiakim-aam Josiah-m qetunraan. (Ciuqliatni allrakut angayuqrurtellran Nebuchadnezzar-aam Babylon-aami.)

²Jeremiah-m qanrutkaa tamalkuitnun Judah-m Jerusalem-aam-llu yuinun.

³“Allrakuni yuinaq pingayunek cipluku (23) angayuqaullran Josiah-m Amon-aam qetunraan, erneq una tekilluku, ATANREM qanrut'laraanga, wiinga-llu pinriteksaunii qanellrinek qanruquraraqluci, tau͡gaam elpeci niicuunaci.

⁴Niicugniyuumiitelartuci murilkessuunaci-llu, ATANREM pinriteksaunani ayagcequrangraaki elpecen̄un pisten̄i prophet-aat,

⁵waten qanelriit, Tamarpeci umyualinqigci assiilngurnek caliarpecen̄ek, uitaniartuci nunami ATANREM cikiutekellrani elpecen̄un ciuliarpecen̄un-llu pikura'asqelluku.

⁶Agayutnun allanun cauyaqunaci kevgiurnaluki agayularnaluci-llu tamakunun, wall'u eq'urtellua unatevci piliaritgun. Tuatnakuvci anucimirqecetaarngaitamci.

⁷Tau͡gaam elpeci niitenritarpecia, qanertuq ATANEQ, eqcirnalua unatevci caliaritgun elpecen̄ek anucimirqecetaarutkiurluci.

⁸“Taumek waten qanertuq ATANEQ Artuqailnguq: Qaneryaranka niicunrilavciki,

⁹tangerrluku, negeqvami yuut tamalkuita taisqeqataranka pisteka-llu, Nebuchadnezzar-aaq Babylon-aam angayuqra. Taivkaqataranka anguyaasqelluku Judah yui-llu, tamalkuita-llu avatiinelnguut atanruvillgutkelriit. Piunriqapigciiqanka nunallrurrluki akwarpak, tangellrat alingnariluku tatamurranaqluku-llu. Wiinga, ATANEQ qanertua.

¹⁰Cali-llu nepait nunaniryulriit quyaluteng-llu niitnaunrirceciiqanka, niitnaulriit-llu angnirluteng kassuucaram nerevkaritiini, mukaarkamek-llu passiilriit nepait, kenurram-llu tanqia.

¹¹Nuna man'a tamarmi navguumaciquq cakarniirulluni, makut-llu atanruvillgutkelriit avataitnelnguut kevgiurciqaat Babylon-aam angayuqra yuinaat pingayun qulnek cipluku allrakuni (70).

¹²Allrakut-llu taukut qaqiskata, anucimirqecetaarciqaqa Babylon-aaq angayuqra-llu assiilnguat pitekluku. Piunrirciqaqa tamana nuna cakarniirulluku akwarpak.

¹³Nunamun tamatumun tut'elluki akeqnerrlugutellrenka igausngalriit tamalkuita ukuni kalikarni, Jeremiah-m qanrutkellri tekitarkauniluki angayuqauvignun tamalkuitnun.

¹⁴Akinaurciqanka Babylonian-aat caliallratnek, amlleret-llu angayuqauviit angelriit-llu angayuqat pisten͞gurciiqait.”

¹⁵ATANEQ Israel-aam Agayutii, qanertuq wangnun, “Teguu saskaq unatemnek imalek eq'ukutem wine-aanek. Ayaulluku mercessgu atanruviit yuitnun tamalkuitnun ayagcessviklemnun.

¹⁶Meq'uneng ayaluaciqut usviirulluteng, anguyiit ellaitnun ayagcetellma tuaten pivkarciqait.”

¹⁷Tua-i teguaqa saskaq ATANREM unatainek, ayagcesvikellri-llu tamalkuita atanruviit yuit tuaken mertelluki.

¹⁸Jerusalem-aaq Judah-m-llu nunarrai angayuqertuumarmeng ciuliqagtait-llu mercecimaut tuaken, kinernerurtelluki yuirutelluki-llu, tangertait alangaaresqelluki alingluteng-llu, yugnun atrit acivaqaniratek'laasqelluki maa-i cali pilauciicetun.

¹⁹Wani-wa ukut saskam imaanek mellret: angayuqra Egypt-aam, atanerruari ciuliqagtai-llu; Egypt-aarmiut tamarmeng tamaani-llu allanrulriit; tamarmeng angayuqrulriit nuniini Uz-am; tamarmeng Philistine-at angayuqrulriit nunarpagni: Ashkelon, Gaza, Ekron, Ashdod-aami-llu; tamarmeng yuut Edom-aami, Moab-ami, Ammon-aami-llu tamarmeng angayuqat Tyre-ami Sidon-aami-llu; tamarmeng angayuqat Mediterranean-aam nunaini; nunarpiit Dedan, Tema, Buz-aaq-llu; tamarmeng yuut keplialalriit nuyateng nanililuki; tamarmeng angayuqri Arabia-m; tamarmeng angayuqat mer'ilngurmi nunami; tamarmeng angayuqrit Zimri-m Elam-aam Media-m-llu; tamarmeng angayuqri negeqvam, canimelnguut, yaaqsilriit, kinguqliqu'urluteng. Tamarmeng angayuqauviit nunami uitalriit tuaken merciqut. Kinguk'acaagarmek-llu Babylon-aam angayuqra tuaken mer'arkauluni.

²⁷“Nutaan-llu waten qanruciiqaaci, ‘Waten qanertuq ATANEQ Artuqailnguq Israel-aam Agayutii: Merci, taangiqluci miryaraluci-llu, paallagaci nangertenqiggngaunaci, anguyagnek ayagceciqataama elpecen̄un.’

²⁸Qessakekatgu-llu saskaq meryuuminateng waten qanruciiqaten, ATANEQ Artuqailnguq waten qanertuq: Mer'arkauguci!

²⁹Ayagniqataamku wani-wa piunrillerkaa uum nunarpiim wiinga pima, umyuartequci-qaa anucimirqecetaarumanritnayukluci? Anucimirqecetaarumanrilngaituci anguyagnek ayagceciarkaungama nunam yuinun tamalkuitnun.”

³⁰“Taumek, elpet Jeremiah, qanruciiqaten ukut yuut tamalkuitnek wiinga qanllemnek. Waten ukut yuut qanruciiqaten, ‘ATANEQ eriniaciquq kalluum nepiitun pakmaken qilagmek. Eriniaciiqai yun'i, qayagpagaluni yugtun wine-arkanek atsanek mecuirilriatun. Nunamelngurnun tamalkuitnun niitelluni.

³¹Nepii-llu qasiarciiquq akiuggluni nunam iquinun. ATANEQ pitkangqertuq atanruviit yuitnun. Cuqciiqai-llu tamalkuita assiitellriit-llu yuut tuqurqevkarluki anguyagnun. ATANEQ waten qanertuq.’”

³²ATANEQ Artuqailnguq qanertuq piunrillerkaat atanruviit kinguqliqluteng agiirtuq, ellarayak-llu quyurtuq nunam iquini.

³³Tuani ernermi ATANREM tuquvkallri sagciiqut nunam iquanek amavet iquanun. Angniilutkumangaitut, quyurcimangaitut, tungmagcimangaunateng-llu; ciqitartun ayuqeciqut nunam qaingani.

³⁴Aluviliurci, ciuliqagcilriani, yum'a qusngiliurtaitni qastuluci qialuci akaguarci urr'ami. Tuqurqumallerkarci cekavcimallerkarci-llu tekican, tuqurqumaarkauguci tuntutun uqurilriatun.

³⁵Qimagvigkairutuci anagngaunaci-llu.

³⁶Niiciki neplialriit qusngiliurtet ciuliqagtet-llu, ATANREM piunriaki alingnaqluni eq'uqerrluni atanruvik nunait-llu uitanqegcinarqelriit imenrurtelluki.

³⁸ATANREM yun'i cakaarai yugtutulim igtem̄inek anlauciatun, tua-i-wa nuniit ATANREM eq'uqertiin anguyalriit-llu nunakarniirucatgu.