Read Yupik Jeremiah 26 Bible Online

Jeremiah 26 - Yupik bible

Jeremiah 26

¹Angayuqrurrnerarluku Jehoiakim-aaq Josiah-m Judah-m angayuqran qetunraa,

²ATANREM qanrutaanga, “Nangerrluten elaqlianun Agayuviim qanrutkiki tamalkuita alerquutekellrenka qanrutkesqelluki yugnun agayuyalrianun nunainek Judah-m. Carraungraan uitaciiyaqunak.

³Pitsaqevkenateng niicuartut umyuarnayaguciluteng-llu assinrilngurnek ayuqucimeggnek. Tuatnakata, wiinga-llu pinricen̄arciqaqa piqataryaaqelqa ellaitnun assiiluciat pitekluku.”

⁴Waten qanruciiqaaten, “Waten ATANEQ qanertuq: Niitarkaunrilkuvcia, maligtaqusqellemni alerquuteka cikiutekelqa elpecen̄un,

⁵atuusqelluki-llu qanellrit pistem̄a prophet-aat arulaiqsaunii ayagcequrallma elpecen̄un, niiteksaileng'e'rpeciki,

⁶nutaan-llu uumun Agayuvigpagmun piciqua Shiloh pillrucimtun,[6] tamarmeng-llu atanruvillgutkelriarin ellarpiim aniqlaagiaqameng uum nunarpiim atra aturluku aniqlaagilarciqut.”

⁷Agayulirtet, prophet-aat-llu yuut-llu tamarmeng niitaat Jeremiah makunek qalartellrani Agayuvigpagmi.

⁸Jeremiah-m-llu qaqicaki ATANREM qanrutkesqellri tamalkuitnun yugnun, agayulirtet prophet-aat yuut-llu teguat, qanerluteng “Tuquarkauguten!

⁹Ciin qaneryariurcit ATANREM atrakun qanerluten, Una Agayuvik Shiloh-atun ellirciquq, una-llu nunarpak yuirulluni.” Tamarmeng-llu yuut Jeremiah-m avatiinun quyurtut Agayuvigpagmi.

¹⁰Ciuliqagtain Judah-m makunek niicameng, angayuqam eniinek cukangnaqluteng ag'ut Agayuvigpagmun aqumluteng-llu iteryaraani Nutaram Amiigem.

¹¹Tua-i agayulirtet prophet-aat-llu qanertut ciuliqagten̄un yugnun-llu, “Una yuk picirkiurumanarquq tuqucimaallerkaanun, qaneryariuran inglulirluku una nunarpak, elpeci ciutevciuggun niitellrucirpecetun.”

¹²Tua-i Jeremiah qanertuq atanerruanun tamalkuitnun-llu yugnun qanerluni, “ATANREM ayagcetellruanga qanrutkesqelluki tamalkuita qanellrenka niitelci una Agayuvigpak pitekluku, una-llu nunarpak pitekluku.

¹³Taumek yuullerci caliaci-llu cimirciki, maliggluku-llu qaneryaraa ATANREM Agayutevci. Tuatnakuvci umyualinqigciiquq pinricen̄arluku akeqnerrlugun piarkaullni elpecen̄un.

¹⁴Wiinga tau͡gaam wani-wa elpecen̄un tunumaunga! Piniarpecia elpecen̄un pitalqeggngalngurkun.

¹⁵Una tau͡gaam nallunriciu: tuquskuvcia, tuqutnarqenrilnguum auga tuc'etarkaugarci elpecen̄un uumun-llu nunarpagmun yuinun-llu, tua-i ilumun ATANREM elpecen̄un ayagcetellruanga makunek tamalkuitnek qanresqellua niitevkarluci.”

¹⁶Tua-llu ciuliqagtet yuut-llu tamarmeng qanertut agayulirten̄un prophet-aanun-llu, “Una yuk tuqutnarqelriarunrituq, qalarcan wangkutnun atrakun ATANREM Agayutemta.”

¹⁷Tamatum-llu nunam ciulirnerin ilait qanertut taukunun quyungqalrianun, qanerluteng,

¹⁸Michah Moresheth-aarmiu qaneryariullruuq Hezekiah-m angayuqrullran Judah-mi nalliini, yuut-llu Judah-rmiut qanrutellrui: Waten ATANEQ Artuqailnguq qanertuq, Zion-aaq itumcimaarkauguq naucetaarvigtun; Jerusalem-aaq-llu imenrurciiquq, Agayuvigpiim-llu uitavia qemiq napat amllellriit nauciqaat.

¹⁹Angayuqam Hezekiah-m Judah-m-llu yuin tuqutellrunritaat Micah. Tau͡gaam, Hezekiah qigcigyugluni ATANERMEK kaigavikaa takumcukesqelluni, ATANREM-llu umyuani cimillrua qanrutkellni picurlagpak piciurcetevkenaku taukunun. Wangkuta tau͡gken watua picurlagpak wangkutnun tekicetqatararput. (

²⁰Allamek cali yugtangqellruuq qaneryariulriamek ATANREM atrakun, Uriah-mek Shemiah-m qetunraanek, Kiriathjearim-aarmiumek. Qaneryariullruuq Jeremiah-tun inglulirluku man'a nuna una-llu nunarpak.

²¹Angayuqam Jehoiakim-aam anguyagten̄i-llu, atanerruat-llu niicamegteki Uriah-m qanellri, angayuqam tuqucetengnaqsaaqaa; tau͡gaam Uriah-m tuqungnaqucini niicamiu, alingellruuq qimagluni-llu Egypt-aamun.

²²Tua-llu Angayuqaq Jehoiakim-aaq Egypt-aamun ayagceciuq, Elnathan-aamek Achbor-am qetunraanek allanek-llu angutnek malilirluku,

²³ut'rutaat-llu Uriah Egypt-aamek Angayuqamun-llu Jehoiakim-aamun ullaulluku, taum tuqutevkaraa temii-llu eggluku yuut cailkaat tungmaggviatnun.)

²⁴Tau͡gaam Ahikam-aam, Shaphan-aam qetunraan, ikayuraa Jeremiah tua-i yugnun tunumavkenani tuqucestekainun.