Read Yupik Jeremiah 27 Bible Online

Jeremiah 27 - Yupik bible

Jeremiah 27

¹Ak'anun pivkenani kinguakun angayuqrurtellran Judah-mi Zedekiah-m, Josiah-m qetunraa, una qaneryaraq taiguq Jeremiah-mun ATANERMEK.

²Waten qanrutaanga ATANREM, Uskuri qecignek muragmek-llu atmautarmek, all'ukek-llu uyaqurpenun.

³Qanrucarturceski Edom-aam, Moab-am, Ammon-aam, Tyre-am, Sidon-am-llu angayuqri, pistaitgun taillerteggun Jerusalem-aamun, Angayuqaq Zedekiah tangerrsarturtelluku.

⁴Waten qanresqen̄iaten ciuliqagtaitnun, Waten qanertuq ATANEQ Artuqailnguq, Israel-aam Agayutii: Waten ciuliqagtevcen̄un qanrarkauguci:

⁵“Wiinga piniqa aturluku artuqailucimkun-llu piliaqellruaqa nuna, yuut, ungungssit-llu nunam qainganelnguut, cikiutek'laraqa-llu kitumun imumun wiinga piullemnun.

⁶Wiinga cikiutekellruaqa nuna man'a tamalkuan pistemnun Nebuchadnezzar-aamun, Babylon-aam angayuqranun, cali-llu yuilqurmiutarnek ungungssinek cikillruaqa kevgiuresqelluku ellii.

⁷Tamarmeng angayuqauviit kevgiurciqaat, kevgiurciqaat-llu qetunraa tutgarii-llu, elliin nakmiin angayuqauvia cirlakumallerkaan engeliinun; tua-llu amllellriit angayuqauviit angelriit-llu angayuqat pisteksaguciiqaat.

⁸“Tau͡gaam atanruvik wall'u angayuqauvik pisten͞guyuumiilnguq Nebuchadnezzar-aamun, angayuqranun Babylon-aam, wiinga anucimirqecetaarciqaqa anguyagkun, piitnakun, cangerlagkun-llu, qanertuq ATANEQ, nangluki piunrircetnatkamnun Nebuchadnezzar-aamun.

⁹Taumek niicugninriciki prophet-aaci wall'u allat qanlallriit tekitarkaq qanruteksugnganiluku qavangumegteggun wall'u tuqumalriit anerneritgun wall'u angalkumircarakun, taukut waten qanlalriit elpecen̄un, ‘Pisten͞gurrngaituci Babylon-aam angayuqranun.’

¹⁰Iqluurluci yaaqvanun ayaucimaarkaurceciiqaiceci nunavcen̄ek. Wiinga anciiqamci, piunriumaciquci-llu.

¹¹Tau͡gaam kinkut imkut atanruvillgutkelriit maligtaqutellriit Babylon-aam angayuqranun kevgiurluku-llu, nunaitni uitavkarciqanka, nauceciiluki tamaani uitasqelluki, waten qanertuq ATANEQ.”

¹²Ayuqiinek qanrutaqa Zedekiah Judah-m angayuqra, “Maligtaqulluten kevgiurru Babylon-aam angayuqra yui-llu, tua-i unguvaniartuci.

¹³Ciin elpet wall'u yut'en tuquciqseci anguyagkun, piitnaakun, cangerlagkun-llu, ATANREM qanellruciatun tuaten piarkauniluki pisten͞gurcuumiilnguut Babylon-aam angayuqranun?

¹⁴Niicugninriciki prophet-aat waten qanelriit elpecen̄un, ‘Pisten͞gurrngaituci Babylon-aam angayuqranun,’ piciunrilan qanellrat elpecen̄un.

¹⁵Wiinga ayagcetellrunritanka, qanertuq ATANEQ, tau͡gken ellait tekitarkamek qalartut piciunrilngurnek atemkun, ayagcetarkaurtelluci wangnun piunrillerkarpecen̄un, elpeci prophet-aat-llu qalarucesceci makunek iqluurutnek.”

¹⁶Tua-llu qanrutanka agayulirtet yuut-llu waten ATANREM qanellranek: “Ukveqsaqunaciki prophet-aat qanengraata Agayuvigpiim qununarqelriit aklui tamaa ut'rucimaqatarniluki Babylon-aamek. Iqluurluteng tuaten qalarcata elpecen̄un.

¹⁷Niicugnivkenaki; kevgiurciu angayuqra Babylon-aam unguvaniartuci. Ciin una nunarpak imenrurcarta?

¹⁸Piciuluteng prophet-aarukuneng qanresqellemnek-llu qanerkangqerquneng, ellaitnun apcecia, ATANEQ Artuqailnguq, Agayuvigpiim qununarqelriit aklui uitaqallret, angayuqam-llu eniinelnguut ayaucimasqevkenaki Babylon-aamun.”

¹⁹Waten ATANREM Artuqailnguum qanrutkai naparyat, mer'em assigtaa, elliiviit allat-llu assigtat wani nunarpagni uitalriit,

²⁰Nebuchadnezzar-aam, Babylon-aam angayuqran ayautenritellri, ayautellerminiki Jerusalem-aamek Babylon-aamun Jeconiah Jehoiakim-aam qetunraa, Judah-m angayuqran, yuut-llu piuranrit Judah-mi Jerusalem-aami-llu—

²¹waten ATANEQ Artugailnguq, Israel-aam Agayutii, qanertuq qemangqaat tegumallrunrilnguut Agayuvigpagmi, angayuqam-llu eniini Jerusalem-aami:

²²Ayaucimaarkaugut Babylon-aamun tuanlluteng-llu pillerkiurama engeliinun. Nutaan-llu ataam ut'ruciiqanka wavet nutem uitavillratnun. Wiinga, ATANEQ qanertua.