Read Yupik Jeremiah 28 Bible Online

Jeremiah 28 - Yupik bible

Jeremiah 28

¹Tuani allrakumi, iralut tallimiitni allrakut cetamiitni Zedekiah-m angayuqrurtellran Hananiah, Azzur-aam qetunraa, prophet-aaq Gibeon-aarmiu, qanertuq wangnun Agayuvigpagmi. Agayulirtet yuut-llu takuatni qanrutaanga

²ATANEQ Artuqailnguq Agayutii Israel-aam qanerniluku: “Babylon-aam angayuqran pinia navgaqa.

³Allrakuk malruk iluagni maavet ut'ruciiqanka Agayuvigpiim aklui Nebuchadnezzar-aam maaken ayautellri Babylon-aamun.

⁴Ut'ruciiqaqa-llu ataam maavet angayuqra Judah-m Jehoiachin-aaq, Jehoiakim-aam qetunraa, tamalkuita-llu Judah-m yui ayaucimallret Babylon-aamun, tua-i wii piniaruceciiqngamku Babylon-aam angayuqra, ATANEQ qanertuq.”

⁵Prophet-aam Jeremiah-m qanrutaa prophet-aaq Hananiah ciuqerratni agayulirtet yuut-llu nangengqalriit eniini ATANREM;

⁶waten qanerluni, “Amen! Ilumun ATANEQ tuaten pikili qanellren piciurtelluku, ut'rulluki Agayuviim aklui yuut-llu ayaucimallret Babylon-aamun.

⁷Tau͡gaam watua niicugniu una qanrutkarkaqa niitelluten ukut-llu tamalkuita yuut.

⁸Ciuqlipuk prophet-aat avaken ciuqvanek ayagluteng qaneryarangqelallruut anguyagarkanek, piitnallerkanek, cangerlagnek-llu tut'arkanek amllernun nunanun angelrianun-llu angayuqauvignun.

⁹Tau͡gken prophet-aaq qanqan uitanqegcinarqelriamek tekitarkamek, tamana-llu qanrutkellra piciureskan, tua-i nallunaiciiquq ilumun tauna prophet-aaq ATANERMUN ayagcetellrucia.”

¹⁰Tua-i Hananiah-m uskuram murak canirutii Jeremiah-m uyaqurrinek teguluku ayemtaa.

¹¹Hananiah-llu qanerluni ciuqerratni yuut, “Waten qanertuq ATANEQ: Tuaten-llu wiinga ayemciiqanka Nebuchadnezzar-aam uskuriutellri uyaqurritnun tamalkuita atanruviit yuitnun; man'a piciqaa allrakuk malruk iluagni.” Jeremiah tau͡gaam tuaken ayagtuq.

¹²Ak'anun pivkenaku kinguakun Hananiah-m ayemtellran uskuram canirutii Jeremiah-m atullran, ATANREM Jeremiah qanrutaa.

¹³“Ullagluku Hananiah qanrucarturru, ‘Waten ATANEQ qanertuq: Ayemtellruan murak uskuram canirutii, tau͡gaam wii cimirkaanek piliciqua cavigmek canirutmek.

¹⁴Waten qanertuq ATANEQ Artuqailnguq Israel-aam Agayutii: Wiinga elliigua ukut atanruviit yuita uyaqurritnun cavignek uskurat canirutaitnek pisten͞gurrluki Nebuchadnezzar-aamun Babylon-aam angayuqranun, ellaitnun kevgiuresqelluku, elliinun cali cikiutekellruamki yuilqum ungungssii pisten͞gusqelluki elliinun.’”

¹⁵Jeremiah-llu qanertuq prophet-aamun Hananiah-mun, “Niicugni, Hananiah, ATANREM ayagcetellrunritaaten, ukut yuut iqluurluki ukvercetaten.

¹⁶Taumek ATANEQ waten qanertuq: Nunam qainganek au͡g'arciqamken. Mat'umi allrakumi tuquciquten, qalarcavet yugnun ATANERMUN ingluliurutkaitnek.”

¹⁷Tuani allrakumi, iralut malrunelgatni, prophet-aaq Hananiah tuquuq.