Read Yupik Jeremiah 29 Bible Online

Jeremiah 29 - Yupik bible

Jeremiah 29

¹Waniwa una prophet-aam Jeremiah-m igallra Jerusalem-aamek, ciulirneritnun nunameggnek ayaucimallret, agayulirten̄un, prophet-aanun, tamalkuitnun-llu yugnun Nebuchadnezzar-aam nuniitnek ayautellrinun Jerusalem-aamek Babylon-aamun.

²Una igalqaa kinguatgun Angayuqaq Jehoiachin-aaq, aanii, angayuqam eniini atanerruat, ciuliqagtet Judah-mi, Jerusalem-aami, munalriit-llu calistet ayaucimallrata.

³Una igaq tunellrua Elashah-m Shaphan-aam qetunraanun, Gemariah-mun-llu Hilkiah-m qetunraanun, taukuk Judah-m angayuqran Zedekiah-m ayagcetellruak Babylon-aam angayuqranun Nebuchadnezzar-aamun. Igaq waten qanerluni:

⁴Waten qanertuq ATANEQ Artuqailnguq, Israel-aam Agayutii, nunameggnek ayaucimallernun Jerusalem-aamek Babylon-aamun:

⁵Eneliluci uitavikiciki; nauceciiluci nericiki naugait.

⁶Nulirturluci irniangluci-llu; qetunraci nuliangevkarluki, panici-llu uingevkarluki, irniangnaurtut; yugyangnaurtuci ikegliinarpek'naci.

⁷Calici elluarrluni 'gilertellerkaanun nunarpak ayagvikevkalqa nunasi unilluku, piicautaqluku-llu ATANERMUN, tua-i elluarrluni pikan elpeci-llu elluarrluci piciqngavci.

⁸Tua-i qanran waten ATANEQ Artuqailnguq, Israel-aam Agayutii: Prophet-aanun, ciunerkarcutulinun-llu akunlevcen̄i uitalrianun iqluurcecaqunaci, niicugniksaunaki qavangumeggnek qanengraata,

⁹iqluurluteng qalarcata atqa aturluku; wiinga ayagcetellrunritanka, qanertuq ATANEQ.

¹⁰Waten qanertuq ATANEQ: Babylon-aam allrakut yuinaat arvinlegen qulnek cipluku (70) pellukaki, ullagciqamci, akqutkelqa-llu elpecen̄un aturluku ut'ruciiqamci maavet nunamun.

¹¹Wiinga piarkiuranka elpecen̄un, qanertuq ATANEQ, assilriim tungiinun assiitellriim tungiinun pivkenateng nallunrilamki, neryuniurutkellerci piksagutesqelluku.

¹²Nutaan elpeci qayagaurciqerpecia ullaglua-llu piicagviklua, wiinga-llu niiciiqamci.

¹³Yuarciqerpecia nalaqeciqerpecia-llu; tua-i yuarciqngavcia ircaqurpeciuggun tamalkirrluci.

¹⁴Nataqeciqerpecia wiinga-llu tukuuteci ataam piksaguceciiqanka quyurrluci-llu nunanek tamalkuitnek ayagcesvillemnek, qanertuq ATANEQ.

¹⁵Waten qanravci, ATANREM cikillruakut prophet-aarkamten̄ek Babylon-aami,—

¹⁶Waten qanrutkaa ATANREM angayuqaq aqumgalria David-aam atanruvian aqumllerrani, yuut-llu wani nunarpagmi uitalriit, tungelquci unegtellret maligtevkenaci nunavcen̄ek ayagcecimallerpecen̄i.

¹⁷Waten qanertuq ATANEQ Artuqailnguq, Tuc'etqataranka ukunun yugnun: anguyiit, piitnaq cangerliit-llu, tepsarqelriatun atsatun ayuqlirivkarciqanka assiitem ugaani neryunaunateng.

¹⁸Maligciiqanka anguyagkun, piitnakun, cangerlagkun-llu, atanruviit-llu nunam qaingani tangerrluki alingeciqut. Natmun tamiinun cekavtellemnun, yuut tatamurraciqut cakneq-llu alikluku ellaitnun tut'elleq. Yuut picingssautek'larciqait atrit-llu acivaqaniratekluki.

¹⁹Makut ellaitnun tuciiqut maligtenrilatki qanellrenka, qanertuq ATANEQ, taqsuarirlua ayagcet'lallrenka elpecen̄un kevgamkun prophet-aatgun, tau͡gaam elpeci niicunrituci, qanertuq ATANEQ.

²⁰Tamarpeci ayagcetlemni Jerusalem-aamek Babylon-aamun, niiciu qaneryaraa ATANREM:

²¹ATANEQ Artuqailnguq Israel-aam Agayutii, waten qanertuq Ahab-aq qetunraa Kolaiah-m, Zedekiah-llu qetunraa Maaseiah-m pilukek, qaneryariulriik tekitarkanek iqluurlutek wiinga atqa aturluku: Tunciqagka Nebuchadnezzar-aamun angayuqranun Babylon-aam, elliin-llu tuquciiqak elpecen̄un tangvagtellukek.

²²Taukuk ayagneqlukek waten aniqlaagilarciqut tamarmeng ayaucimallret Judah-mek Babylon-aamun: “ATANREM ayuqevkarliten Zedekiah-tun, Ahab-atun-llu angayuqran Babylon-aam maniallregketun kenerkun.”

²³Waten pimaarkauguk angtuamek assiilngiagnek akusrarutekilutek iqluurlutek-llu ATANREM atrakun. Inglulirluku ATANREM pisqutii; elliin-llu tamana pillrak nallunritaa, nallunritesten͞guluni-llu elkegnun. ATANEQ qanertuq.

²⁴Shemaiah-mun Nehelam-aarmiumun waten qanqina:

²⁵Waten qanertuq ATANEQ Artuqailnguq Israel-aam Agayutii: Ayagcecillruuten iganek aterpegun yugnun tamalkuitnun Jerusalem-aamelngurnun, Zephaniah-mun-llu qetunraanun Maaseiah-m agayulirtem̄un, tamalkuitnun-llu agayulirten̄un qanerluten,

²⁶ATANREM agayulirten͞gurcetellruaten enairluku Jehoiada agayulirta, murilkesqelluku Agayuvigpak usvilluggluteng qaneryariulrianek, tamakut kelucaucesqelluki uyaqurritgun-llu kalivnercirluki.

²⁷Ciin tua-i inerquqsaiciu Jeremiah Anathoth-aarmiu qaneryariulria elpenun?

²⁸Qanrucecakut wangkuta Babylon-aamelngurni qanerluni, “Ak'anun tamaani uitaciquci; enelici uitavikluki-llu, nauceciiluci-llu naugait-llu nerluki.”

²⁹Zephaniah-m agayulirtem una igaq naaqaa niitelluku prophet-aaq Jeremiah.

³⁰Tua-llu ATANREM Jeremiah qanrutaa:

³¹“Qaneryaraq man'a ayagcessgu tamalkuitnun ayagcecimallernun nunameggnek, waten qanelria, ‘Waten ATANREM qanrutkaa Shemaiah Nehelam-aarmiu: Shemaiah qaneryariuran tut'arkanek ayagcetellrunrilengramni, cacetuqutekivkarluci piciunrilngurmun,

³²taumek waten qanertuq ATANEQ: Wiinga anucimirqecetaarciqaqa Shemaiah Nehelam-aarmiu kinguvertuumaan; yuin iliitnek unguvalriartaiciiquq tangertekaitnek assilriit caliarkama yumnun, qanertuq ATANEQ, tua-i-wa inglukutnek qalarcan ATANERMUN.’”