Read Yupik Jeremiah 3 Bible Online

Jeremiah 3 - Yupik bible

Jeremiah 3

¹ATANEQ qanertuq, “Angutem avveskaku nuliani, tauna-llu arnaq elliinek ayagluni, allam-llu angutem nuliqsagulluku, ataam-qaa taum angutem uterrvikciqaa? Mat'um qaqilluku nuna menuurcaraa. Tau͡gaam, Israel-aaq, amllernek kenkuurtengqellruuten; tau͡gken watua waniwa ataam utercugtuten wangnun!

²Iigken nalugkek qemit kangritnun camek naumalriartailngurmun, kiarrluten-llu! Nani anguciullrunricit? Tumyarat taqruitni utaqalgilallruuten kenkurtekarpenek, Arab-atun yuilqumi utaqalgilriatun yugnek uayaararkaminek. Nuna assiirutan akissuullerpegun.

³Taumek ellarvagaksailnguq, up'nerkangraan-llu ellalliqsaunani. Tau͡gken elpet tangellren akissutun ayuquq; elpet-llu kasnguyuutaunak.

⁴“Watua-llu qanertuten wangnun, ‘Atakamken, kenkellruarpenga-llu mikelnguurraanemnek.

⁵Qenerterrlainarngaituten; akwarpak qenrusngaitarpenga.’ Israel-aaq, tuaten qanellruuten, tau͡gken assiilnguq atullruan piyugngatacirrarpetun.”

⁶Josiah angayuqrullrani ATANEQ qanertuq wangnun, “Tangellruan-qaa Israel-aam, taum piciunrilnguum arnam, pillra? Tunutellruanga, tamaitnun qertulrianun qeminun mayurluni, tamaitni-llu napat cungagcelnguut aciitni akissullruuq?

⁷Wiinga-llu umyuarteqsaaqua, Waten pirraarluni pinritevkenani wangnun uterciiquq. Tau͡gaam utertenrituq, piciunrilnguum-llu alqaan, Judah-m, tangrraa tuaten pillrani.

⁸Judah-m-llu tangellrua wangnun avvutellrucia Israel-aaq ayagcetellrucia-llu wangnek ayagluni akissuurtellruan. Tau͡gaam Judah, Israel-aam piciunrilnguq alqaa, alingellrunrituq, ellii-llu akissuurrmiluni

⁹watqapik-llu kiaresngialutkenritaa. Nuna menuurtaa, akusrarutekevkallruuq-llu agayulallermikun teggalqunun napanun-llu.

¹⁰Tamakut-llu pingraata, Judah, Israel-aam piciunrilnguq alqaa, pinguarluni uterrnguallruuq wangnun; ilumuuluni pillrunrituq. Wiinga, ATANEQ qanertua.”

¹¹ATANEQ-llu qanertuq wangnun, Piciunrilnguq Israel-aaq nasvagaa pinarqenrillrucini piciunrilngurmi Judah-mi.

¹²Ayagluten makut qaneryarat qanruteksarturki negeqvam tungiinun, qanerluten, “Piciunrilnguuq Israel-aaq, wangnun uterten. Wiinga takumcutalriaruama eq'errusngaitamken-llu, qanertuq ATANEQ; nangyuilngurmek eq'errusngaitamci.

¹³Pinarqelriarucirci apervikuatekluku, inglulillerci-llu ATANEQ Agayuceci. Apervikuatekluku tamaitni cungagcelnguut napat aciatni kenkutsi tunellruniluku allanun agayutnun, cali-llu alerquutenka niisngallruvkenaki, Wiinga, ATANEQ, qanertua.

¹⁴“Piciunrilngurni yugni, uterci wangnun; wiinga pikamci. Teguciiqua ilavcen̄ek ataucimek nunarpagnek, malrugnek-llu yuullgutkelriignek, ut'ruciiqamci-llu Mount Zion-aamun.

¹⁵Qusngiliurtekarpecen̄ek cikirciqamci maligtaqutellrianek wangnun, eliceciiqaiceci taringevkarluci.

¹⁶Yugyangkuvci-llu tamaani nunami, yuut qanruteknanrirciqaat Akqutem Yaassiiga wiinga pika. Umyuaqnanrirciqaat, wall'u neq'akngaunaku; yuarnakngaunaku-llu, allamek-llu pilingaunateng.

¹⁷Tauna pillerkaq tekiskan Jerusalem-aaq aterpagcimaciquq ‘Atanruvik Aqumllera ATANREM,’ tamarmeng-llu atanruviit tuavet quyurciiqut ciuqerranun ATANREM Jerusalem-aami, tuani-llu ciumuanrirciqut umyuarteng atungnaqenrirluku.

¹⁸Taukuni ernerni Judah-m yui ilauciiqut Israel-aam yuinun, quyurmeng-llu neglirnermek nunamek taiciqut nunamun cikiuteklemnun ciuliarpecen̄un piku'uraasqelluku.”

¹⁹ATANEQ qanertuq, “Israel-aaq, wiinga ciuniuryullruyaaqamken nakmiin yuk'ellriatun cikirluten-llu nunanirqelriamek nunamek, kinguvanertaqesqelluku tangssunarqenrat tamarmeng ellarpagmi nunani. Atavnek-llu tuqlularnayuklua pillruyaaqua, avtenqigtevkenak-llu wangnek.

²⁰Tau͡gaam allaliuryulriim arnam unitelauciatun uini, tuaten-llu elpeci piciullrunrituci wangnun, Israel-aam yuini, qanertuq ATANEQ Agayutiit.”

²¹Erina niitnauguq qemit kangritni: Israel-aam yukai qialuteng takumcucaralriit yuullruameng assiilnguq aturluku, nalluyagulluku ATANEQ Agayutseng.

²²“Uterci, piciunrilngurni yugni, piciunrilucirci wiinga mamn̄iaqa.” Qanertuci, “Aa-ang, elpenun uterciiqukut; tua-i elpet ATANEQ Agayutekngamteggen.

²³Wangkuta ikayuumanritukut agayungramta agayutnguanun qemit qaingitni. ATANEQ Agayutvut kiimi anirturtekaa Israel-aam.

²⁴Tau͡gaam ayagyuallemten̄ek ayagluni kasngunarqelriim piunrillrui tamalkuita ciuliamta cakviurutellrit, katngautait, qetunrait paniit-llu.

²⁵Wangkuta inartelta kasnguyugluta, kasngunarqucimta patulikut; tua-i-wa assiilngillruamta ATANERMUN Agayutemten̄un, wangkuta ataput-llu, ayagyuarraanemten̄ek erneq una tekilluku; ATANREM-llu Agayutemta erinii maligtaqullruvkenaku.”