Read Yupik Jeremiah 30 Bible Online

Jeremiah 30 - Yupik bible

Jeremiah 30

¹ATANREM Jeremiah qanrutaa:

²“Waten qanertuq ATANEQ Israel-aam Agayutii: igauski kalikarmun tamalkuita qanrutkellrenka elpenun.

³Erenret agiirtut, qanertuq ATANEQ, yum'a piklermeng ataam piksagutellerkait, Israel-aam Judah-m-llu, ut'ruciiqanka nunamun cikiuteklemnun ciuliaritnun, ataam-llu ellaita piksaguciiqaat.”

⁴Ukut waniwa ATANREM qanellri Israel-aaq Judah-llu pilukek:

⁵“Waten qanertuq ATANEQ: Wangkuta niitukut erinamek nanikualuni, alingelriamek, uitanqegcivkenani.

⁶Elpecen̄ek apluci umyuangcarci! Angun-qaa mikelngurmek irniyugngauq? Ciin-mi tua-i angutet tangellma aqsateng cavingaitki teggiurcilriatun arnatun? Ciin-llu kegginait tamarmeng qakivakartat?

⁷Erneq irranarqelria agiirtuq tuaten ayuqellriamek ernertaituq yum'a cakneq nangteqlerkaatnek, tau͡gaam cavkenateng pellugarkauluku.”

⁸ATANEQ Artuqailnguq qanertuq, “Tauna erneq tekiskan navegciqanka atmautait au͡g'arluki uyaqurritnek, qillerqutait kevkaqluki allanernun pisten͞gunriisqelluki.

⁹Tau͡gaam kevgiurciqaat ATANEQ Agayutseng, David-aaq-llu angayuqerteng, elliin kinguvranek nangerciarkaungama angayuqrurrluku.

¹⁰“Taumek alingenrici, yumni; ciunerkairutevkenaci-llu, Israel-aam yuini. Tua-i wii anirturarkaungamci, yaaqvanelngurmek nunamek, tuaken yaaqvanelngurmek kinguveci teguarunrirtelluki. Uterciiquci uitanqegciluci uitaarkauluci; cam-llu alingevkarngairulluci.

¹¹Tua-i wiinga nayuamci anirturnaluci, qanertuq ATANEQ. Ullagciqamci anirturnaluci, qanertuq ATANEQ. Piunrirciqanka atanruviit tamakunun cekavtellrukemci, tau͡gaam elpeci piunrirngaitamci. Wiinga anucimirqecetaanrilngaitamci; tau͡gaam anucimirqecetaarciqamci pitalqeggiluku. Wiinga, ATANEQ qanertua.”

¹²Waten ATANEQ qanertuq yum'inun: “Kilineci assiringaitut, aknirtelci-llu mamyuilnguuluteng.

¹³Yugmek atauciungraan aulukestekaituci, iinrukaunateng callaneci, qaillun assirillerkaunaki.

¹⁴Tamarmeng kenkestevvet nalluyagutaatgen, caukenriraatgen. Inglukestevtun pitarilua callugamken; anucimirqecetaarluten takumcuyuyuilngurtun tua-i-wa assiilnguten amllerrata, angqapiggluni-llu assiilucin.

¹⁵Akngiringalten qanemyuugautekviiqnaki; assiritkarpenek iinrutaituq. Pinarquten angelriaruan, assiilnguten assinritqapigcata, waten ayuqellriamek anucimirqecetaaramken.

¹⁶Tau͡gaam maa-i piunrirteten piunriumaciqut, inglukesteten ayaucimaciqut itercivignun. Tamarmeng nangcillret elpenek nangcimaciqut, uayartelten-llu uayaumaciqut.

¹⁷Tua-i-wa wiinga ataam assirivkarciqngamken, kilineten-llu mamevkarluki, qanertuq ATANEQ, inglukesteten qanengraata, Zion-aaq ancimalriaruuq; kia-llu yuum atauciunger'mi caukenritaa.”

¹⁸Waten qanertuq ATANEQ: “Yumnun ataam piksaguceciiqaqa nunautiit takumcukluki ilakuralriit; Jerusalem-aaq ataam naucimaciquq, angayuqam-llu enii ayuqucillermitun ayuqliriciquq.

¹⁹Yuut tamaanelnguut aturciqut nanrautnek; qayagpagaciqut nunaniryugluteng. Atawaqerceskumteng yugyangciqut; atawaqaasqutemkun-llu qigcignarivkarciqanka.

²⁰Atanruviim piniq pikellra ak'a piksaguceciiqaqa elkarrluku asvairiluku ellaitnun; anucimirqecetaaraqluki nangtestait.

²¹Atanirturtengqerciqut ilameggnek, atanirturtengciqut nakmiin yum'egnek kingunelegmek. Tauna-llu pisqekumni iluvarciquq wangnun, yuk wangnun tainguaqaunrilan pisqumavkenani.

²²Elpeci wiinga yuk'eciqamci, wiinga-llu elpeci Agayuteklua.”

²³Tangerrluku ATANREM eq'uqertii ayagtuq ellarayagtun, ull'uyaatun tull'uni yugnun assiitellrianun.

²⁴Alingnarqelria eq'uqertii ATANREM taq'ingaituq elliin umyuamikun piarkaullni piciurrnatkaanun. Kinguqvaarni man'a taringeciqerci.