Read Yupik Jeremiah 31 Bible Online

Jeremiah 31 - Yupik bible

Jeremiah 31

¹Waten qanertuq ATANEQ, “Taum nalliini Israel-aam yuin tamarmeng Agayutkeciqaatnga, ellait-llu wii yukluki.”

²Waten qanertuq ATANEQ, “Yuut tuqullrunrilnguut anguyagkun takumcukumallruut yuilqumi; Israel-aam yui mernuiryuumillratni,

³ATANREM alairvikellrui yaaqvanek. Israel-aam yuini, kenkamci iquilngurmek; taumek taqeksaunii piciulua pilalrianga elpecen̄un.

⁴Ataam cali nauvkarciqamci, elpeci-llu nauciquci, aturcetaarluci yuralangciquci nunaniryugluci.

⁵Nauceciilangciquci-llu ataam wine-arkanek qemimi Samaria-mi; tamarmeng-llu nauceciillret wine-arkanek nerlarciqut tamakut naugillritnek.

⁶Erenret-llu iliitni murilkesta qayagaurciquq Ephraim-aam qemiinek: ‘Nangerrluci, mayurnaurtukut Zion-aamun, ATANERMUN Agayutemten̄un.’”

⁷ATANEQ qanertuq, “Atuuciu angniulluku Israel-aaq, angenkacagiit atanruviit. Aturci nanrautevcen̄ek yuarutnek, ‘ATANREM anirtullrui yun'i tamalkuita uitaqallret.’

⁸Taiciiqanka negeqvamek nunamek, quyurrluki-llu yaaqvanek nunanek. Malingqerciqut cikmiumalrianek, tussitellrianek, qingalrianek, teggiurcilrianek-llu irniqatarluteng; Yugyagluteng maavet uterciiqut.

⁹Uterciiqut aluviliurluteng, piicagluteng ut'rulluki ciuliqagtellemni. Piyuavkarciqanka kuiget melget caniatgun tumyarakun-llu manigcetellriakun paallagnailngurkun. Atakellriatun wii Israel-aam ayuqaanga, irniama Ephraim-aaq ciuqlikacaaqluku.”

¹⁰ATANEQ qanertuq, “Atanruvigni, niicugnicia qanrutekluku-llu qaneryaraqa yaaqvanelnguut imarpiit cen̄aitni. Waten qanra, Cekavcetellrata Israel-aat ataam quyurciiqai, aulukluki-llu qusngiliurtem katngagnek aulukilauciatun.

¹¹ATANREM teguarunrircetellrua Israel-aaq, anirturluku-llu elliini pininrulriamek.

¹²Tailuteng aturpagciqut nunaniryugluteng Ingrimi Zion-aami, quyaluteng ellaitnun cikiutemnek: mukaarkanek, wine-amek, uqumek, kuluvagnek qusnginek-llu cikiutemnek. Mermek nuryugcinrilngurtun naucetaarvigtun ayuqeciqut; camek nuryugcivkenateng.

¹³Nasaurluut yurarciqut angnirluteng, angutet-llu ak'allaurtellriit ayagyuat-llu ayuqluteng nunaniryugciqut. Wiinga qarulluki angniitellrat mumigciiqaqa angnimun.

¹⁴Agayulirtet nerevkarciqanka assinkacagarnek neqkanek nuuqairulluki wiinga yuunka. Wii ATANEQ qanertua.”

¹⁵Waten qanertuq ATANEQ, “Ramah-mi erinamek niitut, qivruluni qiaqapigtellriamek. Rachel-aam qiatekngaki irniani, qarutesciiganani tua-i-wa catairucata.”

¹⁶ATANEQ qanertuq: Qiallerpenek taqluten, aluviten-llu perrirluki. Tua-i irniarpenek aulukillren akiliumanrilngaituq; uterciiqut inglukestemta nuniitnek.

¹⁷Neryuniurucetangqertuq tekitarkaci; irniaci ataam kingunermeggnun uterciiqut. Wiinga, ATANEQ, qanertua.

¹⁸“Niitaqa Israel-aaq qanertelluku iluteqluni, ‘ATANEQ, nuyurtalriatun ungungssiartun ayuqua, tau͡gaam elpet elitnaurarpekut niisngayaramek. Ut'rusnga; upingariunga utercugngarilua elpenun, tua-i-wa elpet ATANRUAVET Agayutka.

¹⁹Wiinga avtellruunga elpenek, tau͡gaam ak'anun pivkenii utercungellruunga elpenun. Anucimirqecetaallerpet kinguani, putengllugtua iluteqlua. Kasnguyuglua kiaresngianii assiilngilallruama ayagyuallemni.’

²⁰“Israel-aaq kenekluku qetunraqaqa, kenkataqluku irniaqaqa. Atra apraqamku, umyuaqelaraqa kenkakun. Ircaqumkun takumcukamken; qanertuq ATANEQ.

²¹Nallunailkutanek naparqi pikarpenek; nallunritniaran nau͡gg'un ayallerkan. Uterten, Israel-aaq, uterten nunanun unitellerpenun.

²²Qaillun pitalriamek nalirugteqatarcit, elpet ukverkilngurmi? Tua-i ATANEQ pilillruan nutaramek nunami: nutarautaluni arnatun aulukilriatun angutmek.”

²³Waten qanertuq ATANEQ Artuqailnguq, Israel-aam Agayutii: Yuut uterceskumki ellaita nuniitnun, ataam cali qanerciqut nuniini Judah-m nunarraini-llu, ATANREM atawaqertelliu tanqilria qemia[7] Jerusalem-aam, tanqilria qemiq elliin uitavia.

²⁴Yuut-llu uitaciqut Judah-mi tamaitni-llu nunarpaini, nauceciiyurtet, qusngiliurtet-llu katngaucetuumarmeng.

²⁵Segg'arceciiqanka mernulriit nerevkarluki-llu camirtelluki kaigluteng piniarutellret.

²⁶Waten yuut qanresqelluki, Qavarraarlua tupagtua segganqegglua.

²⁷Erenret tekiciiqut, qanertuq ATANEQ, yuut ungungssiaraat-llu amllerivkarciqanka Judah-mi, Israel-aami-llu.

²⁸Nuniitnek ayagcetellrucimtun, iquvkallrucimtun, cirliqevkarluki, piunrirluki, tuaten-llu cali ataam nauvkarciqanka.

²⁹Tamakuni ernerni waten qanernanrirciqut: Atait nerellruut quunarqelrianek atsanek, tau͡gken irniarit tau͡gaam quunilluteng.

³⁰Tau͡gaam tamarmeng tuquciqut ellaita assiilngillerteng pitekluku; tamarmeng-llu nerellret quunarqelrianek atsanek, ellait quuniciiqut.

³¹ATANEQ qanertuq, “Erenret tekiciiqut akqillerkaqa nutaramek yuinun Judah-m Israel-aam-llu.

³²Ak'allartun ciuliarit pillgutekluki akqut'liallemtun ayuqngaituq tass'urluki anutellemni Egypt-aamek. Ellaitnun uingulriatun ayuqellrung'e'rma akqun tauna atullrunritaat.

³³Akqun nutaraq piurtarkaqa yuinun Israel-aam Judah-m-llu waniwauguq: Alerquuteka umyugaatnun elliciqaqa igaulluku ircaqruitnun. Wii Agayutkeciqaatnga, wiinga-llu ellait yukluki.

³⁴Yuum-llu ilani elitnaurnanrirciqaa ATANERMEK, tua-i tamarmeng nallunrirciqngatnga, mikelqurrak'acagameggnek ayagluteng angenkacagameggnun. Wiinga au͡g'ariciqanka assiilnguitnek umyuaqenqiggngairulluki.”

³⁵ATANREM pic'et'laraa akerta tanqiusqelluku erenrani, cali-llu iraluq agyat-llu ciqinqaasqelluki unugmi. Imarpik arulalluku ellerrarcet'laraa; waniwa atra; ATANEQ Artuqailnguq.

³⁶Ellii akqiuq piliaqumalriit piyullrata taktaciatun, tuaten-llu pitalriamek Israel-aaq atanruviuciquq.

³⁷Erenret iliitni qilak cuqcimayugngarikan nunam-llu tusnganri yuvriumayugngarikata, tuani tau͡gaam kiingan elliin ciuniurngaitai Israel-aam yui caliallrit pitekluki. ATANEQ qanertuq.

³⁸Erenret tekiciiqut Jerusalem-aam tamarmi ataam naucimallerkaa, wiinga nunarpakciqaqa, Hananel Tower-aamek ayagluku kanaknetmun Kangirami Iteryaraq tekilluku.

³⁹Nunam engeliin cuqii tuaken ayagciquq kanaknalirnermek qemianun Gareb-aam, tuaken-llu uivluni Goah-mun.

⁴⁰Kuignayuk tamarmi, tuqumalriit tungmagingaviat, ciqitaat-llu nuniit, carr'ilqat-llu tamarmeng quliini Kuigem Kidron-aam, Horse-aat Iteryaraat tekilluku tamarmi qigcignarqelriaruciquq ATANERMUN. Nunarpak imcimanqiggngaituq piunriumanqiggngaunani-llu.