Read Yupik Jeremiah 32 Bible Online

Jeremiah 32 - Yupik bible

Jeremiah 32

¹ATANREM qanrutaa Jeremiah allrakut qulngurutiitni Zedekiah-m angayuqrullran Judah-mi, allrakut-llu akimiaq pingayunek cipteqerluku Nebuchadnezzar-aam angayuqrullran.

²Taum nalliini Babylon-aam angayuqran anguyagtain anguyagaat Jerusalem-aaq, Jeremiah-llu prophet-aaq kelucaucimaluni nayurtem uitaviani eniini Judah-m angayuqran.

³Zedekiah-m, Judah-m angayuqran, itertellrua Jeremiah qanerluni, “Ciin qaneryariurcit waten qanerluten, Una nunarpak teguvkaqata'rqa Babylon-aam angayuqranun, elliin-llu teguciqaa;

⁴Zedekiah Judah-m angayuqra anagngaituq tau͡gaam tunumaciquq Babylon-aam angayuqranun; elliin tangrrarkauluku tungaunaku qanellgutkarkauluku-llu;

⁵Zedekiah-llu ayauciiqaa Babylon-aamun, tuani-llu uitaciquq paqnatkamnun, qanertuq ATANEQ; ingluliungerpeki Babylon-aarmiut piciurrngaituten.”

⁶Jeremiah qanertuq, ATANREM qanrutaanga:

⁷Hanamel-aam qetunraan Shallum-aam angagpet ullagciqaaten qanrulluten-llu, Kipusgu naucetaarvika Anathoth-aami uitalria, kiputellerkaa angilluku elpenun ciumek tusngiin.

⁸Tua-llu ATANREM qanellruciatun Hanamel-aaq tungayaka taiguq, qanerluni-llu wangnun, Kipusgu naucetaarvika Anathoth-aami Benjamin-aam nunautiini uitalria, kiputellerkaa angilluku elpenun ciumek tusngiin; kipusgu piksagutniaran. Nutaan nallunri'rqa tamana ATANERMUN qanelqucianek.

⁹Tua-i kiputaqa naucetaarvik Anathoth-aami uitalria tungayamnek Hanamel-aamek akilirluku-llu qerrirlinek akimiaq malrugnek cipluku (17).

¹⁰Atqa-llu igaulluku nunam kalikartaanun, nepyucirluku-llu, nallunritestek-llu atkek igautellukek, akiliutekanka-llu uqamaltassiarluki.

¹¹Tauna-llu kiputellma nallunailkutii nepyuciumalria kalikaq teguaqa, picirkiutnek imalek, ayuqii-llu nepyuciumanrilnguq;

¹²tunlukek-llu Baruch-aamun Neriah-m qetunraanun tauna-llu Mahseiah-m qetunraqluku, takuatni Hanamel-aam tungayama, nallunritestek-llu atkek tuani igausngalriik, Jews-aat-llu tuani aqumgalriit.

¹³Alerquraqa Baruch-aaq taukut takuatni qanerlua,

¹⁴Waten qanertuq ATANEQ Artuqailnguq, Israel-aam Agayutii: Tegukek ukuk kalikaak, aipaa nepyuciumalria aipaa-llu nepyutailnguq, eklukek-llu qikumun assigtamun, ak'anun piumaniartuk.

¹⁵Waten qanertuq ATANEQ Artuqailnguq Israel-aam Agayutii: Enet naucetaarviit-llu ataam kiputnariciqut maani nunami.

¹⁶Tauna kalikaq tunumariamku Baruch-aamun piicagtua ATANERMUN qanerlua:

¹⁷“ATANEQ Agayun, elpet piliaqellruan qilak nuna-llu pinirpegun artuqailucirpegun-llu; ca tamalkuan caperqenrilavgu.

¹⁸Nasvalaran kenken yugnun amllernun, tau͡gken cali anucimirqecetaaraqluki yuut angayuqrita assiilnguit pitekluki, Angtatailnguq Artuqailnguq Agayun atengqelria ATANRATNEK yugugaat,

¹⁹ayuqailnguq ayuqucirtuutmikun, artuqaunani caliamikun; nalluvkenaku yuut caurallrat tamalkuan, nunuliraqluki-llu ayuquciat caliarat-llu cuqluku;

²⁰nallunailkutanek maniilalleq irr'inarqelrianek-llu Egypt-aam nuniini, Israel-aami, allani-llu atanruvigni, man'a erneq tekilluku, nallunrirtelluten-llu yugnun tamalkuitnun.

²¹Anutellruaten yut'en Israel-aat Egypt-aarmiut nuniitnek nallunailkutatgun irr'inarqelriatgun-llu, pinin aturluku, inglukesteput alingevkarluki;

²²cikiraten-llu mat'umek nunamek, akqutkellerpenek ciuliaritnun, nunakegtaar neqkaucilria naungignaqluni-llu;

²³itraat-llu piksagulluku-llu. Tau͡gaam qanellren niisnganritait piyuavikevnaki-llu alerquuteten; elitnauruteten-llu aturpek'naku. Taumek makut assiitellriit ellaitnun tuc'etaten.

²⁴“Babylon-aarmiut pilillruut qertulrianek avatairluku nunarpak tegunaluku, curugaiceci-llu. Anguyiim, piitnam, cangerliit-llu nunarpak ellaitnun cirlakevkarciqaat. Qanrutkellren piciurtuq, elpet-llu tangerrluku.

²⁵Tau͡gken elpet ATANEQ Agayun, qanrutarpenga, Kipusgu naucetaarvik akilirluku nallunritescirluten, nuna Babylon-aarmiut teguarkaungraatgu.”

²⁶ATANEQ qanertuq Jeremiah-mun:

²⁷“Tangerrluku, wiinga ATANEQ, Agayutkaatnga yuut tamarmeng; ca-qaa wangni arturnarquq?

²⁸Waten qanertuq ATANEQ: Una nunarpak cikiutekqata'arqa Nebuchadnezzar-aamun Babylon-aam angayuqranun anguyagtainun-llu, elliin-llu piksaguciiqaa.

²⁹Babylon-aarmiut anguyalriit uumek nunarpagmek taiciqut ekuavkarluku-llu, tapqulluki enet qilait atuulallret elliitnun tepkegcilrianek Baal-aamun cali-llu ellivik'lallrit wine-anek allanun agayutnun, eqcetaarlua qenngevkarlua.

³⁰Israel-aam Judah-m-llu yui camek piksaunateng kiingan tau͡gaam assiilngurmek calilartut tangvallemni ayagyuarraanermeggnek; qenngevkaraqlua caliamegteggun, qanertuq ATANEQ.

³¹Uum-llu nunarpiim yuin eq'urcet'laraatnga piurqaanerminek ayagluni erneq una tekilluku, taumek piunrirarkaureskeka

³²assiilnguq atullrat pitekluku Judah-m Jerusalem-aam-llu yuin, angayuqertuumarmeng, ciuliqagtetuumarmeng, agayulirtait prophet-aarit-llu.

³³Tunutaatnga wii; ayuqucirturturangramteng, niicugniyugpek'nateng elicugpek'nateng-llu.

³⁴Elliaqluki tuaten uuminarqelriit agayutnguateng Agayuvigpagmun taqumallermun wangnun agayuvikarkauluku, tuaten piluteng menuurtaat.

³⁵Ekuavililuteng Baal-amun tuani aterpagcimalriami Hinnom-aam Kuignayuanek, tuqutnaluki irniateng ekuagarkauluki elliitekluki agayutmun Molech. Wiinga alerqullrunritanka waten pisqelluki, tamana-llu umyuamnun ekellruvkenani waten pinayukluki Judah-m yui assiilngirtelluki.”

³⁶Taumek waten qanertuq ATANEQ Israel-aam Agayutii, nunarpak una piluku waten qanrutkellerci, “Cikiutekumauq angayuqranun Babylon-aam anguyagkun, piitnaakun, cangerlagkun-llu.

³⁷Wiinga quyurciiqanka yuut nunanek ayagcesvillemnek cakneq eq'uqertellemni; ut'ruciiqanka maavet uitavkarluki-llu maani camek alingniurpek'naki.

³⁸Ellait wii yuk'eciqanka, ellaita-llu wiinga Agayuteklua.

³⁹Ataucimek umyugirciqanka piyuumiutengevkarluki: qigcikarkaurtellua iquilngurmek, ellaita irniarita-llu assirluteng pitlerkait pitekluki.

⁴⁰Nangengailngurmek akqiciqua ellaitnun. Taqngaunaki assilriit calianka ellaitnun, qigcigyungevkarluki wangnek tamalkirrluki, avtenqigtesqevkenaki wangnek.

⁴¹Tengrukluku assilrianek caliciqua ellaitnun, elkarrluki maavet nunamun taqluki uitaarkaurtelluki.

⁴²“Waten qanertuq ATANEQ: Assiitellriit makut tamalkuita ellaitnun tuc'etellrucimtun, tuaten cali assilriit tuc'eciiqanka ellaitnun akqellrucimtun.

⁴³Naucetaarviit kipucimalarciqut maani nunami waten qanrutkelallerpecen̄i, nunakarniitniluku yugtaunani ungungssiarnek-llu pitaunani, cikiutekumaciqniluku-llu Babylon-aarmiunun.

⁴⁴Akilirluki naucetaarvignek kiputelarciqut, nunam kalikartai imiumalarciqut, takarnarquciumaluteng-llu nallunritestet takuatni, maani nuniini Benjamin-aam, Jerusalem-aam avatiini, nunarpagni-llu Judah-melngurni, nunarpagni-llu qemini uitalriani, qemini-llu ingrit canianelngurni, ungalalirnerani-llu Judah-m. Yuut nunautait ataam piksaguceciiqanka, waten qanertuq ATANEQ.”