Read Yupik Jeremiah 33 Bible Online

Jeremiah 33 - Yupik bible

Jeremiah 33

¹ATANREM qanrutaa Jeremiah aipiriluku, itengqainanrani murilkestem eniini:

²Waten qanertuq nunam piliaqestellra, ATANEQ, nunam elucilirtellra elkarrluku-llu, aterpagingalriim ATANERMEK.

³“Qayagaurcia, wiinga-llu kiuciqamci; qanrulluci-llu angelrianek iirumalrianek nallukevcen̄ek.

⁴Waten ATANREM, Israel-aam Agayutiin, qanrutkai enet wani nunarpagni, enait-llu Judah-m angayuqrin imcimallret capkuciulluki anguyagnun.

⁵Babylon-aarmiut taigut callugyarturluteng tamakut imirarkauluki yuut tuqutarkama eq'uqerrlua temaitnek. Una nunarpak tunutaqa ikayuryuumiirulluku yuin assiilngurmek atullrat pitekluku.

⁶Tau͡gaam ataam assirivkarciqaqa una nunarpak yui-llu temaitgun canrirtelluki. Uitanqegcivkarciqanka alingniunrirtelluki-llu.

⁷Judah Israel-aaq-llu tukuutetgun ulevkarciqagka, ataam-llu nauciiqagka ciungani ayuqucillragcetun.

⁸Carrirciqanka tamalkuita assiilngukek wangnun, au͡g'arillukek assiilngukegnek inglulitaallregkenek-llu.

⁹Jerusalem-aaq angniutnguciquq ucuryagutnguluni-llu wangnun; atanruviit yuit ellam iluani uulegciiqut alingluteng niiskunegteki assilriit caliallrenka Jerusalem-aam yuinun nunarpak-llu tukuutnek ulevkarluku.

¹⁰“Waten qanertuq ATANEQ: maani nunami waten qanrutkellerpecen̄i, ‘Nunakarniituq yugtaunani ungungssiartaunani-llu,’ nunarpaini Judah-m, tumyaraini-llu Jerusalem-aam, maa-i nunanialengraan yugtaunani ungungssiartaunani-llu, ataam niitelangeciquci

¹¹angnilriit erinaitnek, kassuutellriit-llu erinaitnek, atulrianek-llu taitellermeggni quyatnek elliitekameggnek Agayuvigpamnun; qanerciqut, Quyavikiciu ATANEQ Artuqailnguq, tua-i-wa assian, kenkii-llu nangengaunani! Nunam mat'um pikellri ataam piksaguceciiqngamki ciungani ayuqucillratun. Waten qanertuq ATANEQ.”

¹²ATANEQ Artuqailnguq qanertuq: “Maani nunami cakarniilngurmi, yugtaunani ungungssiartaunani-llu, tamalkuitni-llu nunarpaini, qusngiliurtet qaunqilangeciqut katngagnek.

¹³Nunarrarni qemilegmi nunami, qemini ingrit canianelngurmi, ungalalirnerani-llu Judah-m, Benjamin-aam-llu nuniini, nunani-llu avatiini Jerusalem-aam, nunaini-llu Judah-m, qusngiliurtet naaqilangeciqut qusngimeggnek, waten qanertuq ATANEQ.”

¹⁴ATANEQ qanertuq, “Erenret agiirtut piciurtellerkaat akqutekellma Israel-aam Judah-m-llu yuinun.

¹⁵Taum nalliini wiinga cucuklirciqua ellualriamek angayuqerkamek David-aam kinguvranek. Tauna angayuqaq caliarkauluni assirluni elluarrluni-llu tamiini nunami.

¹⁶Jerusalem-aam yui Judah-m-llu anirtuumaciqut camek-llu alingniurngaunateng. Nunarpak-llu tauna aterpagciiqaat, ‘ATANEQ Anirturtevvut.’

¹⁷Waten qanertuq ATANEQ: David-aam kinguvrinek pikailngaituci aqumgaarkamek atanruviim aqumllertaani Israel-aamun angayuqruarkamek

¹⁸agayulirtetangqerturalarciquq-llu Levi-am yuinek kevgiurtekamnek ekuagiluteng elliitnek, mukaarkanek-llu ekualuki elliitnek, tuqutarkat-llu elliitet aulukluki.”

¹⁹ATANEQ qanertuq Jeremiah-mun:

²⁰“Waten qanertuq ATANEQ: Piugarkaunriryugngakuvciu akqutkelqa ernermun unugmun-llu ercuirutelluku unuyuirutelluku-llu piyaraani,

²¹tua-i tuaten-llu akqutkelqa David-aamun navgumayartuq, qetunraanek angayuqauviim aqumllertaanun aqumelriartairulluni, Levi-am-llu yuinun cali akqutkelqa piuyanrituq.

²²Agyat qilagmi naaqumasciigaluciicetun imarpigmi-llu qau͡gyaq cuqcimasciiganani, tuaten amllerivkarciqanka David-aam pistem̄a kinguvri, Levi-at-llu agayulirtet kevgiulriit wangnun.”

²³ATANEQ qanertuq Jeremiah-mun:

²⁴“Murilkeksaitan-qaa camek ukut yuut qalaruciat, ATANREM qessayagutai malruin ilakuralriit cucukellni. Tuaten piluteng caunrilkait yuunka tangellratni-llu atanruviunrirluteng.

²⁵Waten qanertuq ATANEQ: Akqutka piuvkallrunrilkumku ernermun unugmun-llu, qilak nuna-llu elluarrlukek egilertarkaulukek taqellrunrilkumkek,

²⁶tuaten-llu wii qessakeciqanka kinguvri Jacob-aam pistem̄a-llu David-aam, cucuklirngauni-llu kinguvrin iliitnek atanirturisqelluku kinguvritnek Abraham-aam, Isaac-aam, Jacob-aam-llu. Takumcukciqanka yuunka ataam-llu ulevkarciqanka.”