Read Yupik Jeremiah 34 Bible Online

Jeremiah 34 - Yupik bible

Jeremiah 34

¹Qaneryaraq una taillruuq Jeremiah-mun ATANERMEK, Nebuchadnezzar-aam angayuqran Babylon-aam, tamarmeng-llu anguyagtain, tamarmeng-llu angayuqauviit nunam qaingani, yuut-llu nauvillgutkenrilnguut ataniumak'ngain, anguyagaat Jerusalem-aaq tamalkuita-llu nunarpai:

²“Waten qanertuq ATANEQ, Israel-aam Agayutii: Ullagluku Zedekiah Judah-m angayuqra waten qanrusgu, ATANEQ qanertuq: Nunarpak una cikiutekqataraqa angayuqranun Babylon-aam, elliin-llu ekuavkarciqaa.

³Anagngaituten; teguciqaatgen Nebuchadnezzaar-aamun-llu tunluten; tangerciqan angayuqra Babylon-aam qalarulluku-llu tungaunaku; ayagciquten-llu Babylon-aamun.

⁴Zedekiah, Judah-m angayuqran, ATANEQ qanertuq elpet piluten: Anguyagkun tuqungaituten.

⁵Tuquciquten uitanqegciluten, yuut-llu ekuagilaucirmegcetun tepkegcilrianek tungmagciaqameng angayuqrullermek ciuliarpenek, tuaten-llu elpet piciqaatgen ekuagilluten tepkegcilrianek. Angniilutkeciqaatgen qanerluteng. ‘Angayuqerput yuunrirtuq!’ Wiinga, ATANEQ qanertua.”

⁶Nutaan wiinga mat'umek qanrutaqa Angayuqaq Zedekiah Jerusalem-aami

⁷anguyainanratgu nunarpak anguyagtain angayuqran Babylon-aam. Allat cali anguyagtet anguyagaat Lachish-aaq Azekah-llu, kiimek ellilriik nunarpagni asvairqumalriani Judah-mi.

⁸Angayuqaq Zedekiah Jerusalem-aam-llu yui umyuallgutekluteng picirkangellruut peggnaluki

⁹Hebrew-t pisteteng, ayuqluki arnat angutet-llu, ilaseng pistengqerresqumanrirluku Israelite-amek.

¹⁰Tamarmeng yuut ciuliqagtait-llu umyuallgutekluteng piut pegcugluki pisteteng tuaten pinqigcuumiirulluteng. Tua-i tuaten piyullerteng aturluku pegtait,

¹¹tau͡gaam kinguqvaarkun umyualinqigtut, pistekelteng tegunqiggluki, qessangraata-llu ataam pisteksagulluki.

¹²Tua-llu ATANEQ,

¹³Agayutii Israel-aam, qanertuq Jeremiah-mun yugnun qanresqelluku: “Akqutmek taqutellruunga ciuliarpecen̄un Egypt-aamek anutellemni teguarullratnek teguarunrirtelluki, qanerlua,

¹⁴‘Allrakut malrunelgurtaqata tamarpeci pegtelarciqaci Hebrew-rullguteci tunumallret akilirluki elpecen̄un pisten͞gullruluteng-llu elpecen̄un arvinlegni allrakuni; pegtarkaugaci elpecen̄ek kevgiunrirtelluki.’ Tau͡gaam elpeci ciuliavci ilangcillrunritaatnga niitevkenaki-llu qanruyutenka.

¹⁵Ava-i ukaqvaggun umyualinqigtuci piciulria-llu aturarci tangvallemni pegcugluki tamalkuita Israelite-at, akqiluci-llu ciuqamni, Agayuvigpagmi tuani wangnun agayuviketukiitni.

¹⁶Tau͡gaam umyuarci cimirarci qigcikevkenii. Tamarpeci-llu pegciyaaqellerni pistevcen̄ek piyullrat aturluku, qessangraata-llu ataam pisteksagutaci.

¹⁷Taumek waten ATANEQ qanelria: Qanelqa maligtaqullrunritaci; Israelite-at tamalkuita pegtellrunritaci. Taumek wiinga wani-wa pegciiqamci: tuqulallerkarpecen̄un anguyagmi, cangerlagni, piitnami-llu. Tamalkuitnun angayuqauvignun ellarpiim iluanelngurnun alingnarivkarciqaqa man'a pilqa elpecen̄un.

¹⁸Atanerruari Judah-m Jerusalem-aam-llu, ilakluki atanruvigmi atanerruat, agayulirtet, tamalkuita-llu ciuliqagcet, akqillruut wangnun piyualuteng akuliignegun quplermeng qukaakun angucalum ungungssim. Tau͡gaam akqillerteng navgaat aturpek'naku-llu. Wiinga-llu tuaten piciqanka ukut yuut ellaita tuaten angucaluq ungungssiq pillracetun.

²⁰Tunciqanka inglukestaitnun, tuqucugtaitnun, temait-llu nerciqait yaqulget yuilqum-llu ungungssiin.

²¹Tunciqaqa-llu Zedekiah Judah-m angayuqra atanerruari-llu tuqungnaqestaitnun. Tunluki angayuqran Babylon-aam anguyagtainun, taukut maa-i anguyanermek taqaiceci.

²²Alerqurciqanka utertesqelluki wavet nunarpagnun. Anguyagciqaat, tegukunegtegu-llu ekuavkarciqaat. Nunai Judah-m nunakarniiruceciiqanka yuirulluki.”