Read Yupik Jeremiah 35 Bible Online

Jeremiah 35 - Yupik bible

Jeremiah 35

¹ATANREM Jeremiah qanrutaa, Jehoiakim-aaq Josiah-m qetunraa angayuqrullrani Judah-mi:

²“Agluten eniitnun Rechabite-at qalaruski, agulluki-llu Agayuvigpagmun, enet iliitnun itrulluki; wine-amek-llu merkaatnek paivcilluki.”

³Tua-i agutanka Rechabite-at tamalkuita, Jaazaniah (allam Jeremiah-m qetunraa, Habazziniah-m qetunraqluku) tamalkuita-llu anelgutai angutet.

⁴Agayuvigpagmun agutanka itrulluki enemun atulaq'ngaatnun elitnaurain prophet-aam Hanan-aam Igdaliah-m qetunraan. Una ena uitauq quliini eniin Maaseiah-m Shallum-aam qetunraan, atanerruarin piuranrita iliit Agayuvigpagmi, canianlluni allat atanerruat enaita.

⁵Taukut-llu ciuqerratnun paivciunga saskanek qantacuarnek-llu wine-amek imalegnek, qanrulluki-llu, “Wine-amek merci.”

⁶Taukut qanertut, “Wine-amek miyuitukut. Ciuliamta Jonadab-am Rechab-am qetunraan, alerqullruakut wangkuta, wall'u kingumta yuit wine-amek melaasqevkenata.

⁷Cali-llu qanrulluta enelisqevkenata, nauceciilaasqevkenata-llu naucetaarvililuta wine-arkanek, wall'u kipulluki pisqevkenata. Alerqurluta pelatekani tau͡gaam uitalaasqelluta maani nunami uitalaasqelluta allanrulriatun.

⁸Niisngaarput alerquutii Jonadab-am, Rechab-am qetunraan ciuliamta, alerqullruakut wangkuta irniaput-llu wine-amek meresqevkenata unguvaqallemten̄i

⁹enelisqevkenata-llu uitavigkamten̄ek. Wine-arkanek naucetaaritukut naucetaarviinata-llu, naucetaarkaunata-llu cali.

¹⁰Tau͡gaam uitalartukut pelatekani, maligtaquluki-llu aturaput Jonadab-am ciuliamta alerquutekellri wangkutnun.

¹¹Tau͡gaam Angayuqam Nebuchadnezzar-aam anguyallrani nuna, wangkuta qanertukut, ‘Tailuci, ayagnaurtukut Jerusalem-aamun alingamta Babylon-aarmiut Syria-rmiut-llu anguyagtaitnek.’ Taumek maa-i Jerusalem-aami uitalriakut.”

¹²Tua-llu ATANREM Jeremiah qanrutaa:

¹³“Waten qanertuq ATANEQ Artuqailnguq Israel-aam Agayutii: Ayagluten qaneryartua yuinun Judah-m Jerusalem-aam-llu, ciuniuqatanritarci-qaa ayuqucirtuuteka qanelqa-llu niilluku? qanertuq ATANEQ.

¹⁴Jonadab-am, Rachab-aam qetunraan, alerquutii kinguveminun meresqevkenaki wine-amek taukut niisngaat; meqsaunateng erneq man'a engelkarrluku, niisngiimegteggu atameng alerquutii. Taqsuqaunii qanruquralaryaaqamci, tau͡gaam elpeci niicunritarpecia.

¹⁵Ayagcecilaryaaqua pulengtaq pistemnek prophet-aanek elpecen̄un, qanelrianek, ‘Umyualinqigci tamarpeci assiitellrianek ayuqucirpecen̄ek, elluaq-llu aturluku, agayutnun allanun cauksaunaci kevgiurnaluki, uitavikniarci nuna cikiutekelqa ciuliarpecen̄un.’ Tau͡gaam elpeci niitenritarpecia.

¹⁶Jonadab-am kinguvrin ciuliameng alerquutii aturaat, tau͡gken ukut yuut wii niisnganritaatnga.

¹⁷Taumek waten qanertuq ATANEQ, Artuqailnguq Israel-aam Agayutii: Judah-mun tamalkuitnun-llu Jerusalem-aam yuinun tuc'etqataranka akeqnerrlugutekellrenka ellaitnun; tua-i-wa qanrutengramteng niicunrilata, qayagaungramteng-llu kiuyugpek'nateng.”

¹⁸Tau͡gaam Rachabite-anun Jeremiah qanertuq, “Waten qanertuq ATANEQ Artuqailnguq, Israel-aam Agayutii: Niisngallruavciki Jonadab-am ciuliarpeci alerquutai, maligtaquluki-llu picirkiutai, aturluki-llu tamalkuita alerquutekellri elpecen̄un,

¹⁹taumek ATANEQ Artuqailnguq, Israel-aam Agayutii qanertuq: Jonadab-am kinguvrin iliitnek angutmek wangnun kevgiulriartangqerturalarciquq.”