Read Yupik Jeremiah 36 Bible Online

Jeremiah 36 - Yupik bible

Jeremiah 36

¹Allrakut cetamiitni Jehoiakim-aam, Josiah-m qetunraan, angayuqrullran, ATANEQ qanertuq Jeremiah-mun:

²“Kalikarmek imegyaramek piluten igauski tamalkuita elpenun qanrutkellrenka Israel-aamek, Judah-mek, tamalkuita-llu atanruvignek. Igautniaten tamalkuita qanrutkellrenka elpenun qanqerraallemnek ayagluki, Josiah angayuqrurtellrani una erneq engelkarrluku.

³Tayima Judah-m yuin niiskunegteki akeqnerrlugutet tuc'etarkanka ellaitnun, umyualinqigciiqelliut assiilngurmek atullermeggnek. Tuatnakata au͡g'ariciiqanka yurrluullratnek assiilnguitnek-llu.”

⁴Jeremiah-m-llu taisqaa Baruch-aaq, Neriah-m qetunraa, Baruch-aam-llu igautai Jeremiah-m qanellri ATANREM qaneryarai ellminun qanrutkellri.

⁵Jeremiah-m Baruch-aaq alerquraa, “Wiinga iterciigatevkaumaunga Agayuvigpagmun.

⁶Tau͡gaam elpet agesqumaamken tuavet yallrata nalliini. Qastuluten naaqniaten kalikaat imegyarat, niitelluki tamalkuita ATANREM qanellri wangnun igauquralten qalartelqa maliggluku. Naaqekiki tamiini yuut niicugngakiitni, tapeqluki Judah-m yui taillret nunameggnek.

⁷Pitsaqevkenateng kaigayuartut ATANERMUN, umyualinqiggluteng assiilngurmek atullermeggnek, tua-i uluryanaqngan eq'uqertellra ATANREM akeqnerrlugutellra ukunun yugnun.”

⁸Baruch-aaq-llu tuaten piuq Jeremiah-m alerquuciatun naaqluki ATANREM qanellri Agayuvigpagmi.

⁹Allrakut tallimiitni iralut-llu qulngunritariitni Jehoiakim-aam angayuqrullran Judah-mi, yuut tamarmeng Jerusalem-aami tamarmeng-llu taillret nunarpainek Judah-m Jerusalem-aamun, yallruut ATANERMUN ilukegcitkesqelluteng.

¹⁰Tua-llu yuut niicugnillratni, Baruch-aaq naaqiuq Jeremiah-m qanellrinek tuaken kalikarmek imegyaramek, Agayuvigpagmi, eniinek Gemariah-m Shaphan-aam qetunraan, igarten͞gulriim. Enii uitauq qullirmi iteryarami, aterpagcimalriim Nutaraq lteryaraa Agayuvigpiim caniani.

¹¹Micaiah-m, Gemariah-m qetunraan, tutgariin Shaphan-aam niitai tamalkuita, ATANREM qanellri naaqumallratni,

¹²atrarluni-llu angayuqam eniinun, igartem uitavianun; atanerruat-llu tamarmeng aqumgaluteng tuani: Elishama igarta, Delaiah Shemaiah-m qetunraa, Elnathan Achbor-am qetunraa, Gemariah Shaphan-aam qetunraa, Zedekiah Hananiah-m qetunraa, allat-llu atanekuyuut tuani aqumgalriit.

¹³Micaiah-m qanrutai tamalkuitnek niitellerminek, Baruch-aaq naaqillrani yuut niitelluki.

¹⁴Taukut-llu atanerruat Jehudi Nethaniah-m qetunraa, Shelemiah-m tutgarii, qanrutesqelluku Baruch-aaq kalikaq imegyaraq naaqellra yugnun taitesqelluku. Tua-i Baruch-aam taitaa ellaitnun.

¹⁵Taukut qanrutaat, “Aqumluten naaqiu kalikaq imegyaraq wangkutnun.” Tua-i Baruch-aam naaqaa.

¹⁶Tamalkuan niicimariamegteggu tangertaagutut alingluteng Baruch-aaq-llu qanrulluku, “Qanrucunarqerput angayuqaq makunek.”

¹⁷Tua-llu aptaat Baruch-aaq, “Qanruskut qaillun igautellrusiki makut? Jeremiah-m-qaa qanellri aturluki igautellruaten?”

¹⁸Baruch-aam kiugai, “Jeremiah-m aperyarat tamalkuita qanellri wangnun, igauqurallruanka wavet kalikarmun imegyaramun.”

¹⁹Tua-i atanerruat qanertut Baruch-aamun, “Iiryarturtek Jeremiah-llu, iirvigtek kitumun nallunritevkaryaqunat'gu.”

²⁰Tua-i ag'ut angayuqam uitavianun, kalikaq imegyaraq tauna unilluku Elishama-m igartem qavarvianun; qanrutaat-llu angayuqaq tamalkuitnek kalikam imegyaram imainek.

²¹Angayuqam-llu Jehudi-mun aqvavkaraa tauna kalikaq imegyaraq. Tegua-llu eniinek Elishama-m igartem; naaqilluku-llu angayuqaq atanerruat-llu avatiini nangerngalriit.

²²Taum nallii iralut qulngunrita'arqaat, angayuqaq-llu aqumgallruuq enemi uksumi uitaviketukmini kenrem kumalriim ciuqerrani.

²³Jehudi-llu naaqillrani angayuqam nuussicuaraagnegun kep'laraa naaqellra kenermun-llu muriulluku. Tuaten tua-i piurluni nangluni kalikaq imegyaraq ekuanatkaanun.

²⁴Tau͡gaam angayuqaq pistai-llu niitellret makunek alingallanritut, aturateng-llu allgurpek'naki umyuarniurluteng.

²⁵Elnathan-aam, Delaiah-m Gemariah-m-llu inerquayaaqaat angayuqaq ekuavkaasqevkenaku kalikaq imegyaraq, tau͡gaam elliin ilangcinritai.

²⁶Tua-llu angayuqam qetunrani Jerahmeel-aaq alerquraa, ilalirluku Seraiah-mek Azriel-aam qetunraanek, Shelemiah Abdeel-aam qetunraanek, tegusqellukek Baruch-aaq igarta, Jeremiah-llu prophet-aaq, tau͡gaam ATANREM iirak.

²⁷Angayuqamun kalikaq imegyaraq ekuarraartelluku Baruch-aam igallra Jeremiah-m qanellra maligqurluku, ATANREM Jeremiah qanrutaa:

²⁸Kalikarmek imegyaramek allamek tegulluten igautniaten ciuqlirmi kalikarmi igausngallret Jehoiakim-aam angayuqran Judah-m ekuallri.

²⁹Jehoiakim-aaq Judah-m angayuqra piluku waten qanerciquten, Waten qanertuq ATANEQ, Kalikat imegyarat ekuavkallruaten waten qanerluten, Ciin igallrusit Babylon-aam angayuqra taiciqniluku pinritevkenaku nuna man'a piunriryarturluku, tuqulluki-llu yui ungungssii-llu?

³⁰Taumek ATANEQ waten qanertuq Jehoiakim-aaq Judah-m angayuqra piluku: kinguvranek aqumgalriartangqerrngaituq David-aam atanruvian aqumllerani, yuunriqan-llu temii egcimaciquq akerciurtelluku erenrani unugmi-llu kanertelluku.

³¹Anucimirqecetaarciqaqa ellii irniari-llu, pistai-llu assiilnguit pitekluki. Tuc'eciiqanka ellaitnun, Jerusalem-aam yuinun, Judah-m-llu yuinun tamalkuita ellaitnun akeqnerrlugutellrenka, tau͡gaam niitellrunritut.

³²Jeremiah-llu tegutuq allamek kalikarmek imegyaramek Baruch-aamun-llu igartem̄un tunluku, taum igautai Jeremiah-m qanellra tamalkuita Jehoiakim-aam Judah-m angayuqran ekuavkallri; allanek cali ayuqaitnek ilaluki.