Read Yupik Jeremiah 38 Bible Online

Jeremiah 38 - Yupik bible

Jeremiah 38

¹Shephatiah-m Mattan-aam qetunraan, Gedaliah-m Pashhur-aam qetunraan, Jehucal-aam Shelemiah-m qetunraan, Pashhur-aam-llu Malchiah-m qetunraan niitait Jeremiah-m qalartellri yugnun.

²“Waten qanertuq ATANEQ, Kina imna wani nunarpagni uitalria tuquarkauguq anguyagkun, piitnaakun, cangerlagteggun-llu; tau͡gaam kina imna ayalria Babylon-aamun unguvaciquq; unguvani akiliutekciqaa anguyagnek unguvaluni-llu.

³Waten qanertuq ATANEQ, Nunarpak una pinritevkenani tunumaciquq Babylon-aarmiut angayuqratnun.”

⁴Atanerruat-llu qanertut angayuqamun, “Una yuk tuqutessgu, yuut, anguyagtet-llu wani nunarpagni uitalriit piniarucaki qanllermikun. Yuut ikayungnaqenritai tau͡gaam akngirtengnaqluki.”

⁵Angayuqaq Zedekiah qanertuq, “Kitak tua-i elpeci piyugtacirpecetun pikiciu; wiinga arulaircesciigatamci.”

⁶Tua-i Jeremiah teguamegteggu elliat Malchiah-m, angayuqam qetunraan, elakaanun nayurtem nuniini uitalriamun, atrarrluku ilavkugkun. Tauna elakaq imaituq marayamek tau͡gaam qap'itnarqelriamek, Jeremiah-llu tamatumun qap'illuni.

⁷Ebedmelech-aam, Ethiopian-aam calilriim angayuqam eniini, niitaa Jeremiah ekniluku elakamun. Taum nalliini angayuqaq aqumgallruuq Benjamin-aam lteryaraani.

⁸Ebedmelech-aam angayuqaq ullagaa eniini uitallerminek qanrulluku-llu,

⁹“Angayuqaaq, ukut yuut assinrilngurmek piut ekluku Jeremiah prophet-aaq elakamun; tuani paluciquq, maani nunarpagmi neqkartairucan.”

¹⁰Tua-i angayuqam alerquraa Ebedmelech-aaq, Ethiopian-aaq, “Pingayunek maaken angutnek malilirluten nugcarturciu Jeremiah mervigmek tuquvailgan.”

¹¹Tua-i Ebedmelech-aaq angutet malikluki ag'uq angayuqam eniinun, aklivianun piami 'lumarrallernek tuaken piluni atrartai ilavkugkun Jeremiah-mun elakamelngurmun.

¹²Ebedmelech-aam Jeremiah qanrutaa, “'Lumarrallret elliki unregpenun ilavkuk cali.” Tua-i tuaten Jeremiah piuq.

¹³Nugtaat-llu Jeremiah ilavkugkun tuaken elakamek. Jeremiah-llu uitauq nayurtem uitaviani.

¹⁴Zedekiah-m aqvavkaraa Jeremiah ciuniurluku-llu Agayuvigpiim iteryarain pingayuatni. Angayuqam-llu Jeremiah qanrutaa, “Apteqataramken apyutmek, qanrutesqumaunga-llu camek aassaqutevkenii.”

¹⁵Jeremiah-m Zedekiah qanrutaa, “Qanruskumken piciulriamek tuquceciiqerpenga, ayuqucirtuqumken-llu ilangcingaunii.”

¹⁶Tua-llu angayuqaq Zedekiah ukvernarcariuq Jeremiah-mun yuut nalluvkarluki qanerluni, “ATANEQ unguvaciatun, yuucimta piliaqestellra, tuqusngaitamken tunngaunak-llu tuqungnaqestevnun.”

¹⁷Tua-i Jeremiah qanertuq Zedekiah-mun, Waten qanertuq ATANEQ Agayun Artuqailnguq Israel-aam Agayutii, “Elpenek tunkuvet atanerruarinun Babylon-aam angayuqran, tuqucimangaituten, una-llu nunarpak ekuavkaumangaunani. Tamarpeci-llu ilaten-llu tuqucimangaituci.

¹⁸Tau͡gken elpenek tunenrilkuvet atanerruarinun Babylon-aam angayuqran, nunarpak una tunumaciquq Babylon-aarmiunun, taukut-llu ekuavkarciqaat, elpet-llu anagngaunak ellaitnek.”

¹⁹Zedekiah qanertuq Jeremiah-mun, “Alingua Jews-aanek cakaarluta ilautellernek Babylon-aarmiunun, taukunun tunenayuklua ellaita-llu nangllua.”

²⁰Jeremiah qanertuq, “Tunumangaituten taukunun. Niisgu watua ATANREM elpenun qanellra wangkun, cat elluarrluteng elpenun pinaurtut, unguvan-llu tegumangaunani.

²¹Tau͡gaam elpenek tunenrilkuvet, wani-wa ATANREM tangrruartellua nasvallra wangnun:

²²Tangrranka arnat uitaqalriit Judah-m angayuqran eniini ayaucimaluki Babylon-aarmiut angayuqrata atanerruarinun. Atam niiteqerru ayainanermeggni qanellrat, ‘Nalirukevkenaki yugnikek'ngarpet iqluurluten ukvercetaatgen unakluten; wani-wa-llu it'gaten qap'icimariata unitaatgen.’

²³“Tamarmeng nuliaten, irniaten-llu ayaucimaciqut Babylon-aarmiunun, ellaitnek-llu anagngaituten. Teguciqaaten teguaqluten Babylon-aam angayuqran; una-llu nunarpak ekuavkarluku.”

²⁴Zedekiah-m Jeremiah qanrutaa, “Man'a qalarutlerpuk kitumun nallunrircecaqunaki tuqucimanritniartuten.

²⁵Atanerruat niiskatgu qalarutellrucin wangnun, ullagluten-llu waten qanrulluten, ‘Qanruskut canek qanllerpenek angayuqamun, elliin-llu qanellranek elpenun; aassaqutevkenata qanruskikut tuqutenritniaramteggen.’

²⁶Elpet waten qanruciiqaten, ‘Takumcuca'arlua kaigavikellruaqa angayuqaq ayagcecesqevkenii ataam Jonathan-aam eniinun tuquarkaulua tuani.’”

²⁷Tua-i atanerruat tamarmeng ullagaat Jeremiah apqaurluku-llu, elliin-llu kiugai angayuqam alerquutii maliggluku. Tua-i taukut qanellgutkenriraat, kia niitellrunrilakek qalarutellragni.

²⁸Jeremiah-llu uitaluni nayurtem uitaviani Jerusalem-aam tegumallran engeliinun.