Read Yupik Jeremiah 39 Bible Online

Jeremiah 39 - Yupik bible

Jeremiah 39

¹Allrakut qulngunritariitni, iralut-llu qulngurutiitni Zedekiah-m angayuqaullran Judah-mi, Angayuqaq Nebuchadnezzar-aaq Babylonia-mi tekituq Jerusalem-aamun anguyagten̄i tamalkuita malikluki avatairluku-llu.

²Allrakut-llu Zedekiah-m angayuqrullri qula ataucimek cipteqerluki iralut cetamiitni qulngunritariitni erenret nunarpiim casgui navgurait.

³(Jerusalem-aaq tegumallrani, tamarmeng quyilriit, atanerruari Babylon-aam angayuqran, taillruut aqumluteng-llu Qukaqlirmun Iteryaramun: Nergal Sharezer, Samgar Nebo, Sarsechim, Rabsaris-aaq, alla-llu Nergal Sharezer-aaq Rabmag-aq.)

⁴Zedekiah-m Judah-m angayuqran tamarmeng-llu anguyagtain tangrramegteki qimagtut anluteng-llu nunarpagmek unugmi. An'ut angayuqam naucetaarvia tumekluku, iteryaraakun-llu casguk akuliignegun; qimagluteng-llu Arabah-m tungiinun.

⁵Tau͡gaam Babylonian-aat anguyagtaita maligtait, anguluku-llu Zedekiah carr'ilqaini Jericho-m. Tegumariamegteggu ullautaat Angayuqamun Nebuchadnezzar-aamun Riblah-m nunarpiini uitallrani Hamath-aam nuniini; Nebuchadnezzar-aam tuani Zedekiah camek anucimirqecetaarutengqellerkaa qanrutkaa.

⁶Tuani-llu Riblah-mi Zedekiah-m qetunraak tuqutak tangvagtellukek atiignun; cali-llu Judah-mi yuut piuranrit tamalkuita tuqulluki.

⁷Taum kinguani, Zedekiah-m-llu iik qagercetak kalivnercirluku-llu Babylon-aamun ayautnaluku.

⁸Tuaten piinanratni, Babylonian-aat angayuqam yuut-llu enait ekuavkarait imlluki-llu casgui Jerusalem-aam.

⁹Nutaan-llu Nebuzaradan-aam, anguyagtet atanirturtiita, teguaqluki ayautai Babylon-aamun yuut unegtaullret tamaani nunarpagmi, yuut-llu ellminun ilautellret.

¹⁰Unitellrui Judah-m nuniinun ilait arrsaunkacagait yuut canek piutailnguut, cikirluki-llu wine-arkanek naucetaarvignek.

¹¹Babylon-aarmiut angayuqrat Nebuchadnezzar-aaq alerquiguq Nebuzaradan-aaq anguyagtet atanirturtiit tumekluku, qanerluni,

¹²“Ayagci Jeremiah yuarluku assirluku-llu aulukluku. Akngircaqunaciu, elliin tau͡gaam piyullra maligtaqukiciu.”

¹³Tua-i Nebuzaradan-aaq anguyagtet atanirturtiit, ilaluni Nebushazban-aankugnek Nergal Sharezer-aaq-llu tamalkuita-llu ciuqliit atanerruari Babylon-aam angayuqran,

¹⁴aqvavkaraat Jeremiah nayurtem uitavianek. Aulukesciraat-llu Gedaliah-mek Ahikam-aam qetunraanek, Shaphan-aam tutgariinek, elliinun ut'rutesqelluku eniinun. Jeremiah-llu uitauq yuut ilalirluki.

¹⁵Itengqainanrani Jeremiah nayurtem uitaviani, ATANREM qanrutaa:

¹⁶“Ullagluku Ebedmelech-aaq Ethiopian-aaq qanrucarturru, ‘Waten qanertuq ATANEQ, Artuqailnguq Israel-aam Agayutii: Qanellrucimtun, una nunarpagmun piunrillerkaanun tekiuciiqaqa piluaqallerkaanun pivkenaku, tamana-llu piciurciiquq takuvni tuani ernermi.

¹⁷Tau͡gaam wiinga aviuciiqamken tuani ernermi, qanertuq ATANEQ tunumangaituten-llu yugnun alikek'ngarpenun.

¹⁸Wiinga anirturciqamken, anguyagkun tuqungaituten; unguvan anguyagnek akiliutekciqan, cacetuqutekellruavnga wii, qanertuq ATANEQ.’”