Read Yupik Jeremiah 4 Bible Online

Jeremiah 4 - Yupik bible

Jeremiah 4

¹ATANEQ qanertuq, “Israel-aaq, ut'reskuvet wangnun ut'reskina. Au͡g'aquvki pellernarqelriit caliaci ciuqamnek, nalirugtevkenaci-llu,

²ukvernarcarikuvci, ‘ATANEQ unguvaciatun,’ piciunerkun, elluakun, elluaryarakun-llu, nutaan angayuqauvillgutkelriit kaigavikeciqaatnga atawaqercecesqelluteng, nanrarciqaatnga-llu.”

³ATANEQ qanertuq Judah-m yuinun Jerusalem-aam-llu yuinun: “Naucetaarvici itumcimanrilnguut itumciki; nauceciiyaqunaci-llu cukilanat akuliitgun.

⁴Akqut'liallerci wangnun, ATANERPECEN̄UN pegcaqunaciu, urenkutmek cikiutekluki wangnun, elpeci Judah-m Jerusalem-aam-llu yuini. Pinrilkuvci, eq'uqertelqa ekuaciquq kenertun assiitellriit calialci pitekluki. Ekuaciquq, kitumek-llu neptestekangqerrngaunani.”

⁵Cupu'uryaraq cupiciu nunamun tamiinun! Qastuluci qayagpagci taringnaqluci-llu! Qanruciki Judah-m Jerusalem-aam-llu yuk'ek qimaasqelluki asvairqumalrianun nunarpagnun.

⁶Niirciu Zion-aamun ayagyaraq! Qimagci unguvallerkarpecen̄un! Qariyaqunaci! ATANEQ taituq picurlagmek negeqvamek angqapigtellriamek-llu piunririlriamek.

⁷Yugtutulitun anelriatun an'uq iirumallerminek, piunrirtiit angayuqauviit an'uq. Taiguq piunrirrnaluku Judah. Nunarpai Judah-m imenrurrluteng unicimaciqut, kina-llu tamaani uitangaunani.

⁸Taumek missuullernek all'uci qiaci neplialuci-llu tua-i-wa ATANREM uluryanarqelria eq'uqertii tuigteksailan Judah-mek.

⁹ATANEQ qanertuq, “Ernermi tuani angayuqat atanerruat-llu cacetucirteng tamariciqaat; agayulirtet tatameciqut prophet-aat-llu irr'iqapiggluteng, qanertuq ATANEQ.”

¹⁰Tua-llu qanertua, “ATANEQ Agayun, ilumuulriamek ukvertellruaten Jerusalem-aam yui, qanrulluki, ‘Elluiluci uitaciquci’; tau͡gaam nuussirpak tuqluitnetuq.”

¹¹Pillerkaq agiirtuq Jerusalem-aam yui qanrucimaciqut anagulluni puqlanilria anuqa taigarkauniluku nunam mer'ilnguum tungiinek. Anuqsaaraungaituq kiingan tengcilria carangllugnek,

¹²anuqa tailria ATANREM alerquuciatun, tukninruarkauguq taumi! ATANRUUQ tungaunani qanercetaarilria yum'inek.

¹³Tangerciu, inglukilria agiirtuq amirlutun. Anguyagcuutait ayagassuutet akalrialget ull'uyaatun ayuqut, horse-aarit-llu cukanruluteng yaqulegpagni. Nakleng wangkuta, piunriumaqatartukut!

¹⁴Jerusalem-aaq, erurru assiilnguq ircaqurpenek, anirtuumanaurtuten. Qaillun taktalriamek umyuangqeqatarcit assiitellrianek?

¹⁵Kevgat Dan-am nunarpiinek, Ephraim-aam-llu qemiinek qanrutkaat niitnirqenrilnguq.

¹⁶Taigut aarcirturyarturluki angayuqauviit, Jerusalem-aaq qanrutnaluku inglukilria agiirrniluku nunamek yaaqvanek. Taukut inglukilriit qayagpagciqut inglukluki Judah-m nunarpai

¹⁷kassuguciiqaat-llu Jerusalem-aaq naucetaarvigmek nayulriatun, tua-i-wa yui inglulitellruata wangnun, qanertuq ATANEQ.

¹⁸Piciryararpeci caliarpeci-llu man'a tuc'etaa elpecen̄un. Waniwauguq piunrillerkarci, cungarninarqelriaruuq-llu; ircaquci kapluku nuussitun.

¹⁹Engellugturtua! Engellugtum ugaani piningnaqesciigatua! Ircaquqa cakneq nutengvagtuq! Nepaitesciigatua; niicama cupu'uryaram nepiinek anguyiim elpengcautiinek.

²⁰Picurliit tut'ut kinguqliqluteng; nuna tamalkurmi nunakarniirutuq. Alqunaq pelatekanka navguumaut; capkutait wanirpaagaq allguumaut;

²¹Qaillun taktalriamek anguyak tuknilria tangvakatarcia niiskengaqluku-llu cupu'uryaram nepii?

²²ATANEQ qanertuq, “Yuunka usviitut, ellaita nalluatnga. Mikelngurtun umyugailngurtun ayuqut, taringesciigatut. Elisngaat assiilnguum atullra, tau͡gken elluatuuvkenateng assilriim atullranun.”

²³Tangrraqa nuna, yuituq nunakarniinani; qilak-llu tangrraqa, tanqigcetellriartaitellruuq.

²⁴Ingrit tangrranka, qiivluteng, qemit-llu uvaaluteng.

²⁵Kiartellemni yugmek tangenrritua; yaqulget-llu tamarmeng qimallrulliniluteng.

²⁶Kiarrlua tangrraqa naungignarqelleq nuna qau͡gyarrlainauluni; nunarpai-llu imenruluteng ATANREM tuknilriim eq'uqertiin tuaten ellircecateng.

²⁷Tua-i ATANEQ waten qanellruan, Nuna tamarmi uitaviksunairuciiquq; piunriqapiggluku tau͡gaam pingaitaqa.

²⁸Man'a pitekluku nuna tuquilriatun qivruciquq; qilak-llu tan'gericiquq; Wiinga qanellruunga, picirkiullruunga; umyuaqa cimiqsaitaqa taq'ingauni-llu.

²⁹Horse-aalget anguyagcet pitgaqustet-llu nepiit niilluku yuut tamarmeng qimagciqut. Ilait napalilriamun qimagciqut; ilait-llu mayurciqut teggalqut akulaitnun. Tamarmeng nunat yuiruciiqut, kia-llu uitavikenqiggngaitai.

³⁰Jerusalem-aaq, ciunerkangqertuten picurlagmek! Ciin kavirlimek aturarcit? Ciin suulutaanek kenugutnek ac'it, iigken-llu minguglukek? Elliinginaq kenugtuten! Kenkuurtevvet qessayagutaatgen; tuquiturluten-llu.

³¹Niitua qialriamek, arnatun teggiurcilriatun, aarpalriamek arnatun irniqarraaqatalriatun. Jerusalem-aam erinakaa mangyuarirluni aneryaarciiganani, unatni yaggluki qanerluni, “Nakleng wiinga! Tuqucarturlua ullagaatnga!”