Read Yupik Jeremiah 40 Bible Online

Jeremiah 40 - Yupik bible

Jeremiah 40

¹ATANREM qanrutaa Jeremiah, Nebuzaradan-aamun anguyagtet atanirturtiitnun pegqaartelluku teguarullranek Ramah-mi. Tuavet ayaucimallrulria kalivnerciumaluni allanek maligluni ayaucimalrianek teguanek Jerusalem-aamek Judah-mek-llu Babylonia-mun.

²Anguyagtet atanirturtiita Jeremiah allakarluku qanrutaa, “ATANREM Agayutvet aniqlaallrua man'a nuna piunriumallerkaanek;

³waniwa-llu ATANREM tuaten pivkallrua qanellni aturluku. Man'a tut'uq elpecen̄un assiilngillruavci ATANERMUN, qanellra-llu maligtaqullrunrilavciu.

⁴Waniwa au͡g'aranka kalivnertaten uumi ernermi. Canrilkekuvgu maligtellerkaqa Babylonia-mun maligesnga, wiinga-llu aulukciqamken assirluten. Tau͡gaam umyuarpeni maligtellerkaqa Babylonia-mun piunailkekuvgu, tua-i maligcaqunii. Atam tangerqerru nuna tamarmi ciuqerpeni uitauq; ayii piullerpenun elpeni assirciqngalngurmun.”

⁵Ayanrilkuvet ut'reskina ataam Gedaliah-mun Ahikam-aam qetunraanun, Shaphan-aam tutgariinun, Babylonia-m angayuqran cucukellranun nunarpainun Judah-m atanrusqelluku. Uitaniartuten elliini yuut ilalirluki; wall'u natmun ayagluten elpeni assirciqngalngurmun. Tua-i anguyagtet atanirturtiita cikiutmek cikiraa neqmek-llu taquilluku, ayagcelluku-llu.

⁶Jeremiah-llu ayagtuq ullagluku Gedaliah, Ahikam-aam qetunraa, Mizpah-mi uitalria, uitavikluku-llu yuut tamaani nunami unegtaullret ilalirluki.

⁷Judah-m anguyagtain atanerruarit yuilqumi uitalriit anguyagteteng-llu teguvkallrunritut niicameng angayuqranun Babylonia-m Gedaliah, Ahikam-aam qetunraa, nunamun atanrurrniluku aulukesqelluki yuut Babylonia-mun ayaucimallrunrilnguut, imkut arrsaunkacagait tamaani nunami,

⁸Gedaliah ullagaat Mizpah-mi ukuuluteng: Ishmael-aaq Nethaniah-m qetunraa, Johanan-aaq Kareah-m qetunraa, Seraiah Tanhumeth-aam qetunraa, qetunrai-llu Ephai-aam Netophathite-am, Jezaniah Maacathite-am qetunraa, anguyagteteng malikluki.

⁹Gedaliah Ahikam-aam qetunraa, Shaphan-aam qetunraa, qanertuq taukunun anguyagtaitnun-llu qanerluni, “Iqluurpek'nii qanrutamci alingnarqenritaaci tunllerkarpecen̄ek Babylonian-aanun. Maani nunami uitaci, kevgiurluku Babylonia-m angayuqra, tuaten pikuvci assirluci piciquci.

¹⁰Wiinga Mizpah-mi uitaciqua, qanerten͞guarkaulua elpecen̄un Babylonian-aat taikata. Quyurcici tau͡gaam wine-anek, kiagmi-llu naulalrianek atsanek, uqumek-llu, qemaggluki-llu assigtarpecen̄un, uitaluci-llu nunarrarni tegullerpecen̄i.”

¹¹Tuaten-llu Jews-aat uitalriit Moab-ami, Ammonite-at-llu ilagarluki, Edom-aami, allani-llu nunani, niitut Babylonia-m angayuqranun ilakuarrait Judah-mi uitavkarniluki atanirluki Gedaliah-mek.

¹²Tua-i Jews-aat nunanek cekavngallermeggnek utertut Judah-m nuniinun, Gedaliah-mun Mizpah-mi, tuani-llu quyurciluteng amllernek wine-anek kiagmi-llu naulalrianek atsanek.

¹³Tua-llu Johanan-aaq tamarmeng-llu ciuliqagtait anguyagcet yuilqumelnguut Gedaliah ullagaat Mizpah-mi

¹⁴qanerluteng-llu elliinun, “Nalluan-qaa Ammon-aarmiut angayuqratnun Baalis-aamun ayagcessucia Ishmael-aaq tuqutesqelluten?” Tau͡gaam Gedaliah-m tamana ukveqenritaa.

¹⁵Johanan-aam kiimenaku Gedaliah qanrutaa, “Ayagcessnga Ishmael-aaq tuqucarturluku, kitumun piciiciiqaat. Ciin elliin tuqucartaten, Jews-aat-qaa avatevni quyungqalriit cekavngasqelluki, Judah-mi-llu-qaa uitaqalriit piunriisqelluki?”

¹⁶Tau͡gaam Gedaliah kiuguq, “Tuatnayaqunak! Qanellren Ishmael-aaq piluku piciunrituq!”