Read Yupik Jeremiah 41 Bible Online

Jeremiah 41 - Yupik bible

Jeremiah 41

¹Iralut malrunelgatni, Ishmael-aaq Nethaniah-m qetunraa Elisham-aam tutgarii, atanekuyugnek yugnek nauvilek, angayuqam atanerruara, tekituq qulnek angutnek maligluni Gedaliah-mun Ahikam qetunraanun, Mizpah-mi. Tuani Mizpah-mi nernginanermeggni,

²Ishmael-aam, Nethaniah-m qetunraan taukut-llu qulen angutet Gedaliah tuqutaat nuussirpagkun, Babylon-aarmiut angayuqrata cucukellra nunamun atanrusqelluku.

³Ishmael-aam-llu cali tuqutai Jews-aat Gedaliah-m ilai Mizpah-mi, Babylonian-aat-llu anguyagtet tamaanelnguut ilakluki.

⁴Unuaquani tuqucimallra Gedaliah-m yuut nallunrirpailgatgu,

⁵yuinaat cetaman (80) angutet tekitut Shechem-aamek, Shiloh-amek, Samaria-mek-llu, ungairumaluteng, aturait allgumaluteng, qaimegteggun-llu kilirtuumaluteng, tailluteng elliitekameggnek ATANREM Agayuvigpiini mukaarkanek aruviarnek-llu.

⁶Ishmael-aam-llu Mizpah-mek anluni pairrsaagai aluviliurluni. Tekicamiki qanrutai, “Tailuci ullagciu Gedaliah Ahikam-aam qetunraa.”

⁷Nunarpagnun itrameng Ishmael-aam taukut-llu angutet ilain, tuqutait mervigmun-llu temait eggluki.

⁸Tuani tau͡gaam qulnek angutnek pitangqellruuq taukut ilaitnek, qanertut Ishmael-aamun, “Tuqucaqunakut, qemangqaangqertukut mukaarkanek, uqumek, evegtaat-llu neqkautiitnek iirumalrianek yuilqumi.” Tua-i tuqutenricen̄arai.

⁹Tauna elakaq Ishmael-aam egcivikellra tuqutellermi temaitnek angelriarullruuq Angayuqam Asa-m piliaqellra Israel-aam Angayuqran Baasha-m anguyallrani: tauna Ishmael-aam temaitnek tuqumalriit imillrua.

¹⁰Ishmael-aam-llu teguaqsagutai angayuqam panii yuut-llu tamalkuita Mizpah-mi uitalriit, Nebuzaradan-aam anguyagtet atanirturtiita tunellri Gedaliah-mun aulukesqelluki. Taukut Ishmael-aam teguaqai ayaulluki-llu Ammonite-at nuniitnun.

¹¹Tau͡gaam Johanan-aam anguyagtet-llu ciuliqagtaita niicamegteki Ishmael-aam assinrilnguq pillra,

¹²tamalkuita anguyagteteng malikluki ayagtut kingunrirturluku Ishmael-aaq anguyagnaluku. Anguluku-llu angelriim nanvam caniani Gibeon-aami.

¹³Ishmael-aam teguarin Johanan-aaq anguyagtet-llu ciuliqagtait tangrramegteki angnirtut,

¹⁴tuiggluteng-llu aqvaqurluteng ullagarrluki.

¹⁵Tau͡gaam Ishmael-aaq pingayunlegnek ilaluni anagtuq Johanan-aamek qimagluteng-llu Ammon-aam nuniinun.

¹⁶Johanan-aam anguyagtet-llu ciuliqagtaita teguit taukut yuut Ishmael-aam ayaucaaqellri Mizpah-mek Gedaliah tuquqaarluku: anguyagtet, arnat, mikelnguut, pistet-llu Johanan-aam ut'rutellri Gibeon-aamek.

¹⁷Alingameng Babylonian-aanek Ishmael-aam tuqutellruaku Gedaliah, Babylonia-m angayuqran nunamun atanrurtellra. Tua-i Egypt-aamun ayagtut Babylonian-aat unilluki. Tumemeggni-llu arulairtut Chimham-aamun Bethlehem-aam caniani uitalriamun.