Read Yupik Jeremiah 42 Bible Online

Jeremiah 42 - Yupik bible

Jeremiah 42

¹Tua-llu anguyagtet ciuliqagtait, Johanan-aaq-llu Kareah-m qetunraa, Azariah-llu Hoshiah-m qetunraa, yuut-llu tamarmeng aciqlikacaameggnek quyinqukacameggnun taigut,

²Jeremiah-mun-llu qanertut, “Kaigavikamteggen piyuutvut niicesqelluku! ATANERMUN Agayutevnun piicauskut tamamta unegtaulriani. Amllellruyaaqukut; tau͡gaam maa-i qavcirrauluta uitaqertukut, tangrrucirpetun.

³Piicauskut ATANERMUN Agayutevnun nasvitesqelluta natmun ayaucirkamten̄ek, qaillun-llu picirkamten̄ek.”

⁴Jeremiah-m qanrutai, “Aa-ang, niitamci, piicauciiqamci ATANERMUN Agayutevcen̄un pisqucirpecetun, caungraan ATANREM-llu kiukanga qanruciiqamci; camek aassaqusngaitamci.”

⁵Taukut-llu Jeremiah-mun qanertut, “ATANEQ piciuluni nallunritesten͞gukili wangkutnun pisqutai tamalkuita atunrilkumteki ATANREM taitellri elpeggun wangkutnun.

⁶Umyuarput nall'artenrilengraan, maligciiqaput qanellra ATANREM Agayutemta, elliinun piicaucesqukut, cat assirluki wangkutnun pisqelluki.”

⁷Erenret qulen kinguatni ATANREM qanrutaa Jeremiah.

⁸Elliin-llu taisqai Johanan-aaq Kareah-m qetunraa tamalkuita-llu elliinelnguut anguyagtet atanirturtait, yuut-llu tamalkuita aciqlikacagiitnek quyi'inqukacagiitnun,

⁹qanrulluki-llu, Waten qanertuq ATANEQ Israel-aam Agayutii, elliinun nauwa wangnun piicaucesqellrulriaci:

¹⁰Maani nunami uitaurquvci nauvkarciqamci imevkarpek'naci, nauceciiciqamci qecugpek'naci. Piunririlriim elpecen̄un tut'evkallma angelriamek angniicetellruanga.

¹¹Aliksaqunaciu Babylon-aarmiut angayuqrat, alikek'ngarci; alikenriciu, qanertuq ATANEQ, nayuamci, anirturnaluci aviulluci-llu elliinek.

¹²Wiinga takumcutalriaruama, elliinun takumcukevkarciqamci utertevkarluci-llu nakmiin nunavcen̄un.

¹³Tau͡gaam qanquvci, Maani nunami uitangaitukut, narurrluku qanellra ATANREM Agayutevci,

¹⁴cali-llu qanquvci, Qang'a, ayagciqukut Egypt-aamun, tuani anguyagmek tangerrngailamta, wall'u cupu'uryaram nepiinek niisngailamta, wall'u kainiqngailamta, tuani-llu uitaciqukut,

¹⁵niiciu qanellra ATANREM, ilakuarraini Judah-m yuin. Waten qanertuq ATANEQ Artuqailnguq Israel-aam Agayutii: Taqsuariquvci ayagnaluci Egypt-aamun uitayarturluci tuani,

¹⁶anguyiim alikek'ngarpeci anguciqaaci Egypt-aam nuniini, piitnam-llu alikek'ngarpeci maligciiqaaci taqaunani Egypt-aamun; tuani-llu tuquciquci.

¹⁷Tamarmeng ciumuarluteng ayagyulriit uitanaluteng Egypt-aami tuquciqut anguyagkun, piitnaakun, cangerlagkun-llu. Kina imna anagngaunani, kia-llu qimagngaunaku picurlagnarqellria tuc'etarkaqa ellaitnun.

¹⁸“Waten qanertuq ATANEQ Artuqailnguq Israel-aam Agayutii, Qenertelqa eq'uqertelqa-llu kuvumallruciatun Jerusalem-aam yuinun, tuaten-llu eq'uqertelqa kuvumaciquq elpecen̄un Egypt-aamun ayakuvci. Tangllerci alingnarqeciquq; yuut-llu temciarautekciqaiceci aniqlaagaqluteng-llu ateci aturluki. Man'a nuna tangenqiggngairuciiqerci.”

¹⁹ATANREM qanrutellruaci, ilakuarraini Judah-m yuini, Egypt-aamun ayagyaqunaci. Asguraksaqunaciu aarcirtuutekelqa unuamek,

²⁰avtellruavci unguvasi akikluku. Kaigavikellruarpecia piicautesqelluci ATANERMUN Agayutevcen̄un, qanerluci, Piicauskut ATANERMUN Agayutemten̄un, ca-llu ATANREM Agayutemta qanellra qanrutkekiu wangkutnun, tuaten-llu piciqukut.

²¹Unuamek-llu ATANREM qanellra elpecen̄un qanrutkaqa, tau͡gaam maligtenritaci ATANREM Agayutem qanrutkesqellri elpecen̄un.

²²Taumek asguraksaqunaciu man'a: tuquarkaucirci anguyagkun, piitnaakun, cangerlagkun-llu tuani ayagluci uitaviksullerpecen̄i.