Read Yupik Jeremiah 43 Bible Online

Jeremiah 43 - Yupik bible

Jeremiah 43

¹Jeremiah-m qaqicaki qanerkani ATANREM Agayutiita qanrutkesqellri ellaitnun,

²Azariah Hoshaiah-m qetunraa, Johanan-aaq-llu Kareah-m qetunraa, allat-llu qanqatailnguut yuut qanertut Jeremiah-mun, “Iqluurtuten. ATANREM Agayutemta taivkallrunritaaten waten qanresqelluten, ‘Ayagyaqunaci Egypt-aamun uitayarturluci tuani’;

³Baruch-aam Neriah-m qetunraan inglulicetaaten wangkutnun, cirlakesqelluta Babylonian-aanun, tuqutesqelluta wall'u nunamten̄ek ayautesqelluta Babylon-aamun.”

⁴Taumek Johanan-aam Kareah-m qetunraan, anguyagtet-llu ciuliqagtaita, yuut-llu tamarmeng, maligtaqunritaat ATANREM qanellra uitauraasqelluki Judah-m nuniini.

⁵Tua-i Johanan-aam tamarmeng-llu anguyagtet ciuliqagtaita tamalkuita unegtauqallret Judah-mi ayautait Egypt-aamun, tapeqluki yuut utertellret nunanek cekavngavillermeggnek:

⁶angutet, arnat, mikelnguut, angayuqam panii. Tamalkuita-llu yuut teguit Nebuzaradan-aam, nayurtet atanirturtiita, unitellri Gedaliah-mun ataniumavkarluki; Jeremiah-nkuk-llu Baruch-aaq-llu ilaklukek.

⁷Tekitut-llu Egypt-aam nuniinun, tua-i-wa maligtaqullrunrilamegteggu ATANREM qanellra. Nunarpagmun-llu Tahpanhes-aamun tekitut.

⁸Tuani-llu ATANREM Jeremiah qanrutaa Tahpanhes-aami:

⁹“Teggalqunek angtuanek aqvalluten elauski tumyaram acianun, qallircimalriim teggalqiuranek, Pharaoh-m eniin iteryaraan ciuqerranelnguum, tangvagtelluten Judah-m yuinun,

¹⁰waten-llu qanrulluki, Waten qanertuq ATANEQ Artuqailnguq, Israel-aam Agayutii: Nebuchadnezzar-aaq Babylon-aam angayuqra, pisteka, taivkarciqaqa maavet, elliin-llu angayuqauvimi aqumllertaa elliciqaa ukut teggalqut iillma qaingatnun, pelatekani-llu civtuciqaa quliitnun.

¹¹Nebuchadnezzar-aam tailuni cirlakciqaa Egypt-aaq. Tuquarkaulriit cangerlagkun tuquciqut cangerlagkun, teguaruarkaulriit-llu ayaucimaciqut teguaruluteng, anguyagkun-llu tuquarkaulriit anguyagkun tuquciqut.

¹²Keneq kumarciiqaqa agayuviitni Egypt-aam agayutain, Babylon-aam-llu angayuqran agayutait ekuavkarciqai wall'u ayaulluki. Qusngiliurta aturaminek nerestairilauciatun, tuaten-llu angayuqran Babylon-aam nerestairilriatun piciqaa Egypt-aam nunii, tuaken-llu ayagciquq cirlakilriaruluni.

¹³Navgurciqai kencignarqellriit teggalqut alailucet Heliopolis-aami Egypt-aam nuniini uitalriit, ekuavkarluki-llu agayuviit Egypt-aam agayutain.”