Read Yupik Jeremiah 44 Bible Online

Jeremiah 44 - Yupik bible

Jeremiah 44

¹ATANREM qanellra Jeremiah-mun tamalkuita Jews-aat piluki Egypt-aam nuniini uitalriit ukuni nunani: Migdol, Tahpanhes, Memphis, Pathros-aami-llu,

²Waten qanertuq ATANEQ Artuqailnguq, Israel-aam Agayutii: “Tangellruaci tungaunaki tamalkuita assiitellriit tuc'etellrenka Jerusalem-aamun tamalkuitnun-llu Judah-m nunarpainun. Unuamek-llu cali maa-i nunakarniitut kitumek-llu tamaani uitalriartaituq,

³yuit assiitellriamek calillruata umyuaqa qenertelluku. Ekuagiluteng tepkegcilrianek aruviarnek kevgiurluki-llu allat agayutet ellaita, wall'u elpeci, wall'u ciuliarpeci nallukait.

⁴Pulengtaq taqeksaunii ayagcecilaryaaqua pistemnek prophet-aanek elpecen̄un, qanelrianek, ‘Atunriciu man'a pellernarqelria uumikek'ngaqa!’

⁵Tau͡gaam niicunritut murilkevkenateng, tuigtevkenateng-llu assiilngurmek atullermeggnek aruviarnek-llu ekuagilallermeggnek allanun agayutnun.

⁶Taumek eq'uqertelqa qenertelqa-llu kuvellrukeka nunarpainun Judah-m tumyarainun-llu Jerusalem-aam; cakarniirutellruut nunakaunrirluteng-llu, cali maa-i ernerpak tuaten ayuqluteng.

⁷“Waniwa waten qanertuq ATANEQ Artuqailnguq, Israel-aam Agayutii: Ciin assiitqapigtellria man'a elpecen̄un pivkarceciu, picurlagmun-qaa tekiutellerkait angutet, arnat, mikelnguut, mikelnguyagaat-llu piyuutekarci, ilavcen̄ek unegtaulriartangqerrngairulluku?

⁸Ciin eqcetaarcecia caliarpeciuggun, aruviararaqluci tepkegcilrianek allanun agayutnun maani Egypt-aam nuniini nunaksaguskengarpecen̄i? Waten-qaa piuci piunrirrnaluci elpecen̄ek, tamaitnun-llu angayuqauviit, nunam qainganelnguut, yuitnun picingssautek'laasqelluci, ateci-llu aniqlaatekluki apaalaasqelluku?

⁹Nalluyagutarci-qaa assiilucillrat ciuliarpeci, Judah-m-llu angayuqrin, nulirrita-llu, cali-llu elpeci nuliarpeci-llu atulalci Jerusalem-aam tumyaraini, Judah-m-llu?

¹⁰Man'a erneq tekilluku ellmeggnek pivakut, qigcigyugpek'nateng, aturyugpek'naki-llu alerquutellrenka cikiutekellrenka elpecen̄un ciuliarpecen̄un-llu.

¹¹“Taumek waten qanertuq ATANEQ Artuqailnguq, Israel-aam Agayutii: Inglulirciqamci assiitellria pitekluku, piunrirluku-llu Judah tamiin.

¹²Ilakuarrait-llu Judah-m yuin unegtellret umyuamegteggun taq'ingaunateng ayagyulriit Egypt-aam nuniinun tamaani uitanaluteng, tamarmeng piunriumaciqut; Egypt-aam nuniini iqucimaciqut; anguyagkun piitnakun-llu piunrirciqut; pikegtakumanrilkacagiitnek pirpakumalriartaatnun; angelriamek uumikumalriarurciiqut, tangertem̄eggnun alingnarqelriaruluteng, yuut picingssautek'larciqait, atrit-llu aniqlaatek'larciqait.

¹³Anucimirqecetaarciqanka Egypt-aami uitalriit, anucimirqecetaallrucimtun Jerusalem-aaq anguyagkun, piitnaakun cangerlagkun-llu,

¹⁴tua-i Judah-m yuin ilakuarrait taillret Egypt-aam nuniini uitanaluteng anagngaitut, wall'u unguvaluteng, wall'u uterrngaunateng Judah-m nuniinun, ataam uitaviksuumiq'ngameggnun; tua-i iliitnek utertellriartangqerrngaituq, carraat tau͡gaam qimallret.”

¹⁵Tua-llu tamarmeng angutet, nallunrilnguut nuliameng ekuagilauciitnek aruviarnek tepkegcilrianek allanun agayutnun, arnat-llu tuani uitalriit, yugugaat-llu, tamarmeng-llu yuut Pathros-aami Egypt-aam nuniini uitalriit, Jeremiah kiugaat:

¹⁶“Niicugningaitarput qaneryaraq qalarutkellren wangkutnun ATANREM atrakun.

¹⁷Tau͡gaam qanllerput piciqniluta tamalkuan aturciqerput, elliilarciqukut ekuagarkanek arnamun agayutemten̄un, Qiliim Queen-aanun, elliinun wine-amek elliilarciqukut: wangkuta, ciuliaput, angayuqaput, atanerruaput, ciuliqagteput-llu pilallrucimcetun Judah-m nunaini Jerusalem-aam-llu tumyaraini. Tamatum nalliini neqkaucilallruukut, piluaqerluta, picurlagmek-llu nalluluta.

¹⁸Tau͡gaam taqraanemten̄ek ekuaginanrirluta Qiliim Queen-aanun elliinanrillemten̄i-llu elliinun wine-amek, cairutukut, yup'ut-llu tuqualuteng anguyagkun piitnaakun-llu.”

¹⁹Arnat-llu qanertut, “Kelipiaqamta cake-aanek ayuqeliluku Qiliim Queen-aa, elliinun-llu elliiluta ekuagarkanek wine-amek-llu, uimta cangakeksaitaitkut.”

²⁰Jeremiah-m qanrutai yuut tamalkuita, arnat angutet, tamalkuita-llu mat'umek kiustekellni,

²¹“ATANERMUN-qaa nalluyukaci umyuaqenriryukluki-llu ekuagilallerci: elpeci, ciuliapeci, angayuqerpeci, ciuliqagtevci, tamarmeng-llu nunam yuin nunaini Judah-m Jerusalem-aam-llu tumyaraini?

²²ATANREM taqsuqutellrua assiilngurmek atullerci pellernarqelrialiullerci-llu; taumek nunaci nunakarniirutellriit, yuut-llu atra aniqlaassuutekaqluku, yuirulluteng, tuaten-llu maa-i mat'um nalliini ayuqut.

²³Ekuagilallerci tepkegcilriamek aruviarmek, assiilngillruavci-llu ATANERMUN qanellra aturpek'naki, alerquutai pisqutai-llu piyuavikenrilavciki, makut assiitellriit elpecen̄un tusngaut man'a erneq engelkarrluku.”

²⁴Jeremiah qanertuq tamalkuitnun yugnun arnanun-llu, Niciu ATANREM qaneryaraa tamarpeci Judah-m yuini Egypt-aami uitalriani.

²⁵Waten qanertuq ATANEQ Artuqailnguq, Israel-aam Agayutii: “Elpeci nuliaci-llu akqillruuci Qiliim Queen-aanun ekuagiciqniluci elliiluci wine-amek, akqillrucirpecetun-llu tuaten pillruuci. Tua-i kitaki akqutkellerci aturciu.

²⁶Tau͡gaam waniwa niiciu ATANREM qaneryaraa, tamarpeci Judah-m yuini Egypt-aami uitalriani: Wiinga waniwa ukvernarcariunga Artuqailnguq Atqa aturluku, qanertuq ATANEQ, atqa aturluku ukvernarcarinqigcessngaunaki Judah-mek kingunelget tamiini Egypt-aami uitalrianun, waten qanerluteng, Ukvernarcariunga ATANREM atrakun.

²⁷Wiinga-llu pinritevkenaki callrat piluaqercessngaitaqa; tamalkurmeng Judah-m yui Egypt-aam nuniini uitalriit piunriumaciqut anguyagkun piitnaakun-llu nangqapiarluteng.

²⁸Anguyagmek anagluteng carraat uterciiqut Egypt-aam nuniinek Judah-m nuniinun. Nutaan uitaqallret nallunrirciqaat kia qaneryarai piciuruyuciitnek, wiinga wall'u-qaa ellaita.

²⁹Wiinga, ATANEQ, nallunailkutamek cikirciqamci nallunrirtelluku ilumun anucimirqecetaarumaarkaucirci maani Egypt-aami, akqutkelqa-llu piunrirciqniluci piciurciiquq.

³⁰Egypt-aam angayuqra Hophra tunciqaqa inglukestainun tuqucugtainun, Judah-m angayuqra Zedekiah tunellrucimtun angayuqranun Babylon-aam Nebuchadnezzar-aamun inglukestiinun tuqucugtiinun.”