Read Yupik Jeremiah 46 Bible Online

Jeremiah 46 - Yupik bible

Jeremiah 46

¹Angayuqauviit piluki ATANREM qanrutaa prophet-aaq Jeremiah,

²Egypt-aaq ayagneqluku. Waten qanrutkai anguyagtai Egypt-aam Angayuqran Neco-m, Kuigem Euphrates-aam Carchemish-aamelnguum caniani Nebuchadnezzar-aam cirlakellri allrakut cetamiitni Jehoiakim-aam angayuqrullran Judah-mi:

³“Egypt-aarmiut anguyagtaita atanerruarit qayagpagtut, ‘Upciki anguyagcuucet capkutaci ayagci anguyagyarturluci!

⁴Uskurarluki horse-aarpecen̄un ekici! Uitavigkarpecen̄un elkarrluci qamiqurriryailkuceci-llu all'uku! Panaci ipegcarciki anguyagcuuceci all'uki!’

⁵“Tau͡gken camek tangercia?” aptuq ATANEQ. “Alingluteng utertut. Anguyagtait cirlakumaut, alingem ugaani aqvaqurtut pitacirmegcetun kingyaqsaunateng, nacetmun caulleq tamarmi alingnarquq!

⁶Uqilang'e'rmeng qimagciigatut anguyagten͞gungermeng-llu anagngaitut. Negeqvami Kuigem Euphrates-aam caniani paallacalkaraluteng iqulartut.

⁷Kituuga una ulelria Nile-atun, kuigtun ulelriatun uryurluni?

⁸Egypt-aaruuq, ulelria Nile-atun, kuigtun ulerpalriatun uryurluni. Egypt-aaq qanertuq, ‘Wiinga ulciqua ellarpak naligluku; piunrirciqanka nunarpiit yugtuumaita.

⁹Horse-aarit ayaasqiciki ayagassuucet-llu akalrialget ayagtelluki! Anguyagtet ayagceciki: angutet Ethiopia-mek Libya-mek-llu capkutanek tegumialriit, Lydia-mek-llu elisngalriit-llu pitgaquyaramek.’”

¹⁰Tauna erneq ATANREM Agayutem Artuqailnguum pikaa: akinaullerkaqaa; anucimirqecetaarluki inglukesten̄i. Nuussirpiim nerciqai aqsinatkaminun, augat-llu merluku camirrnatkaminun. Tua-i-wa ATANEQ Artuqailnguq ekuagian neglirnermi nunami Euphrates-aam caniani.

¹¹Egypt-aam yuini, Gilead-aamun ayagluci yuarci iinrukarpecen̄ek! Elliinginaq iinrularyaaquci amllernek; tau͡gaam canrirciiganaci.

¹²Atanruviit yuita niitellruat kasngunarqucirci; yuut tamarmeng aluviliullerci niitaat. Anguyagtem paallagyarpiarvikaa anguyagten͞gullgutni, tamarmek-llu iqulutek nunamun.

¹³ATANREM qanrutaa Jeremiah taiqatalriamek Nebuchadnezzar-aamek Babylon-aam angayuqranek anguyagyarturluku Egypt-aaq:

¹⁴“Qanrutkiciu nunaini Egypt-aam, Migdol-ami, Memphis-aami, Tahpanhes-aami-llu ‘Upingaci ingluliuryuumaluci; cat tamalkuita akluci piunriumaarkaungata anguyagkun!

¹⁵Ciin artuqailnguq agayutsi Apis-aaq iqua? ATANREM iqucani!’

¹⁶Anguyagteten paallagyarpiaraluteng iquagut; ilameggnun qanruyulluteng, ‘Cukamek nakmiin yumten̄un uterrnaurtukut nuussirpait inglukestemta anagniaput!’

¹⁷“Nutaramek acirciu Pharaoh, Egypt-aarmiut angayuqrat, ‘Qastuluni Ucuryagtellria Pillerkaminek Kiturilleq.’

¹⁸Wiinga, ATANEQ Artuqailnguq, Angayuqruunga. Unguvalua Agayutnguunga. Ingriq Tabor-aaq ilamini qertunruciatun Ingriq Carmel-aaq sugtuciatun imarpiim quliini, tua-i tuaten pinia curugtekarpeci ayuqeciquq.

¹⁹Egypt-aam yuini, upci teguarurtellerkarpecen̄ek! Tua-i Memphis-aaq cakarniiruciiqngan imumaluni yuirulluni-llu.

²⁰Egypt-aaq ayuquq tangkegcinarqellriatun kuluvagtun, panayulim negeqvamek anguyakiitun.

²¹Akilirluki anguyagtekengraateng casciiganateng uitaut kuluvayagartun. Nangerrluteng akiurutevkenateng; kingutmun-llu cauluteng tamarmeng qimagtut. Erenrem piunrillerkaata tekitai, anucimirqecetaarumallerkaata pillerkaa.

²²Egypt-aaq qimagtuq, qalrialuni ciissirpagtun, inglukesten̄i agiirtellrani. Anguyagaat piqertuutarteggun, yugtun napanek iqurqilriatun

²³naparugaat-llu piunrirluki. Anguyagtait amllessiyaagameng naaqumasciigatut; amllenruluteng petgertayulini.

²⁴Egypt-aarmiut kasnguyugcecimaut; yuut negeqvamek cirlakngatni.”

²⁵ATANEQ Artuqailnguq, Israel-aam Agayutii qanertuq, “Anucimirqecetaaqata'arqa Amon-aaq, agayutiit Thebes-aat, tapqulluku Egypt-aamun agayutai-llu, angayuqai-llu. Teguqata'arqa Pharaoh cacetuqutekestai-llu,

²⁶tunciqanka tuqungnaqestiitnun Nebuchadnezzar-aamun atanerruarinun-llu. Tau͡gaam kinguqvaarkun, Egypt-aaq yung'eciquq ataam ciungani ayuqucillermitun, qanertuq ATANEQ.”

²⁷“Yumni, alingenrici ciunerkairutevkenaci-llu, Israel-aam yuini, alingenrici. Anirturciqamci tuaken yaaqvanelngurmek nunamek, tuaken nunamek itengqavigpecen̄ek. Uterciiquci kingunerpecen̄un uitanqegciluci-llu uitaarkauluci; pengegnaunaci uitaciquci, kia-llu alingevkarngaitaaci.

²⁸Alingevkenaci, wiinga yumni nayuamci, qanertuq ATANEQ. Piunrirciqanka atanruviit cekavtellemci uitavikelci, tau͡gaam piunrirngaitamci. Ayagcessngaitamci anucimirqecetaarumavkenaci; tau͡gaam anucimirqecetaaqumci pitalqellriakun piciqua. Wii, ATANEQ qanertua.”