Read Yupik Jeremiah 48 Bible Online

Jeremiah 48 - Yupik bible

Jeremiah 48

¹Waten qanrutkaa ATANREM Artuqailnguum Moab-aq: “Takumcukiciki Nebo-m yui nunarpiit piunriumiin! Kiriathaim-aaq teguarurtuq; cayunailnguut asvairqutai navguumaut, yui kasnguyugtelluki;

²Moab-aq niitnaungairutuq. Inglukestain teguaqsagutaat Heshbon-aaq picirkiurluteng-llu piunrirnaluku Moab-am angayuqauvia. Nepaircimaciquq Usvillugtellriit nuniit; anguyiit anguyagyarturciqaat.

³Horonaim-aam yui qayagpagtut, ‘Nangcinqegpaa! Piunririnqegpaa!’

⁴“Moab-aq piunriumauq; niiciki mikelnguit qialriit.

⁵Niiciki aluviliurluteng mayullratni Luhith-aamun, neplirluteng nanikualuteng atrarluteng-llu Horonaim-aamun.

⁶Qanertut, ‘Cukamek, unguvaci qimauciki! Aqvaqurluci yuilqurmiutartun ciulvagtun mer'ilngurmi nunami!’

⁷“Moab-aq, cacetuqutekiavet asvairqutengqellerpenun tukuullerpenun-llu, tau͡gaam wanirpak elpet-llu tegumaciquten; agayuceci Chemosh-aaq teguarurciiquq ayaucimaluni, maligluni agayulirtem̄inek atanerruaminek-llu.

⁸Piunririlriim nunat tamalkuita tekiciqai; kuignayuk carr'ilqaq-llu piunrirciquk, ATANREM qanrutkellruciatun.

⁹Moab-am qungua teggalqumek nallunailutkiurciu; piunriumallerkaa canimellian. Nunai imenrurrluki uniciiqait, kina-llu tamaani uitanqiggngaunani.”

¹⁰(Aniqlaamali cumigtevkenani yuk calilria ATANREM caliarkiutiinek! Aniqlaamali nuussirpani aturluku tuqurqinrilnguq!)

¹¹ATANEQ qanertuq, “Moab-aq imumirpak elluiluni uitauralartuq nunaminek-llu ayaucimaqayuunani. Moab-aq wine-atun ayuquq kic'ilriatun naivuurumaksaunani utertaarluku assigtanun. Neqnirtacia assiiruteksaituq, ayuqucini ayuqurluku.

¹²“Tau͡gaam erenret agiirtut, qanertuq ATANEQ, ayagceciciqua yugnek Moab-am kuvestekainek wine-atun. Imairciqait caqut wine-amek imalget navgurluki-llu.

¹³Nutaan-llu Moabite-at kemyukenrirciqaat agayutseng Chemosh-aaq, Israel-aam yuin kemyukinrillracetun agayun Bethel-aaq, cacetuquteklerteng.

¹⁴“Moab-am angutaini, ciin elpecen̄ek nanrarceci piqayuliuniluci, alingunaci anguyagten͞guniluci pitassiarumaluci anguyagkun?

¹⁵Moab-aq nunarpani-llu piunriumaut; assinkacagait yun'erraat tuqurqumaluteng. Wiinga Angayuqruunga, ATANEQ Artuqailnguq, wiinga qanertua.

¹⁶Moab-am piunrillerkaa agiirtuq; piunriumallra ak'anun pivkenani tekiciiquq.

¹⁷“Tauna atanruvik qiatekiciu, canimetestaini, nallunritestaini niitnaulallran. Qanerluci, ‘Pinirluni atanirturillra navguumauq; ucurnarqellra pinia-llu piunrirtuk.’

¹⁸Elpet Dibon-aami uitalriami, atraa takarnarqelriamek aqumgavigpenek nunamun-llu urr'armun aqumluten; Tua-i Moab-am piunrirtekaa tekican inglukluten; asvairquceten piunrirtellrui.

¹⁹Elpeci-llu Aroer-aami uitalriani, tumyarat taqruatni nangerrluci utaqalgirci; apqaurciki qimalriit, nallunringnaqluku qaillun piciitnek.

²⁰Kiuciqut, ‘Moab-aq cirlakumauq, qiatekiciu; kasnguyugcecimiin. Qanrutkiciu Kuigem Arnon-aam cen̄iini Moab-aq piunriumaniluku!’

²¹“Qanercetaarun tekituq nunanun manigcetellriami uitalrianun: Holon-aamun, Jahzah-mun, Mephath-amun,

²²Dibon-aamun, Nebo-mun, Beth Diblathaim-aamun,

²³Kiriathaim-aamun, Bethgamul-aamun, Bethmeon-aamun,

²⁴Kerioth-aamun, Bozrah-mun, nunarpagnun-llu tamaitnun nuniini Moab-am, yaaqsilrianun canimelngurnun-llu.

²⁵Moab-am pinia ciamcimauq; pinia piunriumauq, qanertuq ATANEQ.”

²⁶ATANEQ qanertuq, “Taangiqevkarru Moab-aq, ellminek pivaksagucan inglukluku ATANEQ; Moab-aq akaguarniartuq miryamini, yuut-llu temciarautekluku.

²⁷Moab-aq, neq'akan-qaa picingssautek'lallren Israel-aaq? Ellait pilallruaten teglegayulit ilagarluki angusciurumallertun, qamiqun-llu ungaulugtaqluku qanrutkaqavgu.

²⁸“Moab-ami uitalriani, nunaci uniciki! Ayagluci ekvigni uitayarturci! Yaqulegtun ayuqliriluci ekvigni unglulilalriatun.

²⁹Niitellruarput Moab-aq elliinek pivakniluku. Cakneq ellminek pivakuq, ucuryaggluni umyugaa quyigluni, cayunaunani.

³⁰Qanqatailucia nallunritaqa, qanertuq ATANEQ; ucuryagutai piciunritut, caliari-llu cali piciuvkenateng.

³¹Taumek qiatekciqanka tamalkuita Moab-ami uitalriit Kir Heres-aam-llu yui.

³²Qiatekciqanka Sibmah-m yui, pinruluki Jazer-aam yui. Nunarpiini Sibmah-m, napatun ayuquten avayalegtun naulrianek akillilluku Dead Sea-q, Jazer-aaq tekilluku. Tau͡gaam maa-i kiagmi naullret naucetaaruteten atsauteten-llu piunriumaut.

³³Angniryaraq nunaniryulleq-llu tegumauk naungignarqellriamek nunautiinek Moab-am. Arulaircecamku maqellra wine-am mecuirissuutmek; wine-alistekartairucan nunaniryulrianek.

³⁴“Heshbon-aam Elealeh-m-llu yuk'ek qayagaut, qayagallrat-llu niitnaqluni Jahaz-aq tekilluku, yuut-llu Zoar-ami uitalriit niicugngaluku, niitnauguq-llu Horonaim-amek, Eglath Shelishiyah-mek-llu. Tuaten-llu Kuiggaq Nimrim-aaq kinertuq.

³⁵Arulairceciiqanka yuin Moab-am ekuagilallrat agayuyarameggni elliilallrat-llu ekuagarkanek agayutmeggnun. Wiinga ATANEQ qanertua.

³⁶“Taumek ircaqumkun qiatekaqa Moab-aq, Kir Heres-aam-llu yui, aturcetaalriatun cupu'uryarakun tungmagcissuutmek yuarutmek, tua-i-wa cat tamarmeng piutait cairucata.

³⁷Tamarmeng kepliarata qamiquteng keligluki, ungateng-llu kepluki. Unatmegteggun kilirturluteng, yuut-llu tamarmeng missuullernek aturluteng.

³⁸Moab-ami enet kangritni, yuut-llu quyurrviitni camek pitaituq qialrianek tau͡gaam, tua-i-wa Moab-aq navgamku assigtatun kia piyunrilkiitun.

³⁹Moab-aq navguumauq! Qayagaci! Moab-aq kiaresngiatevkaumauq. Imerqumauq, atanruviit-llu avaqliin picingssautekluku. Wiinga, ATANEQ qanertua.”

⁴⁰ATANEQ waten qanertuq, Atanruviim curugciqaa Moab-aq cukaluni yaqulpagtun yaqugni nengingalukek,

⁴¹nunarpiit asvairqumalriit-llu tegumaciqut. Tuani ernermi Moab-am anguyagtai alingem arnatun teggiurcilriatun ayuqlirivkarciqai.

⁴²Moab-aq piunriumaciqngan atanruviunrirluni, tua-i-wa inglulicami wangnun.

⁴³Alingnarqelriim, petmiit, negat-llu utaqait Moab-am yui. ATANEQ qanertuq.

⁴⁴Kina imna alingnarqellriamek qimangnaqkuni petmigmun igciiquq, kina-llu imna nugelria petmigmek napciiquq negamun, ATANREM-wa pillerkiurumiiku Moab-am piunrillerkaa.

⁴⁵Qaillun pisciiganateng qimagaulriit Heshbon-aamun qimagyaaqut, Angayuqam Sihon-aam ataniumallranun, tau͡gaam tauna nunarpak ekualriaruuq. Kenrem qamtellrui nunai ingrii-llu anguyagyunqellriit Moab-am yuin nuniit.

⁴⁶Nakleng Moab-am yui! Yuut agayulallret Chemosh-aamun piunrirtut, qetunrait paniit-llu ayaucimaut teguaruluteng.

⁴⁷Tau͡gaam ernerni tekitarkani Moab-aq ataam nauvkarciqaqa qanertuq ATANEQ. Makut maa-i tamarmeng ATANREM qanrutkelqai tekitarkauniluki Moab-amun.