Read Yupik Jeremiah 49 Bible Online

Jeremiah 49 - Yupik bible

Jeremiah 49

¹Ammonite-at piluki waten qanertuq ATANEQ: “Nauwa angutai Israel-aam? Nuniit-qaa ingluliurutestekaituq? Ciin yugnun agayutulinun Molech-aamun teguvkartatgu Gad-am yuullgutkelriarin nunautiit uitavkarluki-llu tamaani?

²Tau͡gaam pillerkaq agiirtuq Rabbah-rmiut niiskengangevkarciqanka anguyiim nepiinek, imenrurciiquq nunat-llu tamaanelnguut ekuavkaumaluteng qamlluki. Nutaan Israel-aam nuna pini teguciqaa tegustellrinek.

³Heshbon-aam yuini, qayagaci! Ai-aq piunriumauq! Rabbah-rmiuni arnani, tuquilriatun ellirluci missuullernek all'uci qiaci qivruluci. Aqvaqualuci natetmurucirkaunaci. Agayutsi Molech-aaq ayaucimaciquq, tapeqluki agayulirtai atanerruari-llu.

⁴Ciin elpeci piciunrilngurni yugni ucuryagceci? Piniarusngiinartuci. Ciin pinirpecen̄ek cacetuqucirceci qanraqluci-llu kitumun anguyagngaitniluci?

⁵Alingnarqellriamun avatairceciiqamci. Tamarpeci qimagciquci unguvangnaqluci, kitumek-llu unegtellriartaiciiquq anguyagtevci ataam quyurtestekaatnek.

⁶“Tau͡gaam kinguqvaarni Ammonite-at ataam tukuurceciiqanka. Wiinga, ATANEQ qanertua.”

⁷Waten ATANREM Artuqailnguum Edom-aaq qanrutkaa: “Edom-aam-qaa yui usviirutut? Ayuqucirturtaita-qaa ayuqucirturciigaliit? Tamarmi-qaa umyuartuciat piunrirtuq?

⁸Dedan-aam yuini, qimagci! Iirci! Piunriqataamki Esau-m kinguvri anucimirqecetaarillerkaqa ellaitnek tekican.

⁹Wine-arkanek atsanek avurtet avuraqameng, carrarnek uitaciilartut, tegliuryulriit-llu unugmi tegliuraqameng, piullermeggnek tau͡gaam tegutelartut.

¹⁰Wiinga tau͡gaam Esau-m kinguvri uayallruanka cairulluki iirviit-llu nallunrirtelluki, iirciigalivkarluki. Tamarmeng Edom-aam yui piunriumaut. Atauciunge'rmi uitaqanrituq.

¹¹Uniski elliraat mikelnguut wangnun, aulukciqanka; aipainernun-llu cacetuqutekevkarlua wii.”

¹²Waten qanertuq ATANEQ, “Pinarqenrilnguungermeng mer'arkaukata anucimirqecetaarutem saskaanek, umyuartequci-qaa anucimirqecetaarumanritnayukluci? Qang'a, mernarqaaci saskamek!

¹³Wiinga wangkun ukvernarcarillruama, qanertuq ATANEQ, Bozrah alingnarqelriarurciiquq, picingssautngurrluni, cakarniirulluni, aniqlaatngurrluni-llu; tamarmeng-llu nunarpai imenrurciiqut imumirpak yungqenqiggngaunateng. Wiinga, ATANEQ qanertua.”

¹⁴Qanertua, “Edom-aaq, ATANERMEK qanerkamnek akurtullruunga, kevgaq-llu qaneryartulria ayagcecimauq atanruvignun, Quyurciki anguyagceci upluci anguyagyarturniaci Edom-aaq!

¹⁵ATANREM piniallrurceciiqaaten atanruvigni takaqestairutelluten yugni.

¹⁶Elpenek pivakellerpet ukvertaaten. Yugmek alikestaituten umyuarteqsaaqeng'e'rpet yugnun aliksukluten. Uitavingqertuci teggalquni ekvigni, quleqsilriami ingrim kangrani; tau͡gaam uitavingqerrsaaqeng'e'rpet quyilriamek yaqulegpiim uitaviatun, ATANREM atrarciiqaaten. Waten ATANEQ qanertuq.”

¹⁷ATANEQ qanertuq, “Edom-aamun piunririlria taigarkaq arcaqerluni alingnarqelriaruciqngan yuut tamaaggun kitulriit tatamelarciqut alingluteng.

¹⁸Sodom-aatun Gomorrah-tun-llu Edom-aaq pimaarkauguq, piunriumallregtun nunat-llu avatiigni uitalriit. Kina-llu imna tuani uitanqiggngaunani. Wiinga, ATANEQ, qanertua.

¹⁹Yugtutulitun anelriatun napalilriamek Jordan-aam cen̄iinek cungagcelngurmun maramun, Edom-aarmiut ullagciqanka alqunaq qimagtelluki nuniitnek. Nutaan ciuliqagtem cucukellma ataniurciqai yuut. Wangtun-qaa ayuqellriartangqertuq? Kina alegyugciqa wangnek? Ciuliqagcilriit-qaa iliita ingluliryugnganga?

²⁰Kitaki niiciu picirkiuraa ATANREM Edom-aam yuinun, qaillun-llu pillerkaqa nunarpiim Teman-aam yuinun. Mikelngunge'rmeng qamurluki ayaucimaciqut, yuut-llu tamarmeng alingeciqut.

²¹Edom-aaq igeskan, nepiin nuna qiivciiqaa, neplillrat-llu niicimaciquq Red Sea-mek.

²²Inglukestain Bozrah curugciqaat yaqulegpagtun ellu'urtellriatun yaqugni nengingalukek. Tuani ernermi anguyagtai Edom-aam alingeciqut arnatun teggiurcilriatun.”

²³Waten ATANREM Damascus-aaq qanrutkaa: “Hamath-aam yui Arpad-am-llu yui umyuarniurtut uitacurlagluteng assinrilngurmek niicameng; alingem unaircetai, uitacurlagtut imarpigtun quuniqapiarciigalngurtun.

²⁴Damascus-aam yui piniatut qimagluteng-llu alingniurluteng. Engellugturtut nunanialliqluteng arnatun teggiurcilriatun.

²⁵Niitnautuli nunarpak angnirvik'lallrat yuirutqapiartuq.

²⁶Ernermi tuani yun'errai tuqurqumaciqut nunarpiim tumyaraini, tamarmeng-llu anguyagtai piunriumaluteng.

²⁷Ekuavkarciqanka casgui Damascus-aam ekuavkarluki-llu angayuqam Benhadad-aam enai. Wiinga, ATANEQ, Artuqailnguq qanertua.”

²⁸Kedar-aaq piluku Hazor-aam-llu angayuqauvii, Nebuchadnezzar-aam Babylon-aam angayuqran, cirlakellri ATANEQ waten qanertuq: “Kedar-aam yui curugciki piunrirrluki-llu yuullgutkelriarit calaramelnguut!

²⁹Teguciki pelatekait katngautait-llu, 'lumarrat pelatekaita capkutait, cat-llu tamalkuita pelatekaitni uitalriit. Teguciki qulugnelget ungungssiutait yuut-llu qanrulluki, ‘Alingnarqellriim avatairumaaci!’

³⁰“Hazor-aam yuini, Wiinga, ATANEQ, aarcirturamci ayaasqelluci yaaqvanun iirluci-llu. Babylon-aam Angayuqra Nebuchadnezzar-aaq pillerkiuran inglukluci, waten qanerluni,

³¹‘Kitaki! Anguyagnauraput ukut yuut elluiluteng uitalriit camek alingniurpek'nateng! Nuniit iteryaraituq kelucaunani-llu asvairqutaunani.’

³²“Teguluki qulugnelget ungungssiutait kuluvautait-llu! Cekavceciiqanka tamiinun anuqem ayagallranun yuut taukut nuyateng nanililuki kepliatulit, picurlagnarqelria-llu tuc'eciiqaqa ellaitnun tamiin avatiitnek.

³³Hazor-aaq qau͡gyarrlainaurciiquq akwarpak, cakarniirulluni kaviarngalnguut tau͡gaam nunaksagulluku. Kina-llu uitanqiggngaunani tamaani, kia-llu arulaiqervik'larngaunaku. Wiinga, ATANEQ qanertua.”

³⁴ATANREM Jeremiah prophet-aaq qanrutaa Elam-aaq piluku, angayuqrurteqarraallrani Zedekiah Judah-mi.

³⁵Waten qanertuq ATANEQ Artuqailnguq: “Elam-aam pitgaqustai tamalkuita tuquciiqanka piniutekngaki.

³⁶Anuqlirceciiqaqa Elam-aaq naken tamiinek, cekavciiqanka-llu yui natmun tamiin, nunatairusvianun Elam-aamek qimallernek ilangqenrilngurmek.

³⁷Elam-aam yui alingevkarciqanka inglukestaitnek, tuqucugtaitnek. Angelriamek eq'urtellemni piunrirciqanka Elam-aam yui, qanertuq ATANEQ, anguyagtet-llu ayagtelluki anguyagyarturluki tamaq'apiaraita piunrirvimnun.

³⁸Piunrirciqanka angayuqrit ciuliqagtait-llu, atanruvima-llu aqumllertaa elliluku Elam-aamun.

³⁹Tau͡gaam kinguqvaarni Elam-aaq ataam tukuurceciiqaqa, Wiinga, ATANEQ, qanertua.”