Read Yupik Jeremiah 5 Bible Online

Jeremiah 5 - Yupik bible

Jeremiah 5

¹Jerusalem-aam yuini, aqvaquaci tumyararpecen̄i! Atam avatsi kiarteqerciu! Tungaunaku tangerciu! Yuarci tuneniarvigni! Nalaqucugngauci-qaa ataucimek yugmek elluarrluni yuulriamek piciuluni Agayutmun pillerkani pingnatuutekestiinek? Nalaqucugngakuvci, ATANREM au͡g'ariciiqaa Jerusalem-aaq.

²Qanngerpeci agayularniluci ATANERMUN, qanllerci atuqsaitaci.

³Ilumun ATANEQ yualartuq piciunermek. Anucimirqecetaalaryaaqaaci tau͡gaam catkeksaitaci; ciamtellruaci, tau͡gaam eliyuuteksuumiitarci. Asvaunaci assiilngurpecen̄ek-llu tuigcuumiinaci.

⁴Tua-llu wii umyuartequa, “Ukut arrsaulriaruut elisngalriaruvkenateng-llu. Usviilngurtun ayuqelartut; nalluluku Agayutmeng piyuutii, alerquutai-llu ATANREM nalluluki.

⁵Yuut piuranrit ullagciqanka qanellgutkeciqanka-llu; ellaita nallunrilatgu ATANREM piyuutii, Agayutem-llu alerquutii nalluvkenaku.” Tau͡gaam tamarmeng ayuqluteng ciuniullrunritaat ATANREM pisqutai niisngayuumiinaku-llu.

⁶Taumek yugtutulit napat akuliitnek anluteng tuquciiqait; keglunret nunamek mertailngurmek uirreciqait allgurluki, kuskarngalnguut-llu nunarpaitni wavirtaarciqut. Ukut yuut ankuneng, allguumaciqut tua-i-wa assiilnguit amlleqapigcata pulengtaq-llu Agayutmek avtaqluteng.

⁷ATANEQ aptuq, “Ciin wiinga au͡g'ariciiqsia yuunka assiilnguitnek? Ellaita cakaallruatnga agayuaqluteng-llu agayutnun piciunrilngurnun. Yuunka nerevkalaranka aqsivkarluki, tau͡gken ellait akusrarutekilartut akissut tuaten enaitnun ayagaluteng.

⁸Taukut ayuqut nerqeluaqaumalriatun angucalutun horse-aatun nulirtellriatun, aglumaluteng ilameng nulirritnek.

⁹Anucimirqecetaarngaitanka-qaa makut pitekluki akinaurngaitaqa-llu-qaa atanruvik waten ayuqellria?

¹⁰Ayagceciciqua inglukesten̄ek navguusqelluki wine-arkanek naucetaarviit, tau͡gaam nangqapigcetevkenaki. Alerqurciqanka avayait kepuusqelluki, tua-i-wa tamakut avayat wiinga pikenrilamki.

¹¹Israel-aam Judah-m-llu yuk'ek piciunritqapiggluteng wangnun pillruut. Wiinga, ATANEQ qanertua.”

¹²ATANREM yuin ukveqenritaat qanerluteng, “Qaillun pingaitaakut. Assiitellria wangkutnun tusngaituq; anguyagngaitukut, piitnarngaunata-llu.”

¹³Qanellruut prophet-aat cauvkenaki anuqmek tau͡gaam imangqerrniluki, camek-llu qanerkaitniluki ATANERMEK kingunelegmek. ATANEQ Agayun Artuqailnguq wangnun qanertuq, “Jeremiah, ukut yuut tuaten qalartellruata, qaneryaranka qanerpeni kenertun ayuqlirivkarciqanka. Yuut muragtun ayuqliriciqut, kenrem-llu ekuaciqai.”

¹⁵Israel-aam yuini, ATANEQ taivkariqatartuq elpecen̄un, atanruvigmek yaaqvanek callugtekarpecen̄ek. Tauna atanruvik pinilriaruuq, ak'a piurtelleq, taum atanruviim qaneryaraa elpeci nalluarci.

¹⁶Pitgaqustait pinilriaruut anguyagcet tuqucitulit takumcuyugpek'nateng.

¹⁷Naucetaarvigpeci naugillrit neqkauteci-llu nerciqait; tuquciiqait qetunraci panici-llu. Katngauceci ungungssiuceci-llu nalarqeciqait wine-arkat-llu napayagait, figs-aat-llu napait navgurciqait. Cacetuqutekek'ngaci-llu asvairqumalriit nunarpiit piunrirciqait anguyagtaita.

¹⁸ATANEQ qanertuq, “Tau͡gaam tamakuni ernerni nangqapiggluki piunrirngaitanka yuunka.

¹⁹Jeremiah, apeskata ciin makunek picimnek qanruskiki wangnek tuigtellruciacetun, kevgiurluki-llu allat agayutet nakmiin nunameggni, tuaten-llu kevgiurciqait allanret nunakenrilkem̄eggni.”

²⁰ATANEQ qanertuq, “Qanruski kinguvri Jacob-aam, qanruski Judah-m yui:

²¹Murilkeqerci, usviilngurni elpegilngurni-llu yugni, iingqerrsaaquci tau͡gaam tangerciigatuci, ciutengqerrsaaquci, tau͡gaam niitesciigatuci.

²²ATANRUUNGA; ciin qigcikenricecia? Ciin ciuqamni uulegtenriceci? Wiinga ellillruaqa qau͡gyaq engelnguarkauvkarluku imarpigmun, taqluku engeleksagutelluku mermun kiturciigaliluku. Qairet qagrayaaqsartut, tau͡gaam kiturciigataat; qairet ellerrarcaaqsartut, tau͡gaam qagrutesciigatut.

²³Tau͡gaam elpeci yugni! Asvaituci inglulicugluci-llu; avvluci wangnek unitellruarpecia.

²⁴Umyuarteqsuituci quyaviknalua, uksuarmi up'nerkami-llu ellallircet'langramku quyurciarkangqercetaqluci-llu allamiaqan.”

²⁵Elpeci assiilngurpeci makut assilriit elpecen̄un pivkaqsaitait.

²⁶“Wii yuunka assiitellrianek ilangqerrata; elavluteng nayulartut, yugtun pissulriatun kuvyirluteng yaqulegnek, tau͡gken ellait civcilartut neganek yuut pitaqnaluki.

²⁷Pissurtem casgulek imilauciatun yaqulegnek, imillruit eneteng uayaaqenganek. Taumek pinilriarulriit tukuuluteng-llu,

²⁸taumek-llu uqurilriit nerluaqeraqluteng-llu. Engelaituq assiilngurmek calillrat. Elliraat pitait cuqtelarait elluaruciq aturpek'naku, anagyaaqucuunaki-llu nuuqitellriit piunarquciit.

²⁹“Tau͡gaam, Wiinga, ATANERMI, anucimirqecetaarciqanka makut pitekluki; akinaurciqaqa una atanruvik.

³⁰Assiitqapiaralria tatamnarqelria-llu pillruuq nunami:

³¹prophet-aat qalartelartut piciunrilngurnek; agayulirtet atanirturilartut prophet-aat pisqumallricetun, yum'a-llu qiperrluutekeksaunaki. Tua-i tau͡gaam qaillun piciqat iquklitlerkaq tekiskan?”