Read Yupik Jeremiah 50 Bible Online

Jeremiah 50 - Yupik bible

Jeremiah 50

¹Man'a ATANREM qanelqaa Babylon-aaq nunarpak yui-llu piluki, Jeremiah-kun prophet-aakun:

²“Qanrutkiciki atanruvignun! Qanrutkiciu! Aassaqutekenriciu! Babylon-aaq cirlakumauq! Agayutii Marduk-aaq navguumauq! Babylon-aam agayutnguari kasnguyugcecimaut; cumacinarqellriit agayutnguari piunriumimeng!

³“Neglirnermek atanruvik taiguq anguyagyarturluku Babylon-aaq nunakarniirutarkauluku, yungqerrngairulluku; yuut ungungssit-llu qimagciqut.”

⁴“Tamakuni ernerni pillerkiurumallermeggni, qanertuq ATANEQ, Israel-aam yui Judah-m-llu yui quyurciiqut, aluviliurluteng taiciqut, yuarciqaat-llu ATANEQ Agayuceteng.

⁵Apqaurutkeciqaat tumyaraq Zion-aamun, ayagluteng-llu tungiinun qanerluteng, ‘Tailuci, ATANERMUN ullaulluta akqutmek taqutnaurtukut elliinun nalluyagutarkaqenrilkemten̄ek.’

⁶“Yuunka ayuqellruut qusngitun tamaumalriatun; qusngiliurtaita iqlutmurulluki, ingrini tamartelluki. Ayagallruut qusngitun waken ingrimek allamun ingrimun, nalluyagutellruat-llu kingunermeng nanlucia.

⁷Tamarmeng-llu nalaqestaita nangtelarait, inglukestait qanraqluteng, ‘Wangkuta pinarqutaitukut, ellait assiilngillruut ATANERMUN. Ciuliarita cacetuqutekellruat ATANEQ, ellait-llu tuaten ATANERMUN piciuluteng pinarqellruyaaqai.’

⁸“Israel-aam yuini, qimagci Babylon-aamek, anici Chaldean-aat nuniitnek, qusngirngalngurtun angucalutun ayagci ciunratgun katngiit ayalriatun.

⁹Pek'ngarcetqataranka pinilriit atanruviit negeqvami uitalriit anguyagtelluku-llu Babylon-aaq. Ilikluteng anguyagciqaat nuna cirlakciqaat-llu. Taukut pissuryaramek elisngalriaruut, pitgallerteng-llu uniurcuunaku.

¹⁰Babylon-aaq uayaumaciquq, uayartai-llu tamalkuitnek piullermeggnek teguciiqut, qanertuq ATANEQ.”

¹¹ATANEQ qanertuq, “Babylon-aarmiuni, uayallruarci atanruvika. Angnirtuci quyaluci-llu, kuluvagtun tutmarluki carririlriatun mukaarkanek, wall'u horse-aatun qalrialriatun,

¹²nunarpagci kiaresngiacecimaciquq, kasnguyugcecimaluni. Babylon-aaq allani atanruvigni caunrillrurciiquq; meriulluni qau͡gyarrlainaurciiquq.

¹³Eq'uqertiin ATANREM yuiruciiqaa, imenrurrluni nunakarniirulluni-llu, tamarmeng-llu Babylon-aam kiturtain tangerrluku cakneq irr'ikciqaat ukverciiganateng.

¹⁴“Urluvlegni, upci anguyallerkarpecen̄un Babylon-aaq avatairluku-llu. Pitgaquciki tamalkuita pitegcauceci Babylon-aamun, tua-i-wa assiilngillruan wangnun, ATANERMUN.

¹⁵Nalugciu anguyiim qayagatii tamiini nunarpagmi! Waniwa Babylon-aaq tuatequaguq. Casgui navguumaut igingaluteng. Man'a akinaurutekngaku ATANREM: akinaurciu, elliin allat pilallratun tuaten-llu elpeci piciu.

¹⁶Naucirivkaryaqunaciki tamaani nunami, naugaarnek-llu quyurcivkarpek'naki. Tamarmeng nunakestekenrilkai tamaani uitalriit alingluteng anguyalrianek uterciiqut nakmiin ilameggnun, nakmiin-llu nunameggnun.”

¹⁷“Israel-aaq qusngitun ayuquq yugtutulit pissurluki sekaveskaicetun. Ciumek curugciullruut Assyria-m angayuqranek, kinguakun-llu Nebuchadnezzar-aam Babylon-aam angayuqran enrit pukugluki.”

¹⁸Taumek ATANEQ Artuqailnguq, Israel-aam Agayutii waten qanertuq, “Wiinga anucimirqecetaaqata'arqa Babylon-aam angayuqra nunii tapquulluku, anucimirqecetaallrucimtun Assyria-m angayuqra.

¹⁹Uterceciiqaqa Israel-aaq nuniinun. Nerciquq neqmek Ingrimi Carmel-aami naulalrianek Bashan-aam-llu nuniini, camirrluni nerciquq naunrarnek naumalrianek qemiini Ephraim-aam Gilead-aam-llu.

²⁰Pillerkaq tamana tekiskan, assiilnguq nalaqumangaituq Israel-aami Judah-mi-llu, au͡g'ariciiqngamki taukut yuut unguvavkallrenka. Wiinga, ATANEQ, qanertua.”

²¹ATANEQ qanertuq, “Anguyagciki Merathaim-aam yui Pekod-aam-llu yui. Tuqulluki piunrirciki, qanertuq ATANEQ. Alerquuteka tamalkuan atuqiciu. Wiinga, ATANEQ, qanertua.

²²Anguyalriit nepiit niitnauguq nunami, piunririllrat-llu angelriaruuq.

²³Babylonia-m mulut'uullrua ellarpak tamalkuan ciqumlluku, maa-i-llu tauna mulut'uuk navguumauq! Tamarmeng atanruviit alangaarutkait nunamun tamaavet tut'ellret.

²⁴Babylon-aaq, ingluliavnga elpenun negamun civtellemnun naptuten, elpet nallungerpegu.

²⁵ATANREM anguyagcuutnek qemaggvini ikirtaa, eq'uqerrluni caskuni antai, tua-i-wa ATANEQ Agayun caliarkangqerrami Babylonia-mi.

²⁶Curugluku avatiinek tamiin; ikirqiciki mukaarkanek qemaggvii; imenrurrluku qalliqellriatun mukaarkatun, piunrirteqapiggluku-llu; iliinek uitaciyaqunaci

²⁷Tuquciki tamalkuita anguyagtait! Tuqurqelluki! Babylon-aam yui piunriumaarkaurtut! Anucimirqecetaarumallerkaat tekican!”

²⁸(Qimagaulriit anagtut Babylon-aamek tailuteng-llu Jerusalem-aamun, qanrutkaat-llu qaillun ATANREM Agayutemta akinaullrucii Babylonian-aat Agayuvigpani akinaurulluku.)

²⁹“Qanruciki pitgaqustet curuusqelluku Babylon-aaq. Ayagtelluki tamalkuita urluvrem pitegcautem-llu aturyarakek nallunritestai. Avatairluku nunarpak; kina anagcetevkenaku. Akinaurciki elliin pillri tamalkuita, allat pilallritun ellii-llu tuaten piciu, umyuamikun angliriluni ingluliaku ATANEQ Tanqilriartaa Israel-aam.

³⁰Tuaten-llu ayagyuat angutai tuqucimaciqut tumyaraini, anguyagtai-llu tamarmeng piunriumaluteng tuani ernermi, qanertuq ATANEQ.

³¹“Babylon-aaq, inglukamken elpenek pivakngavet, qanertuq ATANEQ Artuqailnguq, erneq wangnek anucimirqecetaarumallerkan tekican.

³²Ellminek pivakellria atanruviin naggluni paallagciquq, ikayurtekaunani. Keneq kumarciiqaqa nunarpaini, avatiinelnguut-llu tamalkurmeng piunriumaciqut.”

³³Waten qanertuq ATANEQ Artuqailnguq: “Israel-aam Judah-m-llu yui nangcimaut. Teguaqestaita murilkelarait cakneq ayagcecuumiinaki.

³⁴Tau͡gaam anirturtengqertut pinilriamek; aterluni ATANEQ Artuqailnguq. Elliin tungaunani ikayurciqai uitanqegcitmek-llu taitarkauluni nunamun, Babylon-aam tau͡gaam yui uitacurlagmek piarkauluki.”

³⁵ATANEQ qanertuq, “Nuussirpak tull'i Chaldean-aanun! yuinun-llu Babylon-aam, atanirturtainun umyuartulriarinun-llu.

³⁶Tuqulit iqlungalriit prophet-aari usviipagtat! Nuussirpak anguyagtainun pili piunriumanaurtut!

³⁷Piunrirluki horse-aarit ayagassuutait-llu akalrialget! Tuqulit akilirluki anguyagteksagutellrit taukut cirlauvagtat! Piunrirrluki tukuutai; uayarluki-llu.

³⁸Ellalliyuirutelluku nuniit kuigit kinertelluki. Babylon-aaq nunakaat alingnarqellriit agayutnguat tamakut usviirutevkallrukait yuut.

³⁹“Taumek yuilqurmiutaat ungungssit uitaviksaguciiqaat hyena-nek ilaluteng, yaqulget-llu ostrich-aat uitavikeciqaat. Ataam yungqenqiggngaituq akwarpak.

⁴⁰Agayutem piunrillruciatun Sodom-aaq Gomorrah-llu nunat-llu avatiignelnguut, qanertuq ATANEQ, kina tuani uitanqiggngaituq, kia-llu arulaiqervikenqiggngaitaa.

⁴¹“Tangerrluku, yuut taigut negeqvamek, yaaqvanelnguq pinilegpaulria angayuqauvik; amllellriit angayuqat uptut anguyagmun.

⁴²Urluvteng panateng-llu teguit; nangcilriaruut, takumcuyuyuunateng-llu. Nepengqelartut imarpiim ellerrartellratun horse-aamegteggun ayagaqameng. Upingaut anguyagmun inglukluku Babylon-aaq.

⁴³Babylon-aam angayuqran niicamiki, unatai aqevlertut unaqserrluteng. Angniitnam nangteqnam angelriim imiraa, arnatun teggiurcilriatun irniqatarluni ayuqliriluni.

⁴⁴“Yugtutulitun anelriatun, napalilriamek Jordan-aam cen̄iinek, pengegnailngurmun qusngit casguatnun, Wiinga, ATANEQ tailua Babylonian-aat alqunarmek qimagceciiqanka nunarpiitnek. Nutaan ciuliqagtem, wii cucukellma, atanirturciqaa angayuqauvik. Kina wangnun ayuqeltasiiguteksunarqaa? Kia aleklua ingluliryartanga? Kia atanirturilriim ingluliryartanga?

⁴⁵Taumek niicugniciu picirkiuraa ATANREM Babylon-aamun, yui-llu qaillun pimallerkaat. Tuaten-llu mikelnguit qamurluki ayaucimaciqut, tamarmeng-llu yuut qessanayugciqut alingluteng.

⁴⁶Babylon-aaq iqukan, qastuqapigciiquq nepii nuna tamalkuan arulalluku, allat-llu atanruviit niiciiqait alingluteng neplillrat.”